مدونة أحمد هتلر

امبارح فى جامع الفتح 
حصل حدث تاريخي لاول مره فى تاريخ مصر 
والعالم الاسلامي كله 

آه والله بجد مش مصدقين ؟؟
الزقازيق دخلت التاريخ … لووول 
اكيد كلكم سمعتم عن المحاميه اللى قدمت طلب 
علشان تبقى ماذونه وتمت الموافقه على ده 
وبقت مأذونه فعلاً ..
اول عقد جواز عملته كان امبارح 
وبكده بقت امل سليمان عفيفي 
اول مأذونه مصريه 
وانا شايف ان ده انتصار كبير للمرأه 
مع ان ردود فعل الناس اختلفت بتباين واضح 
وبدأت بقى كلاكيع المجتمع الشرقى الذكوري تظهر 
وبدأت الناس تحذر من المؤامره الغربيه الدنيئه 
وفنفس الوقت ناس كتير كانت متحمسه للموضوع 
وناس كتير اعتبروا ده تقدم رائع فى حقوق المرأه المصريه .
عموماً .. مبروك للعروسين .. والمأذونه 

بقالى كام يوم
حاسس بلخبطه ومش عارف ليه 
فى حاجه ناقصاني
بخاف منها وبدور عليها ..

منسي بيقولى انت بقيت ممل اليومين دول 
الغريب اني انا اللى شايفه ممل 
ومع ذلك بنروح نقعد فى نفس الكافيه 
نتصل بمحجوب اللى كالعاده غير متاح
ومش في البيت من شهرين بالظبط
نقعد ونشوف اي موضوع نختلف عليه 
وكل واحد يتعصب لرأيه 
ويتهم التاني انه بيعترض لمجرد الاعتراض 
ونكتشف فى النهايه اننا بنعترض على رأي واحد 
وفنفس الوقت بندافع عنه احياناً 

دخلت فيلم زي النهارده 
لاحمد الفيشاوي وبسمه 
انا بحب بسمه جداً .. مش حب يعني هروح اقولها اتجوزيني 
بس يعني بحب ادوارها وشخصيتها وشكلها .. خصوصا شعرها 
لقيت منسي بيقولى مش حلوه 
ليه قال كده معرفش !!

الناس اللى كانوا ورانا فى الفيلم 
كانوا بيضحكوا على مشاهد قتل 
وكمان مشاهد فلسفيه بحته مفيهاش مجال للضحك خالص
الظاهر الناس بتدخل السينما بس علشان تضحك 
ولما ملقوش مشاهد كتيره كوميدي قالوا ان فيلم شبه منحرف احلى منه 
بناء على ايه مش فاهم ..

لقيت برضه الناس اللى قدامنا مدخلين اطفال معاهم 
مع العلم ان الفيلم فيه مشاهد عنف وقتل 
والظاهر اننا لسه موصلناش لمرحله اننا نختار الفيلم المناسب 
علشان ندخله باطفال .. ودي مسئوليه السينما كمان 
المفروض يكون ممنوع دخول الاطفال تحت السن القانوني !

عجبني دور احمد الفيشاوي فى الفيلم 
كان طالع بدور ارستقراطي جاد 
على عكس ادواره الكوميديه التانيه 
انا شايف انه بدأ ينضج فنياً ومستواه بقى كويس 
واتمنى انه يستمر فى النوع ده من الافلام 
زي فيلم 45 يوم .. واتمنى الناس تبدأ تغير سلوكها التفكيري 
مش منطقى افلام الكوميديا بس اللى بتجيب ارباح 
فى افلام تانيه لازم ندعمها ونشوفها ..

الفيلم ده وافلام تانيه برضه معرفش ليه بتتعمد
تشويه صوره الشخصيات الليبراليه او العلمانيه 
يعني ليه دايما الشباب اللى بيمارسوا الجنس بدون زواج
بيكونوا مدمنين وحراميه وفشله ؟؟
ليه بنربط دي بدي مع العلم ان مفيش علاقه نهائي 
المدمنه علاقاتها بتكون مع هب ودب علشان المخدر 
مش منطقي انها تكون بتحب .. او يمكن افلام زمان فهمتنا كده 

جوايا خوف وصراع 
خوف من دخول علاقه جديده 
صراع نفسي باني لازم اغير نمط حياتي 
عايز ادخل علاقه جديده 
وفنفس الوقت شايل حرف بنت محبتنيش فيوم على صدري 
كانه مأساه .. او نوع من الوفاء والاخلاص لشيء لم يكن من الاساس ..
صراع لاني خلقت الوهم وصدقته .. واني عارف انه وهم وعايش فيه بمزاجي ..

بلمس ايد بنت جديده .. تحس اني عايز اوصلها احساس جوايا
وفنفس الوقت ببعت رساله SMS بقول للقديمه هابي بيرثداي 
تقولي التانيه حسيت احساس ناحيتك .. أنا آسفه 
مكنش المفروض احس كده .. احنا اصحاب .. اوعدك مش هيتكرر ..
افتكرت موقف قديم 
لما قالتلى الأولانيه انت تستاهل انسانه احسن مني 
وانا جوايا كنت شايفها احسن انسانه فى الدنيا .. لاني بحبها 
ارجع واقولها متتأسفيش على احساس جواكي 
وخايف اجرحها زي ما عملت فيا الاولانيه 
منكرش اني معجب بيها 
يمكن افكارنا قريبه بطريقه غريبه 
محتاج اقرب منها اكتر واشوف هحس بايه ..

بحاول ادي نفسي فرصه 
اخد فيها قرار 
ومش عارف ابعد خالص 
وافضل فعزلتي واطبق الرهبنه عن الجنس الآخر 
اللى علمتهالي الاولانيه ..
وابعد عن الحب لانه شيطان او عفريت 
ولا اقرب واكشف الستاره 
واشوف الصوره اللى خايف منها 
يمكن مخافش منها لما اشوفها زي دلوقتي ..
ويطلع شكسبير عنده حق ..
عموما انا هاخد قرار حاسم قريب 
واكيد لو فى جديد هتلمسوه من مواضيعي الجديده ..

النهارده انا كنت في سوق العربيات 
علشان ابيع الريتمو 
السوق ميت جدا وسمعت اسعار غريبه 
قى واحد كان عايز يشتريها بـ 12 الف جنيه !!
العربيه انا كنت شاريها بـ 21 الف تقريبا 
ويمكن انضحك عليا وبوظتها كمان 
بس مش للدرجه دي !!
خير ..

رف ان فى الفتره اللى فاتت مكتبتش كتير فى المدونه 
النهارده انا يمكن كتبت اطول موضوع فى المدونه ..
احتمال كبير مكتبش اي حاجه لمده اسبوع ونص من النهارده 
ليه اسبوع ونص .. هتعرفوا وقتها