مدونة أحمد هتلر

عندما تقوم بفعل شيء لم تقصد القيام به 
وتتظاهر بانه بالضبط ما تريده وتبنى رد فعلك على نفس الاساس 
يجب ان يكون لديك تاكد من ان رد الفعل للوضع الجديد سيكون افضل بكثير من الوضع الاول 

حد فاهم اي حاجه ؟
افهمكوا انا النظريه العجيبه بتاعتي 
انا راكب العربيه فى امان الله 
داخل الشارع بتاعنا 
لقيت واحد حاططلى عجله فنص الشارع 
ومن غير ماخد بالى لقيت العجله واقعه على الارض 
نزلت الزجاج وقلتله بلهجه صارمه 
متبقاش تحط العجله دي فنص الشارع تاني 
الراجل كان متوقع انى اقوله معلش انا اسف اى نوع من الاعتذار 
وده فعلا اللى كان اى حد هيعمله 
بس انا لقيت ان شكلى كده هيكون احسن 
لمجرد انى لقيت مبرر للى عملته ومبرر منطقي 
وان كان فيه تعسف بس هيدي انطباع انى قاصد اعمل كده 
ودي قرصه ودن المره الجايه هكسرهالك تحت الكاوتش وبتاع 
مش انى مبعرفش اسوق ومخدتش بالى ولو كان عيل صغير برضه كان زمانه اتخبط ..

المهم .. ابقوا خالوا بالكوا وانتوا سايقين ومتقعدوش بنات فى الكنبه اللى ورا ..

انا فكرت فى الموضوع ده بصراحه
بس دائما الموضوع مكانش آمن أبداً ..
الحل ده اكتر من رائع 
لا وكمان موفر بنزين ..

نيابه عن جيلي
جيل الشباب المنحنى ظهريا
والغير لائق طبياً
والمتراخي عضلياً
ندعوكم للمشاركه معنا فى عمل قومي
ليكون علامه لنا فى تاريخ الامه المصريه 
يا ابناء جيلي ..
مواليد الثمانينات والتسعينات والميات ..
تبرعوا معنا لهدم السد العالى ..
باقى من الزمن 390 يوم ..

وصوتي يام فاروق  

فايق عليّ 
احنا اللى كنا بهيك العليّه 
ونبقى نقعد بالقناطر وقت الشتويه 
فايق عليّ ..

احساس جميل قوي الاستماع لصوت فيروز 
وتنشق نسمات الهواء المحمله بعبق البحر السكندري 

من زمان وزمان .. نحنا كنا جيران ..
سوري .. قصدي من زمان وانا مبكتبش حاجه جديده 
لا واللى يغيظ انى بدخل المدونه 
كانى زائر .. مش انا صاحب المدونه دي برضه ؟؟
بدخل اقرى المواضيع واضحك لغايه ما اموت من الضحك 
افتكر ذكريات جميله جدا وايام خوالى ..
بقالى فتره حاسس انى مش انا 
بقرى كلامى كانى اول مره اقراه .. مع العلم بانى انا اللى كاتبه
دقني طولت .. مفلس (باعتبار ان الـ 60 جنيه الى فى الكريديت = 0)
روزي صحيت وجايه بتجرى عليا 
نطت على الكيبورد 
داست باك اسبيس ومسحت كل اللى كتبته 
منك لله ياروزي 
اه روزي دي القطه بتاعتي واللى اهداها لى احد اصدقائي 
عموما هنكتب تاني علشان عيونكم ..

ملاحظ انى مفتقد الكمبيوتر 
ان العربيه بدات تسحب بساط الاهتمام من تحت رجليه 
حد فاهم حاجه ؟
اخر مره لمست فيها كيبورد من اسبوعين 
مع انه مينفعش يعدي يوم من غير ما اركب العربيه وافرك بيها فركتين 
وبمناسبه العربيه 
فهيا عطلانه ومرميه تحت البيت فى الزقازيق 
لانها محتاجه مروحه ريداتير بـ 175 جنيه 
ومش عارف ايه كده فى الدينامو لانه مبيشحنش 
كان شيء متوقع من عربيه ريتمو انها متستحملش الافترى بتاعي 
شخص بيعشق السفر ومعاه عربيه 
كل يوم اسكندريه ومنها لمارينا ومنهم للزقازيق وبعدين اسماعيليه 
يبقى لازم العربيه تنتحر 
مع انى لسه مغيرهلها ماتور وفتيس والكهربا والفرش ووو.
مع العلم انها مبقالهاش معايا شهرين 
ومش منطقى اغير ماتور كل شهر طبعا ..
فقررت التخلص نهائيا منها والحصول على سياره دفع خلفى 
ولكن القرار سيظل قيد الانتظار قليلا لاسباب غير معلنه ..

من كام يوم كنت انا وعاصم فى المزرعه الخاصه بنا 
الارض مساحتها 10 فدادين ومزروعه فول سوداني 
وللاسف المياه فى منطقه الانطلاق على طريق الاسكندريه القاهره الصحراوي 
غير منتظمه .. فهى متوفره وحسب اقوال العمال مرتين كل 10 ايام 
والفول السوداني يروى لدينا بنظام الرش وهو يحتاج لوسط رطب بنسبه 40% تقريبا 
وربنا يعوض علينا ..

بنفكر انا وعاصم نعمل مزرعه تعليف ونستقر هناك السنه دي لغايه ما نقرر هنعمل ايه 
بس الموضوع لسه قيد التخطيط …
وانا راجع انا وعاصم من المزرعه 
طلعنا على الصحراوي 
وفى الكيلو 104 لقينا كمين فى الاتجاه للقاهره 
وطبعا الاخ مدمن التفييم لسه مفيم 
واتسحبت رخصه العربيه بس والحمد لله ..

الواحد مش عارف يعمل ايه ..
كنت من كام يوم بقرى روايه للجيب من بتوع ادهم صبري 
وبعد ما وصلت للصفحه 130 اكتشفت انى قريتها من 5 سنين تقريبا 
كنت مخنوق قوى من الزهايمر اللى جالى ده 
الروايات دي كان ليه دور رائع فى تنميه حب القراءه عندي 
وتنميه روح الانتماء وحب الوطن فى نفس الوقت 

والى لقاء قريب
من مدينه الخمر والنساء يكتب لكم هتلوور …

تنص على ان 
الانسان ماهو الا جردل بلاستيكي فارغ
يهتز من اقل مؤثر بجواره 
ويمكن بحجر صغير تثبيته 
حتى يمتليء 
واذا امتلىء جوفه 
لن يتمكن نفس الحجر من تحريكه ..

هتلر بيخرف يا جدعان معلش….

بيقولوا الدوله وبعد ان لاحظت الهجوم الشرس من المواطنين على المناطق الساحليه
وفي روايه اخرى وزير البيئه لقى زحمه فبورتو مارينا جنب الشاليه بتاعه 
فطلع لنا تحذير هام ينص ويتلت ويربع على ان التعرض للشمس يصيب الانسان باضرار فى العين 
ومسببات للسرطان نتيجه لوجود معدل مرتفع من اشعاعات مش عارف ايه الخطيره فى الجو 
ودي بقى منبعثه من الشمس ..
انا بقترح يدوا الشمس اجازه التلت شهور دول على ما الصيف يخلص ..
طبعا انا بهرج .. سيادته مالوش دعوه ومينفعش نطبق نظريه المؤامره على الشمس نهائياً ..
تقرير بيئي عالمي بيقول انه علشان طبقه الاوزون ترجع زي ما كانت لازم توقف الدول العظمى مصانعها 
لايقاف انبعاثات المواد التى تسبب تآكل الالطبقه .. لمده 55 سنه ..
انا عندي اقتراح احلى 
يطلعوا يعملولها لحام بنظام الخابور .. ولا هيا مش تيوبلس برضه ؟

كده الهوا باظ 
نيجي بقى للميه ..
وحواراتها اللى مبتخلصش 
كلنا عارفين ان المصدر الوحيد او الكبير للميه فمصر هوه النيل 
ومع ان الميه زي الزفت وكلها حمير وزباله وبلهارسيا وكلور 
الا ان دي كمان مش هنلاقيها 
فى مناطق كتير اتعودت على ان الميه بتشتغل ساعات محدده فى اليوم 
او ايام محدده فى الاسبوع 
يخوفى لا تبقى الميه على التموين بعد كده 
اللى اعرفه ان مصر ليها نسبه كبيره من النيل حسب الاتفاقيه اللى كانت معموله مع بريطانيا 
من قرن من الزمان …
الا ان دول حوض النيل الاخرى بدات تشتكى من قله نصيبها ومنسوبها 
السودان شويه .. و كينيا وبكين وتل ابيب كمان شويه ..
ايه اللى جاب بكين فى افريقيا اصلاً ؟
تنبيه وتحذير طبي هام 
يمنع منعا باتا حفظ المياه المعقمه بالكلور (بتاعه الحنفيه) فى عبوات مصنوعه من ماده البلاستيك 
لانها تتفاعل معها مكونه مواد تسبب السرطان على المدى الطويل 
وينصح باستخدام عبوات زجاجيه ..
ميجيش حد زكي يقولى اشمعنى الميه المعدنيه بتتحط فى بلاستيك 
اقوله لان الميه المعدنيه بتتعقم بالاوزون ومفيهاش الكلور اللى بيتفاعل كيميائيا مع البلاستيك
المهم ..
كل واحد يلحق يحفرله بير ويبيع ميه معدنيه 
معقمه بالاوزون ..

موقف غتيت حصلى امبارح 
واقف على الكورنيش بتاع اسكندريه بغير الاغنيه فى الام بي ثري فى العربيه 
الساعه 4 الفجر
راكن فى اماكن الباركنج اللى على اليمين دي 
والاقى عسكري واقف على الباب بيقولى الرخص 
يابني حل عن دماغى 
المهم خد الرخص 
وعايز غرامه 25 جنيه 
قلت ماشي امري لله 
بدل ما يسحبوا الرخص 
واروح ادفع 150 جنيه رشوه علشان اجيبها من الزقازيق 
بعد ما خدت الرخص والونش مشي ببص فى الوصل لقيت مكتوب عليه
مرور الاسكندريه - مدرسه تعليم القياده 
مش عارف ليه حسيت اني اتنصب عليا 
مدرسه تعليم قياده ايه بس ؟؟
يلا مش مشكله 
ممكن رشوه بشكل قانوني ..
اللى يغيظ بقى ان مكان البارينج للتاكسي والسيرفيس بس 
طيب والملاكي لا ليه ؟؟

خبر من الزقزوقه 
بيقولوا سنترال الزقازيق ولّع واتحرق ونوني شمت شياط السنترال من عندهم فى البيت 
وبيقولوا كمان ان الانترنت هيفضل مفصول لمده شهر تقريبا 
ودي بركات مدير الامن الجديد 
اللى مرقص البلد على واحده ونص ..

نلتقي قريبا تاني ..
سلامي .