مدونة أحمد هتلر

أولاً كل سنه وانتوا طيبين ومن اللحمه مانتخين ومتنفخين 
ثانياً عزائي لكل عملاء سنترال شرق الزقازيق اللي زي حالاتي مبضونين 
قبل صلاه الفجر يوم الوقفه 
حرامي روش طالبه معاه ينتقم من الحكومه ويثبتلهم انهم بقر 
ويستاهلوا يدبحوا على العيد 
او الظاهر كان بيلم العيديه 
لتالت مره ينط على السنترال 
ويسرق الكابلات اللى موصله دسلامات النت بداخل السنترال 
سيادته مسابش سلك مقطعوش 
وفصل كل شركات الـ DSL بشرق الزقازيق 
من أول تي اي داتا (فرست كوم) ولينك دوت نت وغيرهم 
ماعدا شركه ايجي نت لانها لسه صغيره فالسلك بتاعها صغير فاستخسر يسرقه 

والشركات ولاد الكلاب بقالهم خمس ايام من يوم الوقفه للنهارده كل يوم يقولوا بنصلحهم بعتنا نجيب كابلات جديده 
والنت فاصل عن نص الزقازيق بسبب حرامي متخلف خد النحاس يسيحه 
او صراع بين شركات على العملاء الله اعلم 
المهم العملاء الضحيه فى الاخر 
النت يقعد فاصل 5 ايام ولاد الكلب 
والواحد شغله متعطل بسبب تخلفهم 
الداتا سنترز بره الداون تايم بتاعها بيبقى دقايق 
ودول 5 اياااااااااااااااااااااااااام الله يلعنهم 
ومقعدين اتنين عساكر متلحفين ونايمين 
يحرسوا اتصالات نص الزقازيق 
سنترال حكومي بيخدم نص مدينه عدد سكانها مليون بني ادم 
حرامي يدخل يسرقه تلت مرات فى شهر واحد 
ومش عارفين يمسكوه ؟؟

الاسبوع اللى فات ده كان فيه تطورات كبيره 
على المجال الشخصي والمجال الويبّي (*نسبتن للويب )
* نسبة بعد تطبيق النظريه النونيه ..

نبداً بالمجال الشخصي 
هناك تغيرات حدثت فكريه وماديه 
مش هقولكوا هيا ايه كفايه تعرفوا ان في تغييرات للافضل

اما بقى في مجال الويب 
فكان لموقع سمعنا للأغاني نصيب كبير من التعديلات 
تتلخص في :
1- البومات جديده : مي سليم - منيب هيتس 2 -  خالد سليم - أحمد فهمي – عبد الهادي حسين - فطومه  
2- خريطه للموقع : Site Map
3- رابط تغذيه RSS لمعرفه احدث الألبومات دون فتح الموقع.
4- التصفح السريع حيث يمكنك الاستماع لاي اغنيه لاي مطرب فى نفس الصفحه 
اي ان الموقع ككل تم تلخيصه في صفحه واحده

اما بخصوص سكربت أدب فقد تم وضع اعلان مدفوع بسوالف سوفت 
لمده اسبوع مع عرض خاص تخفيض 100 ريال على النسخه المتكامله .
رابط الموضوع : سكربت أدب بسوالف سوفت

بحبك فسينا وفمارينا البحور 
بحبك على سطح وفعشه طيور 
بحبك يا مصر
يا قصر القصور ..

هتيجي سوسن وتقولى 
ان اللى فوق ده اسمه سجع 
وانا اقولها ان اللى اعرفه ان الدنيا 
سجعه جوي جوي يا بت يا بهانه

في يوم الثلاثاء 27/11/2007
توجهت 3 قطع بحريه تابعه للقوات المسلحه المصريه 
وعلى متنها قوه عددها 250 فرد 
الى جزيره القرصايه بالمنيب التابعه لقسم الجيزه 

الفيديو من مدونه مراقب مصري

قام الشباب بحفر قبورهم مهديين بالانتحار الجماعي وعدم ترك جزيرتهم "للاحتلال" 
ويقال ان هناك تخطيط لتحويل الجزيره لمشروع سياحي وهناك رجال اعمال يسعون وراء امتلاك الجزيره 
كل هذا .. لا استطيع ان افهم منه سبب تدخل القوات المسلحه ؟؟
الجيش المصري الذي يجب ان يكون درع هذا الوطن وحاميه 
يتدخل ابنائه الذين هم ابناء هذا الشعب 
فى التهجير القسري لسكان هذه الجزيره باي صفه حق 
ولماذا تم التعتيم على هذه القضيه 
واوامر عليا لمنع النشر عن الحدث فى الجرائد والصحافه ..
نحن هنا لا احد يفرض علينا منع النشر 
سأنشر واتمنى من كل المدونين ان يقوموا بالنشر 
مقطع اخر يظهر الاشتباكات بين السكان والجيش 

هل للجيش صفه دستوريه تسمح له بالتدخل بهذا الشكل المهين للمواطنين 
وهل يحق اهانه صوره القوات المسلحه بهذا الشكل امام الشعب 
القوات المسلحه يجب ان تظل رمزاً لكرامه هذا الوطن 
لا ان تكون جهه مكروهه من الشعب 
كوزاره الداخليه التى تنبعث منها الروائح النتنه من الحين للآخر ..
اتمنى ان ينشر الجميع هذه الفيديوهات 
لكي نصعد الامر فلا يجب ان نسكت عن حق هؤلاء الفلاحين 
ولا ان نسكت على اهانه صوره الجيش المصري ..