اكتم هواك جواك طول ما الفضا مقفول
معقول هتوصل هناك ؟ وانت سجين مغلول ؟
ده الحب حريه .. والقلب لو يتقتل أبداً مالوش ديه
وازاي وانا مقهور .. ازاي وانا مأسور .. ازاي الف وادور ؟؟
ده الحب زي الطيور .. لازم يعيش فى النور
ده احلى مقطع من اغنيه منير الحب زي الطيور من البوم حبيبتي .
المهم بقى فى عربيه انا بموت فيها فعلا اسمها BMW Z4
العربيه سعرها لموديل 2008 فى اليونايتد ستيتس زي ما هو موضح قدامكم فى الصوره
يعني اغلى فئه فيها اللى هيا M بجنوطها وتظبيطها
عامله 53 الف دولار يعني تقريبا 270 الف جنيه على اقصى تقدير
اللذيذ بقى ايه .. انا اتهبلت فدماغي لما فكرت فعربيه محترمه فيوم من الايام
احنا اساسا شعب اخره يركب 128 علشان نحقق العداله الاجتماعيه
اتهبلت فيوم كده وبعت لتوكيل BMW فمصر سألته عن سعر العربيه
وجاني الرد جاني ولقتها بتستناني
Dear Mr. Ahmed,
Z4 will cost you between 900,000 L.E and 1,250,000 L.E depending on which engine.
Best regards,
اه زي ما الاخ كاتب بالظبط كده بالانجليزي
من اول 900 الف جنيه لغايه مليون وربع يا رجاله
يعني بالظبط اقل فئه بسعر تلاته من اعلى فئه فامريكا
مش بقولكوا احنا شعب غني وبيستعبط
والحكومه قالت اما انتوا معاكوا فلوس كتير كده ما تدفعوا
هو انتوا تركبوا عربيات والحكومه تتفرج يعني ؟؟
بالمناسبه الجات هيبدأ تطبيقها على السيارات من اخر السنه الجايه
والضريبه على السيارات هتنزل 10% كل سنه
يعني فى احتمال اركب الزد فور على 2020 مش مشكله هيكون عندي وقتها حوالي 31 سنه
هكون لسه شغال برضه … لوووول
أحدث التعليقات