بمناسبه الاضراب "المزعوم" اضراب 4 مايو
بعد فشل الدعوه لاضراب 6 ابريل
لقيت الناس مضربه ومعتصمه قدام الويسترن يونيون
اما بقى الناس اللى دعت للاعتصام احب اقولهم
المقطع اللذيذ من اغنيه محمد منير
ساح يا بداح .. ياسؤال جراح
"إيه اللى اتكسر .. فص اللولي ولا المرمر
طول العمر العسكر عسكر .. بس الناس
الناس كانت نااااس .. وكان الحلم قُبالي براح
ما الذي كان ومعادش وراح ؟؟"
نرجع بقى لفعل ساح يتسوح سياحتن 
وسياحتن دي بليز محدش يقولي انت كاتبها غلط
هقوله اكتب فجوجل النظريه النونيه وانت هتوصل ..
فانا كنت بشم النسيم فى بلاد بعيده
اسمها الغردقه .. نموذج مصري علماني ناجح
المهم اسيبكم مع صور الغردقه فتاني زياره ليها
واول زياره بالريتمو 
اه بالريتمو متستغربوش 
يوم 28-4-2008
طريق العين السخنه
قالولى اسمه طريق الجيش
المهم بيودي العين السخنه
دي بقى فى ملفات الزعفرانه
والعسكري فى الكمين خد 10 جنيه علشان الفاميه بالمناسبه يعني
مولدات الكهرباء من طاقه الرياح بالزعفرانه
ومحدش يقولى اننا بنصدر الكهرباء دي لاسرائيل باقل من سعرها للمواطن المصري 
دول بقى السكرتير بتاعي والتاني ده الخدام بتاعه ..
لا ياجماعه دول بدو طلعولى من الصحرا
انا والريتمو فى الكيلو 208 الغردقه
مش قادر ينسى انه شرقاوي !!
لو فى حد مش فاهم الصوره فالاخ رفعت بيعمل زي الناس
ومفيش توضيح بعد كده ..
ووصلنا الغردقه بحمد الله بعد رحله استمرت فى حدود 6 ساعات
تخللها بعض التوقفات للتصوير والتزود بالوقود وناس نسالها عن الطريق وتركب معانا غتاته ..
المهم وصلنا من هنا يدوب اترمينا من هنا واحلى نومه هنيه
علشان تاني يوم ورانا رحله بحريه اللى المياه الفيروزيه ..
صباح الخير
29-4-2008
المنظر ده كنت شفته قبل كده فموقع فليكر تقريباً
وكنت هتجنن واصوره بنفس المستوى اللى كان موجود
بس طبعاً الفرق بين الكاميرا الـ N90 والكاميرا الفوتوغرافيه شاسع
اعترف الصوره دي مش قد كده بس وانا راجع هاخدلكوا واحده احلى ..
ولما سالت الكابتن السواق بتاع الغواصه
قالى ده يخت دخل فى الشعب المرجانيه بالليل
واتخبط واتقسم نصين نص غرق والنص ده فوق الشعب لسطح المركب
وبيقولى انا بقالى هنا 7 سنين وهوه موجود من يوم ماجيت
نكمل ..
اوعى وشك ..
رفعت بيعمق العلاقات المصريه الروسيه خخخخخخخ
انا والمزه عالشمال خالص
اكيد مش شايفنا
شايفنا كويس ؟؟
كان لازم نعمق العلاقات المصريه الروسيه
وكل واحد وطريقته فى التعميق بقى
عرفتوا ليه الاتحاد السوفيتي اتهزم فى 73 ؟؟
تجربه قياده اليخت
وهوه واقف طبعاً
رفعت افتكر نفسه مصور على آخر الزمن 
بالمناسبه روسيا محاربتش فتلاته وسبعين
وانا راجع نفس الصوره
بس معجبتنيش برضه
فطلعت رحله تانيه مخصوص علشان اصورها ..
وخلصت الرحله وروحنا مهدودين
بس محمود ابن عمي مخلناش ننام 10 دقايق
قام واخدنا وطالع على كازينو فشارع فرعي من شارع شيري "الشيراتون"
واول ما دخلنا الكازينو نسينا يعني ايه نوم اساساً
خمر ورقص ونساء
واوعى وشك يا معلم المنحرفين وصلوا من بلاد الكبت
ايه المزز دي بيجيبوها منين
الحاجات دي صنع فى مصر ياجدعان .. مش معقول
اكتر حاجه شدت انتباهي ان كان فى واحد صعيدي من نجع حمادي
كل ما تطلع واحده ترقص يطلع ينقط بمبالغ وقدرها
وراه علطول الاقى اتنين تلاته قاموا نقطوا ..
شكل الصعيدي ده شغال مع بتاع الكازينو
يشجع الناس تقوم تنقط ..
ويقولك اضراب واعتصام
روحنا الفجر
فاقدين السيطره تماما على اجهزه التحكم العصبي
اموت انا فى الانحراف
صحينا من النوم تاني يوم عالمغرب
يدوب نزلنا اتمشينا فالمشايه
وكان فى واحد صاحب ابن عمي
معاه بتاع كده اسمه باتيناج
حته شبشب كده فيه كاوتشات
ام هند يعني
ده رفعت عالباتيناج
مش هنزل الفيديو بتاعي
لان في واحده من السياح
اول ما شافتني بقع
ماتت على روحها من الضحك
وانتوا طبعا عارفين اننا بتكسف وكده 
خلصنا اليوم وروحنا ننام على بكره
رحله البحر التانيه
على نفس اليخت Sea Ways
وطبعا انا حافظ اسم اليخت لان معانا Guide
كل وظيفته فى الحياه : Whats The name of our boat ??
لما كرهنا فى البووووت كله
صباح الخير
1-5-2008
جزيره المش عارف ايه
بس ايه رايكوا فى الصوره .. فنان سيبك انت
عدوها دي بقى 
أوعى حد يسرق الصور دي
وينزلها فموضوع تعبير فمدرسه اعدادي انا بقولكوا اهه 
سوري إنشاء مش تعبير انتوا مكنتوش معايا فمدرسه الفريق والسلامه
شله الأنس فى البرادايز
اوعى وشك ..
دول علشان لو مزه معجبه ولا حاجه
اكيد البتاع ده لونه ابيض !!
حد فاهم حاجه ؟؟
برغوت ناططلى فكل صوري
ايه ده
عجبتني فكره القائمه دي
بفكر اعمل واحده زيها فى الموقع الجديد
بس اهم حاجه ان كل الاسهم بتشاور ناحيه واحده
مكانوا عملوا سهم واحد وخلاص ولا هيه غتاته مثلاً ؟
العسوله الكميله أولا
اسمها أولجا بندلعوهوا ونقولوا يا أولا بضم الألف الأولى ومد الألف الأخيره
اللى يخنقك
انه قعد ربع ساعه يلبس
وفى الاخر قال الميه ساقعه ومنزلش
على فكره انا بعرف اعوم من غير اللايف جاكت ..
اه احنا متربيين فبحر اسكندريه لامؤاخذه
بس علشان الواحد يركز فى الشعب المرجانيه الرائعه
والأسماك الملونه العجيبه
لازم يتفرغ كليا حتى من مجهود السباحه نفسه !!
ولو ليكوا نصيب وطلعتوا مع نفس المرشد بتاع الرحله الاولانيه
هتلاقوه بياخد نفسه ويجري السياح وراه
ولا بيلحقوا يشوفوا حاجه
ولما يرجع يقولهم شفتوا نابوليون
وللاسف نسيت اصور المنظر اياه بتاع اليخت الغرقان ..
وخلصت الرحله
ورجعنا الزقزوقه تاني يوم الصبح
الريتمو اثبتت فعلا بعد المشوار ده انها عربيه مش اي اي
دي مدرعه يا معلم ..
والنبي ياجدعان حد يقولى لو خدت المدرعه دي حطيتها عالسطوح عندنا
الجيش يحاكمني ولا ايه النظام ؟؟
اصلى بفكر اخد نص نقل واروح اجيبها
على فكره طلع فيها فتيس غرز
وشكمان ومروحه ريداتير زي الريتمو بالظبط
وبالمناسبه احب اقول ان المرور مينفعش يسيبني فحالي ابداً
وانا رايح الرخصتين مسحوبين فلجنتين رادار !!
علشان تعرفوا ان الريتمو برضه ليها فى السرعات الغير قانونيه
وإلى اللقاء
أحدث التعليقات