مدونة أحمد هتلر

موقعى الجديد هحتاج فيه خدمه الـ SMS من خلال الويب
من اشهر الشركات اللى بتقدم Gateway للموضوع ده شركه كليكاتيل 
www.clickatell.com
المهم وانا قاعد بقلب فى الموقع واشوف خيارات الـ API بتاعهم
اتفاجئت بالإيرور ده 

الايرور فى المربع اللى عاليمين ..
وآدي آخره اللى يعتمد على سيرفرات ويندوز 
ومع ذلك فالشركه الجنوب افريقيه متصدره مواقع مقدمي الخدمه دي 
وعملائها اسامي كبيره فالايرور ده ممكن ميفرقش معايا 
بس افتكر ممكن يفرق مع ناس تانيه ..

شركه نت فيرمس لحجز الدومينات 
ودي برضه شركه ضخمه لحجز الدومينات 
وبتتميز بسعرها المنخفض للدومين com بسعر 5$ تقريباً 
وبتتميز برضه بسرعتها الخياليه فى حجز الدومين 
وتعديل الـ DNS اللى بياخد 15 دقيقه بالكتير في حين 
ان الشركات التانيه بياخد من 24 لـ 48 ساعه 
www.netfirms.com
 اسيبكم تتسلوا شويه وتكتبوا اسمكوا انتو كمان 

ومع ان دي متعتبرش ثغره بس اهو الواحد بيتسلى 
وممكن حد يقول اذا حاجه بسيطه زي دي سايبينها مفتوحه 
ماهو ممكن يكون فى ثغره تودي فمصيبه فى الموقع والدومينات تتسرق ونروح فداهيه !
ومع ذلك انا حاجز من الموقع ده حوالي 11 دومين 
ومعنديش مشكله احجز منه تاني ..

طبعاً انا مش بشجع حد على الاختراق 
بس الحاجات دي بتستفز الواحد 
وبيلاقي نفسه بيستعرض عضلاته 
ودي حاجه خفيفه كده 
وفى حاجات تانيه كتير تعتبر اسرار الواحد مينفعش يقولها

في يوم 11/4/2006

تم افتتاح مدونتي

وبكده يكون عمرها النهارده سنتين وكام يوم كده

مش عارف الواحد المفروض يكتب ايه فى مناسبه زي دي

بس اهو كان لازم نكتب حاجه للذكري

وحاجه تثبت اني قدرت استمر فى حاجه لمده سنتين ورا بعض

في مراحل متفاوته بين النجاح والفشل

مواقف متناقضه متشائمه ومتفائله

وهي دي الحياه

النهارده قاعد بجهز فى موقع بيرثدايز كاليندر او بيرثداي سوشيلايزر

ايا سيكون اسمه

لكن اتمنى انه ينتهي بالشكل اللى عايزه فى النهايه

ويستمر هوه كمان سنتين قدام

دورت الفتره اللى فاتت على حد يديني درس

لاني مش عارف اي حاجه عن الكليه

ولا عندي استعداد اروح احضر دروس او محاضرات

فالاستاذ هيجيلي البيت احسن

وعلى الله اقدر استمر معاه ..

بس كده

سلام

الخدمات المصرفيه المصريه
عنوان منمق وظريف 
وتحس كده انه هيجي وراه نقاش اقتصادي بحت بحتته متبحتتهاش حد قبل كده

نبدأ بالصوره الظريقه دي من زقزوقتي الحبيبه 
وبما ان الطوابير بقت رمز مصري حضاري 
فعدواها انتشرت من قدام افران العيش وشبابيك شئون الطلبه فى الجامعات 
لماكينات الصراف الالي الـ ATM 

الزقازيق بها 4 اجهزه ATM فقط تابعه للبنك الاهلي والبنوك الاخرى بمعدل جهاز لكل بنك.

وده اللى بيحصل دايماً عند تقديم خدمات 
بسعر مخفض للشعب ..
كلنا فاكرين المسخره اللى حصلت فى موبينيل 
صاحبه شعار المحمول فى يد الجميع 
واصبح المحمول بلا قيمه مع الجميع 
والبنك الاهلى برضه شغال الـ ATM في يد الجميع 
لغايه ما بقينا بنقف بالنص ساعه علشان نسحب 
وعلى ما توصل تكون الماكينه خلصت فلوس 
او الشبكه وقعت او انت اغمن عليك فى السكه ..
حلوه اغمن دي
طبعاً الحلول المطروحه .. الانتقال لخدمات بديله ..
فودافون في حاله المحمول او اتصالات 
اللى بدات متطفله على شبكات موبينيل (قال يعني كانت ناقصاها)
البدايل بقى المطروحه بالنسبه للمعاملات المصرفيه عندنا ايه 
ويسترن يونيون للحوالات اللى جايه من الخارج 
والمفروض اننا بندخل بيها عمله صعبه 
وبندخل بيها فلوس وسيوله من الخارج 
والمفروض نكتر من الشركات اللى بتستقبل حوالات من الخارج 
بدل ماحنا عمالين نشتري عربيات زيرو ونطلع الفلوس بره 
ويسترن يونيون ماقولكوش على الزحمه اللى بتبقى فيه اوقات الاعياد مثلا 
وكتير جداً السيستم واقع .. ودي طبعاً مش فايد ويسترن يونيون 
دي فأيد شبكه اتصالاتنا الحلوه جداً جداً والنت السريع جداً جداً ..

من تلت ايام كنت فى البريد فرع الزقازيق الرئيسي 
حواله جايالى من القاهره 350 جنيه 
العميل باعتلي صوره من ايصال التحويل 
اروح الفرع مفيش حواله بالاسم ده 
لسه موصلتش ..
امال هيا حواله كمبيوتر فوريه سريعه على اساس ايه
بلغت العميل وراح الفرع واداني موظفه من الفرع اللى حول منه تكلمني 
صحوني من النوم .. بتقولى انت متاكد انك رحت فرع الزقازيق الرئيسي ؟؟
اقولها ايه دي .. يا ماما هما فرعين فى الزقازيق اساساً ..
النهارده بقى جايلي حواله 850 جنيه من اسكندريه عالبريد برضه 
اروح الساعه 2  الاقي الشبكه واقعه من الصبح 
والموظف واخد بطايق قد كده من العملاء 
ياحلولي ياخويا انت وهوه ..

طبعاً العربيه عند السمكري متفككه خمسميت حته 
علشان يصلح الشاسيه من قدام .. معوج من يوم حادثه نفق الاوبرا 
اللى زاويه الدوران فيه 90 درجه
رحت اسحب فلوس من ATM الاهلى اللى عند النقابات 
الماكنه بتطلع فلوس لواحد وعشره لا 
وانت ووشك الحلو وحظك ..

بالمناسبه انا من اسبوع تقريبا كنت فى القاهره 
انا بعت موقع سمعنا بمبلغ 10 الاف ريال تقريباً 
المهم رحت القاهره علشان اقابل الشخص اللى هسلمه البيانات 
واستلم المبلغ .. الحواله المفروض توصل على الويسترن يونيون 
الاخ اللى بيحول لقى التكاليف هتبقى 100$ تقريباً 
قام محولهم على خدمه اسمها سبيد كاش 
طيب فين ياعم سبيد كاش دي قالك فى البنك الاهلى المركزي 
نروح البنك الاهلى الفرع الرئيسي الساعه 2:05 يقولك قفلنا 
تعالى يوم الحد وعليك خير ..
اولا البنوك المفروض تفتح لفتره اطول من كده 
وتفتح طول الاسبوع .. زودوا الموظفين اقسموهم صباحي ومسائي 
المهم تتصرفوا .. قدموا الخدمه ان شالله تاخدوا مصاريف اضافيه ..
انما يبقى مفيش خالص اي حلول ده اسمه غباء وتعطيل للشغل لا مؤاخذه ..

وبكده اتمنى ان رسالتي توصل لوزاره الاستثمار 
ولاي حد مهتم باقتصاد البلد دي ..
احنا عندنا فمصر شريحه من المبرمجين والمصممين واصحاب المواقع 
اللى دخلهم مش شويه وبيدخلوا للبلد مبالغ لا يستهان بها 
ولازم تراعوهم علشان يتقدموا ويتطوروا 
احنا ممكن نشتغل مع العميل المصري 
بس احنا يهمنا ندخل دخل للاقتصاد القومي .. نضيف للميزان الاقتصادي .. فساعدونا ..