مدونة أحمد هتلر

ايوه انا النهارده بقيت 20 سنه
ناس توقعت انى اكبر من كده
بس نو بروبليم ..
السنه دي طلعت رخصه القياده وده فحد ذاته انجاز فى الزقازيق ..
حطيت سكربت طرب على مواقع كبيره زي طرب قطر & طربز 
عملت اول موقع اغاني ليا سمـ ع ـنا 
حولت مدونتي لورد بريس 
نقلت مواقعي من ريسيلر لـ VPS (الله يرحم ايام جيوسيتس ولايكوس)
تقدمت كتير فى الـ php 
حققت دخل مادي اكبر من السنه اللى فاتت (اللهم لا حسد)
بخلص امتحانات تانيه حقوق دلوقتي 
وحاجات تانيه كتير تابعتوها معايا يوم ورا يوم على المدونه 

انا قاعد فانترنت كافيه اسمه فري ميل 
ماسك الشيفت دلوقتي واحد اسمه حافظ 
انصحكم متدخلوش السيبر وهوه الى موجود 
الاخ فاكر نفسه مطرب 
كل يوم يجيب صداع للى قاعين باغنيته اللى مغنيها
ومسجلها على الكمبيوتر ويشغلها و يقعد يغني 
المصيبه انها اطول من 10 دقايق 
انا حاسس انه هيجي يوم واتهور عليه 
بس اعمل ايه بقى مفيش نت فى البيت 
حسبي الله ونعم الوكيل ..

اسيبكم مع محمد منير امبارح كان عمري عشرين
تحياتي

اتخجلين لكونك أنثى
أم لاني صنعتك انثى بكلماتى ؟
اتخجلين مني
ام من جسدك بين سطور كتيباتي ؟
اتخجلين فعلا
لم ارى اوقح منك فى حياتي !
اتخجلين انتِ
وما معنى الخجل مولاتي ؟
أهو خجل ؟
ام ستاره للحماقاتِ ؟
كونى خجلى ..
فما انتى الا عصفوراً فى سماواتي ..
لو خجلتي
لاقنعتك انك بدون سوءاتِ ..
لاغلقت عينيك
لتنعمي كفراشه بين جناتي ..
أسعيده ؟
انا الهك وانتى احدى عبيداتي ..
كوني كابليس
ارفضي لى السجود
اعصيني
تمردي
ولكن .. لاتنسى عذابي
فبحرف واحد
سأقتلك مولاتي

اللى هكتبه ده حصل يوم الجمعه اللى فاتت 
اليوم بدا الصبح وحسب اتفاقى مع خالى حسام انه هيوديني بعربيته سوق الجمعه بتاع العربيات اللى فى مدينه نصر 
خالى صحي من النوم متاخر عن ميعادنا بساعه كطبيعته 
مشينا الساعه 9 من الزقزوقه مرورا ببلبيس عبرالطريق الصحراوي وصلنا القاهره 
غلطنا ودخلنا الدائري من عند مدينه السلام 
ومشينا 20 كيلو زياده مرورا بالهرم وعودتنا للدائري عند صقر قريش وعدنا للاوتوستراد ثانيه 
مشينا من عند القلعه ودخلنا مدينه نصر اخيرا ومن جنب النادي الاهلى يمين 
وانطلقنا لغايه ما وصلنا للسوق بعد عناء 
كنت متوقع اني هلاقي 500 عربيه بالكتير 
وهلاقي من العربيه اللى بدور عليها 5-6 عربيات هنقى منهم واحده على قد الامكانيات واروح 
طبعاً انا عامل حسابي على 12-13 الف جنيه محوش منهم 8 من شغلى والباقي تبرعات من الست ماما 
لان الحج بابا من باب العقوبه قرر ايقاف الدعم المادي لي نهائياً وحرماني من منحه شراء العربيه 
بعد ما كان اصدر فراماناً منذ سنتين باني لو نجحت سنه اولى هيجيبلى عربيه 
وكان القرار متوقف على حصولى على رخصه القياده وكانت عقبه صعبه فعلاً 
اصعب من نجاحي صراحه فى الكليه 
نزلنا من العربيه 
امامنا ما يقارب 5 الاف عربيه 
منقسمين على جزئين 
يفصلهم الطريق
على اليمين عربيات اقل عربيه فيهم بـ 35 الف جنيه 
وهم الكميه الاكبر تقريبا 5 اضعاف الكميه اللى على الجانب الايسر 
طبعاً اكتشفت فعلا ان مصر جمهوريه فقيره 
وان الناس مش لاقيه تاكل للاسف
وانى انا غني جدا 
فقلت اروح بقى للعربيات اللى على قدي ومناسبه للمستوى الاجتماعي بتاعي المرتفع طبعاً
عديت الطريق 
تقريباً 200 عربيه فيات 128 اللى بكرهها كره الانسان النائم للناموس 
واقل عربيه من النوع ده بـ 17 الف جنيه 
انى ادور على عربيه فى المستوى بتاعي مش لاقي 
ايه ياجدعان ده 
المفروض اننا كمصريين غلابه وعربياتنا على قدنا زي ما بتقول جرايد المعارضه 
يعني لما اعوز عربيه بـ 12 الف جنيه الاقي 
اتاكدت من ان الجات جت زي ما بيقولوا وان الجنيه اصبح لا قيمه اقتصاديه له للاسف 
وان يدوب الـ 9 الاف جنيه دول اروح اجيب بيهم موبايل N95 واجيب بالباقي كروت شحن علشان اكلم نوني 
انا كنت بدور على عربيه فيات 124 سبور 
مع ان الناس كلها نصحتني اني ابعد عنها 
الا ان العقليات دي مبررها الوحيد للبعد عنها اني مش هعرف ابيعها بعد كده 
وكلهم قالولى هات 128
مع ان الـ 128 جر امامي الـ 124 سبور دفع خلفي يعني اعطال اقل ثبات امكانيات رياضيه اكتر 
الـ 128 لما بتتنطط بتبقى 1300 سي سي الـ 124 سبور 1800 سي سي يعني الانسر غلبانه جنبها
اما بقى بالنسبه لقطع الغيار فهى متوفره حسب اقوال ناس عندهم عربيه اختها 
ده غير انها عربيه مميزه وشكلها شبابي جدا 
العيب الوحيد اللى انا شايفه انها هتستهلك بنزين كتير 
بس مش مشكله ..
وهنا يتضح لنا غباء العقليه التسويقيه اللى بتحدد لنا اسعار السيارات فى مصر 
وعجبي ..

قمه الديموقراطيه فى الوطن 
ان يقرص الناموس سياده الرئيس 
مثلما يقرص الشعب 
اذا كنت رئيساً وقرصك الناموس 
فاعلم ان شعبك يعيش عصر ذهبي ديموقراطي ..

أحمد هتلر فى حاله تجلي ..
بعد ما الناموس صحاه من النوم

الحكايه بدأت لما جيت اركب سكربت انفايت 
السكربت ده وظيفته انه بياخد ايميل وباسورد الزائر ويبعت رساله للكونتاكت باسمه 
تدعوهم لزياره الموقع 
طبعاً انا كنت عايز هعدل عليه تعديل بسيط بحيث يخزن الايميلات بدل ما يبعتلهم 
لان الارسال الكتير من السيرفر بيعتبر "سبام" رسائل مزعجه محرمه دولياً 
المهم لقيت السكربت .. قريت معاه انه محتاج CURL ومحتاج SSL 
بدور على شرح لتركيبهم لقيت فموقع سوالف شرح فرد كده رحت جربته فى السيرفر 
وكانت النتيجه السيرفر وقع لمده يومين 
واحمد منسي جري ورايا فى الشارع 
والناس تتصل المواقع فيـــــــــــــــــــــــــــــــــــــــن ؟
يا جماعه ده انا كل اللى عملته ابديت للسيرفر 
واتاريني بهدلت الاباتشي ومحرك البي اتش بي بالكامل وكل الموديلز اللى كانت راكبه على السيرفر اتفرتكت 
المهم بعد ما اشتغل السيرفر بعت رساله للدعم الفني بقولهم يشغلوا الـ CURL والـ SSL هما 
ردوا قالولى

لكي يكون موقع سمـ ع ـنا متميز ومنفرد دائماً 
تم تجهيز الموقع ليكون اول موقع اغاني عربي يتم فتحه بنطاق باللغه العربيه 
يمكنك الآن تصفح موقعنا عبر الرابط

http://www.سمعنا.com

وانتظروا المزيد من المفاجات ..

قاعد فامان الله 
لقيت النت قام فاصل 
مسكت الموبايل اتصل بمدير الشبكه اللى موصل منها 
الموبايل مقفول .. يمكن موبينيل اللى مقفوله النهارده

قعدت ادعبس شويه فى الجهاز 
برمجت شويه على اللوكال هوست 
وفى النهايه زهقت 

دعبست فى وصلات البلاي ستيشن لغايه مالقيت وصله تنفع 

قمت جايب المقص وعامل وصله بطرفين وموصلها بالكمبيوتر فى كرت الشاشه

وفى التليفيزون فى مدخل الصوره (المفروض لونه اصفر بس انا معدله بمزاجي )

فى مشكله دلوقت
الصوت … دخلت دعبست فى كراكيب ايام الاختراعات المتوليه 
تحت السرير فوق الدولاب .. لقيت الكابل اللى بدور عليه اخيراً
قمت موصل ومشغل 
توقعت انفجار كبير بس ربنا ستر واشتغلت شاشه الدوس السوداء

وبعديها علطول شاشه نانسي الشقراء

بحبها قوى البت دي
بدا تدشين العمليه بشويه قله ادب

آه يا سافل يا أنا
وبعدين قلت ندخل بقى على الكليبات وكان لازم ابدا بالدويتو الفرنسي الشهير اللى بعشقه 
لإكليمونس وماونير .. المشكله ان محدش فاهم اي حاجه من الكليب ده مع انه بسيط جداً

شويه موسيقى عربيه .. مع رفع للصوت بطريقه مجنونه شويتين 
مما ادى لان بعض الجيران رموا نفسهم من البلكونات 

وبعدين توجهت مباشره للعبتى المفضله (من ايام ثانوي) مع ان مش من هواه اللعب 
Need For Speed - Under Ground 

وفي النهايه 
ملاحظه لمن هم دون الـ 21 سنه محدش يجرب يعمل اللى عملته ده الا اذا كان فاهم هوه بينيل ايه 
او اذا كان عايز يضحى بتليفزيون توشيبا 32 بوصه وكارت شاشه ازوس 512 ميجا