مدونة أحمد هتلر

فى اسبوع واحد نزل اكتر من البوم
الواحد مش عارف يسمع مين ولا مين 
البوم نجوى كرم الجديد هيدا حكي 
ونزل وراه البوم انغام الجديد
ووراه بقى البوم حبيبه قلبي نانسي عجرم الجديد شخبط شخابيط
ربنا يعينكوا …

تنويه هام جدن جدن (اللى هيقولى بتتكتب جداً يبقى انسان معندوش انتماء
 للنظريه النونيه (نسبتن لنوني)) ..
التنويه بقى بيقول ايه 
ليس المقصود باسم الزمالك نادي الزمالك الكروي المصري 
نقصد هنا جزيره الزمالك التى تقبع فى وسط نهر النيل المصري الخالد بمنتصف مدينه القاهره 
وحبايبنا المصريين الذين يقطنون خارج القطر القاهري 
يمكنك ركوب تاكسي من امام محطه رمسيس هيقولك 13 
قوله هما 10 واعرف انك منصوب عليك فى 3 جنيه 
على اقل تقدير 
اللى غاظني بقى ان الراجل الى قالى تاكسي 
واتفقت معاه طلع عربيه بيجو بيضاء 504 ملاااااكي 
وانا اللى كنت عايز اركب تاكسي العاصمه الا انى ملقيتوش قدام محطه قطارات مصر 
مش عارف ليه اعتقد ده مكان حيوي والمفروض تتواجد قدامه 3 عربيات على اقل تقدير 
لما سالت عسكري من اللى قدام المحطه قالى هما بيجوا فى مواعيد القطارات بس ..
هنرجع تانى لتاكسي العاصمه ده ..
نزلت قدام فندق ماريوت 
وهو فندق رائع يطل على النيل 
كنت رايح اقابل عميل كويتي اسمه على 
كانت اول مره فمصر الاقى جهاز السيكيورتي اللى على البوابه شغال 
كانوا حاطين واحد فى محطه القطر بس طبعاً منظر وبس 
حتى فسيتي ستارز مالوش اى لازمه بعدي بالمفاتيح والموبايل عادي جداً
ونفس الكلام فسان ستيفانو مول 
* دي ثغره امنيه من الممكن ان تستغل للاخلال بالامن القومي المصري وكان يجب التنوبه لسدها
المهم طلعت الموبايل والمفاتيح ودخلت 
اتصلت بعلى قالى انا فقاعه القمار 
قلتله افندم .. متوقعتش اني اسمع الاسم ده نهائياً
لاني حسب معلوماتى القانونيه البسيطه ان القمار ده من الالعاب الممنوعه قانوناُ
لكن كله يهون فى سبيل السياحه 
طلعلى فى الريسبشن وطلعنا على كافيه جنب البسين بتاع الفندق 
تشربوا ايه << السيرفس 
نسكافيه لو سمحت << أنا 
بيره << الحج على 
ايه ده ياجدعان علني كده 
مش مشكله اشرب بيره ياعم مش بفلوسك 
البنات اللى فى السيرفس لابسين يونيفورم جامد جداً بفكر اتجوز واحده من هناك 
فى كثافه بسيطه جدا من السياح العرب 
الاغلبيه من الانجليز .. خخخخ 
ايه اللى جاب القلعه جنب البحر ؟؟
فى واحد عمال يغني قريب مننا .. 
مش شايفه بس صوته بيفكرني برفعت لما بيغني 
المهم خلص اللقاء وكانت الساعه 12 تقريباً 
وكان لازم اتوجه لعبود والمصيبه ان يوم الخميس بيبقى زحمه رهيبه فى البيجو 
ومفيش قطار متوجه للزقزوقه فى الميعاد ده 
لقيت تاكسيات عاصمه كتير قدام الفندق 
قلت اخد واحد لعبود 
ركبت  .. موقف عبود لو سمحت 
هاخد عشرين جنيه 
وكان جردل ميه مش ولا بد اتدلق عليا 
مش من المبلغ الخير كتير والحمد لله 
لكن ان اخر حاجه كنت متوقع اسمعها من سائق تاكسي العاصمه الجمله دي
اعتقد ان تاكسي العاصمه اتعمل اصلاً علشان يشتغل بعداد 
قلتله مش المفروض انك تشغل العداد ؟
قالى لا هاخد 20 جنيه 
قلتله شكراً ونزلت 
وحلفت مانا راكب تاكسي العاصمه
الشركه كانت كاتبه رقم التاكسي على العربيه من ورا 
بس للاسف مش كاتبين للشكاوي اتصل بـ 999999 ؟
مش عارف ليه 
تاني حاجه المفروض يبقى فى رقم للاتصال بيه من خلال الموبايل 
هجيب تليفون ارضي اتصل بيه ازاى انا التاكسي لما اعوزه ؟؟
ركبت تاكسي عادي لرمسيس بـ 8 جنيه 
ومن هناك ميكرووووباص بـ 1 جنيه 
قال ايه تسعيره موحده .. 
حاجه تغيظ 
والتاني عايز عشرين جنيه 
ده انا باجي الزقازيق بـ 4.5 جنيه من عبود 
عبيط ده ولا شكله كده ؟؟

صحيح انا كان عندي امتحان احوال شخصيه لغير المسلمين في اليوم ده 
الحمد لله اللجنه كانت كويسه جداً بالنسبه للي قبلها 
الله ينتقم منها .. المراقبه مش اللجنه ..
كل خمس ثواني معيد معدي 
ايه ياجدعان هو انا سبت الهندسه ليه الا علشان الغتاته دي 
بيشوشروا على ذهن الواحد والله

وسلامي ..