تبدأ الاحداث يوم وقفه العيد الاضحى
لود مرتفع جدا على السيرفر نتيجه هجوم DDOS
من مختلف انحاء العالم .. ميه ميه اعداء الغناء فى الوطن بيعيدوا عليا
تجهيز السيرفر باللازم لمواجه الهجوم
تاني ايام العيد سيرفر الاغاني واخد باند والشركه طالبه صوره الباسبور والكريديت
بعت المستندات اللازمه .. تلت ايام الموقع واقف
نقلت الملفات على استضافه من هوست جاتور
تلت ايام والموقع سسبند لانه بيستهلك اكتر من 25% من موارد السيرفر
قشده ..
سيرفر التصفح لم يتحمل الهجوم والداون تايم وصل ليومين تقريبا
والسبورت مش عارف يوصل لحل
نقل بعض المواقع وتوزيعها على اكتر من VPS توزيعا للاهداف
وتحسبا لاي عمليه اختراق شبيهه بالعيد الماضي
التاكد من سيرفر الباك اب ومراجعه الملفات
كله تمام .. سيرفر جديد من iweb
نقل الملفات وعادت المياه لمجاريها وكله اشتغل
قوم ايه بقى .. ماهو المنحوس منحوس ياعم الحج
الموقع كان واصل لاعلى ترتيب ليه من يوم ما اتفتح
الترتيب اليومي كان بيوصل 6 الاف فى اليكسا
هوب .. انقطاع فى تلات كابلات بحريه امام صقليه بايطاليا
ايه سفن ايه !
هيا كانت ناقصاهم هيا
يومين والنت شغال بنسبه 80%
وفى ناس هنا هتقول ان الانقطاع علشان فى ايطاليا حلو المشكله بسرعه
ولما كان فمصر قعد سنتين .. لا يا ظلمه لا
بجد انا ارسل برقيه تحيه لوزاره الاتصالات وكل المسئولين فى الحل السريع
وتوصيل الخدمه لهذا المستوى بهذه السرعه على الرغم من الانقطاع
عايز اقولكوا اني بعمل ريكوست على سيرفر الاي ويب
الريكوست بيطلع من مصر على تركيا على فرنسا وبعدين انجلترا
وبعدين يدخل امريكا وبعدين يوصل مونتريال فكندا بالسلامه
وانا قاعد اعد الريكوستات ياعم الحج .. لووول
طبعا صاحب الانقطاع الطويل ده نقص حاد فى ايرادات الشهر ده من الاعلانات
ده بالاضافه لتوقعي ان شركات الاعلانات تخفض الاسعار
نظرا للازمه العالميه اللى اكيد هتلقى بظلالها على الاعلانات على الانترنت .
وكل داون تايم وانتم بخير
جلست دوماً اتخيلك ليلى
وقررت ان اكون قيسك
وبعد مرور الوقت
اكتشفت اني ما كنت قيس يوماً
وما كنتِ انتِ ليلى !
ولست ادري من انا
فلم تخبريني انت من انا
اطلعتك على عشقي لها
لشواطئها ورمالها
وطلبت منك الرحيل معي
ففيها ادرك من انا
فانسحبت ورفضت خوض الامتحان
تحت امطار الاسكندريه ..
شعوب اعتقدت انها برميه حذاء قد استعادت كرامتها
قد اخذت ثأرها ودماء شهدائها ودموع نسائها
ما احقركم من شعوب !!
مصطفى بكري مشغل القناه عرض مستمر لفيديو رمي الحذاء على بوش
واغاني من فصيله فدائي فدائي فدائي افدي العروبه دمائي
ياخي احه بجد !!
خلاص بقى اللى رمي جزمه فوش بوش فدائي
خلاص بقت هيا دي الفدائيه من وجهه نظركم
لو جيفارا كان عايش كان مات بالحسره !!
خلاص انتوا مقتنعين من جواكم انكم مستضعفين فى الارض
خلاص اقتنعتم من جواكم انكم حثاله واقصى ما عندكم رمي جزمه !!
جتكم القرف شعوب تافهه
خلاص بقى اللي رمه جزمه ثوري ومناضل
و 100 محامي متطوع يدافع عنه
و 100 الف دولار تمن للجزمه ياولاد الجزمه !!
ايه خلاص مفيش امل يطلع عبد الناصر تاني من الارض دي
ايه التفاهه اللى انتوا فيها دي .. شعوب موازينها مقلوبه صحيح !!
بقالى اكتر من شهرين ماشي بموبايلي الـ 1110 النوكيا
متمسكا بالمباديء الاشتراكيه اللعينه .. لوول
بعد ما بعت موبايلي الـ N90 اللى من انتاج نوكيا برضه
بـ 700 جنيه باين مع اني كنت شاريه مستعمل من سنتين تقريبا بـ 2200
مش مهم الفرق مقابل الاستهلاك الفتره اللى فاتت
بس اكتشتف اننا فمجتمع مبيحترمش الانسان الا لو كان حيوان استهلاكي
بمعنى .. الناس كانت بتبصلى وانا بالـ 1110 على اني شحات
مش فاهم ليه !!
رد فعل كل واحد من اصحابي لما بيشوفه ايه ياهتلر انت افتقرت ولا ايه 
عموما قررت اخرج من مرحله التقشف واشبع شويه رغبات دنيئه كما يقول الاشتراكيين لووول
ايون .. نوكيا n95 8GB فنلندي اصلي ياعم الحج
وبكل عدم احترام للقانون .. او نقدر نقول برفض صارخ لغباء القانون المصري
الذي يمنع حيازه اجهزه GPS الا بترخيص امنى .. ايه سفن ايه بجد !
الدنيا كلها بتتقدم واحنا مانعين التكنولوجيا خوفاً من الاضرار الامنيه ..
بس مقابل الحريه .. الواحد ممكن يخرج على النظام .. حتى ولو بشكل بسيط ..
الكاميرا 5 ميجا بكسل بعدسات كارل زيس وبصراحه الصوره مش زي ما كنت متوقع ..
انا فعلا مش راضي عن مستوى التصوير
الموبايل بـ 2700 جنيه جديد .. ميموري 8 جيجا وبلوتوث وواي فاي وانفرا
وطبعا الـ GPS اللى كان بيشترط ترخيص برنامج نوكيا مابس
بس على مين وصلت اليو اس بي وكراك للسمبيان واي برنامج مضروب يشتغل دلوقتي تمام
نزلت النوكيا ماب مفكوك الكراك بتاعه
شغلت الواي فاي وعملت داونلود للخرائط وظبطت الدنيا لووول
احلى حاجه عاجباني بقى تصوير الفيديو وامكانيه العرض على التليفزيون ..
وطبعا صوت الموبايل كويس جدا لما بيرن بسمع منير بنقاء
وطبعا كان لازم سماعه بلوتوث من فرع فودافون لزوم الفشخره ..
عموما انصحكوا تعملوا حركات واطيه زي دي من الحين للاخر
لان الرغبه الدنيئه فى اقتناء هذه الاجهزه تؤدي الى زياده الانتاج والتفكير فى التطوير والنمو ..
لووول ..
تنويه .. انا مش اشتراكي
انا مواطن امبريالى شريف هع هع هع
كان قد هزمك من قبل
ولا تعرف هل هزيمتك له
من باب تفوقك ام من باب ضعفه
فهو شيء مؤسف للغايه ..
وخصوصاً اذا كان ينبغي عليك
ان تظل مهزوماً اماماً ..
وده اخر يوم هتشتغل فيه البنوك هنا فمصر
لغايه يوم الاحد اللى بعد اللى جاي
ده معناه 10 ايام بدون اي خدمات بنكيه باي شكل من الاشكال !!
مقولناش ان موظفين البنوك ميعيدوش
لا يعيدوا ويهيصوا بس يعني ايه بنك قافل لمده 10 ايام ؟؟
المفروض يبقى البنك شغال بشكل مخفف مثلا فى خلال العطلات الرسميه
الخدمات الماليه مش اقل اهميه من الخدمات الامنيه والصحيه !!
الا بقى اذا كانت المستشفيات بتاخد اجازه فى العيد برضه زي البنوك
وده متوقع عندنا فمصر
وكما هو معتاد قبل كل عيد
طوابير قدام الويسترن يونيون
وقدام ماكينات الـ ATM
كله عايز يلحق يشتري اي حاجه
سواء هدوم جديده او حتى خروف
وسلملي على الازمه العالميه
منذ الف عام ايادينا ملطخه بالدماء
كل عنق تذبح بسيف تذبح تحت رايه الاسلام
كل معتوه يقتل الابرياء يتشدق بالاسلام
كل ملحد يسجن فى وطننا .. يسجن دفاعا عن الاسلام
كل علماني يغتيل فى وطننا .. يغتال دفاعاً عن الاسلام
اهذا هو فعلاً الاسلام ؟؟
لماذا كل قاتل وسافك دم يقرأ القرآن ؟؟
لماذا ينطق بالشهاده .. وفيديه خنجران ؟
الم يحاول الاخوان المسلمون اغتيال عبد الناصر ؟
الم يقتل خالد الاسلامبولي انور السادات ؟
لماذا كل هؤلاء تحتوي اساميهم كلمه الاسلام ؟؟
اوليست تحيتنا هيا السلام !!
لماذا بعد كل هذا نخرج لنقول اننا دعاه سلام
لماذا بعد كل هذا نستنكر قتل النفس
اولسنا ندافع عن الاسلام ؟؟
ماذا ارتكب سائح فى سيناء ؟؟
ماذا ارتكب سائح فى مومباي ؟؟
لماذا يقتل الانسان .. يهوديا كان او بوذيا
من قال ان البوذي ليس بانسان ؟؟
من قال انه لايجري فى شرايينه دماء مثلها مثل دماء بنوا الاسلام ؟؟
من قال ان الاخوه هي اخوه اديان ؟!!
اذا كانت هذه هي نتائج الاديان
اذا كان الانسان سيذبح ارضاء وقربان
فمن اليوم سانكر انتمائي لاي دين من الاديان
ودون احتقار للاديان (اصلها تهمه فى القانون المصري)
أحدث التعليقات