مدونة أحمد هتلر

انا منطلق بعد دقايق ورايح الاسكندريه
مش عارف ليه حاسس احساس غريب المره دي
احساس بيقولى مسافرش .. ومعرفش ايه اللى جاب اغنيه خليك هنا خليك على دماغى .. عموما لو جرالي حاجه ياحمد يا منسي وصيتك المدونه يا ولدي ..
عمومأ انا بكتب الكلمات دي من عند محمد عوف فى البيت لان الابلود على الشبكه بتاعني منتحر من كام يوم ..
كنت برفع كام اغنيه وطنيه لموقع سمـ ع ـنا بمناسبه عيد تحرير سيناء ..
الاغاني اللى رفعتها

هتلاقوهم هنا www.sm3na.com

محدش يتخض من صوره السادات ..
ويلا سلااام

نظراً لضيق الأفق التدويني العربي وقله تنوعه مقارنه بنظائره الغربيه
ونظراً ايضاً لقله متابعي حركه التدوين العربيه بالرغم من كثره عدد المدونين فى الفتره الأخيره
فانه يصبح سهلاً جداً ان يصبح المدوّن بقليل من التميز والإنفرادات مشهوراً فى الساحه التدوينيه
لا اتكلم هنا عن المدونات التى تسلك مسلكاً سياسياً فقط وان كان لها الصدى الأكبر بين المدونات المصريه خصوصاً
وذلك للدعايه المجانيه التى تقدمها لها القنوات الاخباريه الفضائيه "الحره" .
لقد عرفنا فى الفتره الأخيره الكثير من المدونين والذين أثاروا جدلاً كبيراً ونقاشاً واسعاً فى عالم التدوين العربي .
وايضاً فجروا قضايا قانونيه .. وبعضهم جرته مدونته الى السجن ..
على سبيل المثال المدون عبد الكريم نبيل سليمان صاحب الفكر الإلحادي والآراء الرافضه لفكره الديانات عموماً .
وفي الأيام الأخيره ظهرت لنا المدونات بنجم جديد
والنجم هذه المره من اعضاء جماعه الإخوان وهو عبد المنعم محمود 
هذا كله غير بعض المدونين النشطاء والذين تواجدوا فى الساحه مبكراً كمدونه علاء ومنال وأيضاً مدونه وائل عباس .
كل هذه المدونات تم نشرها واصبح اصحابها نجوماً للمجتمع التدويني حيث لا تخلوا مدونه من اعلان او رابط نصي لهم .
لكن هل من الممكن ان تخرج لنا المدونات بأدباء وبإنتاج فكري متميز في جميع المجالات العلميه الحياتيه ؟
هل سنجد مدونات شعريه بقوه وشهره تلك السياسيه
وهل سيقوم الاعلام العربي بتغطيه هذه المدونات ودعمها كمثيلاتها السياسه ؟
هل من الممكن ان يصبح في يوم من الايام هناك مدونات لكتاب كبار لهم متابعين ولو باشتراك مالي سنوي للمدونه لمتابعه آخر كتابات المدون ؟
هل من الممكن ان يدعم احد الأدباء فكره التدوين بانشاء مدونه يطرح عليها اعماله وانتاجه الفكري ؟
كل هذه اسئله تطرح نفسها للنقاش
ولكن بعقلياتنا العربيه .. ما نطمح اليه ممكن …
لكن فى الخطه الألفيه ..

من أمام شاشه 17 بوصه ماركه DELL الأمريكيه ..
كتب لكم أحمد هتلر

بالضبط يوم الاربعاء 11-4-2007

نازل الجامعه فى امان الله الاقي بوابه الجامعه مقفوله

ومفيش نص دقيقه والاقي مسيره طويله وهتافات

يا صباح الاخوان والمسيرات الـ "سلميه"

طلعت الموبايل طبعاً وفتحت الكاميرا فى كام جزء من الثانيه كده

وبدات فى التصوير

واليكم المقطع بعد معاناه دامت ايام مع يوتيوب

اللى غايظني بقى ان واحد يجي يقولى انت صحافه ولا بتصور كده فقلتله انى عندي مدونه

فطلب مني اني انشر الخبر واني اجي اصور عند كليه تمريض

بعدها مفيش دقايق واحد تاني بيقولى متصورش وهكسرلك الكاميرا

طبعاً الجماعه واضح انها خليط من البلطجيه والناس المحترمه

وكمان بعض المتخلفين .. واحد تاني جاي بيبرر طلب زميله بوقف التصوير بانه

خايف ان جهاز امن الدوله يقوم بعمليه تبديل الصوت وتركيب صوت يشوه صوره الجماعه

معرفش فاكر نفسه عايش فين ده اصلاً .. يمكن لسه ايام عبد الناصر ..

اعتقد ممكن لو الوضع بالدرجه دي يعملوا مظاهره وتقول فعلاً اللى هما عايزينه ..

كفايه كده لاني نسيت كنت عايز اعلق على ايه تاني

منك لله يا يو تيوب ..

ماشي يا اسامه انت اللى جنيت على نفسك بقى
اوعى تكون فاكر ان القاعده الشعبيه بتاعتك وسط البنات هتكون اكبر من القاعده بتاعتي ولا حاجه ..
ايه ممكن يكون فاكر كده ولا ايه ؟؟
ايه يا بنات روحتوا فين ؟؟
سايبني لوحدي ليه ….
اهيء اهيء
ماشي يا اسامه
حتى البنتين اللى اعرفهم خطفتهم
مجلس الشعب لازم ينتبه لحاجتين دلوقتي
نانسي عجرم خاطفه قلوب الرجاله واسامه منير خاطف قلوب العذارى
آه يانا يانا يا قلبي يانا
عموماً بقى مادام انت يا اسامه مش عايز تقول رسالتي على الهوا بقى
انا هنزلها على البلوج .. مملكتي الزرقاء .. تكونشي فاكرني هتحايل عليك يعني ؟؟
اسيبكم بقى مع خربشاتي الكيبورديه

لما جت وقالت من قلبها
ان يوم السبت واحد اتقدملها
ويوم الخميس هيقروا الفاتحه اهلها
عرفت بجد انى بحبها
لكن بعدها وصلتنى رساله منها
قالت دي كانت كدبه وانت صدقتها
لو رفضاني حياتك هبعد عنها
وحياتي كمان بعدها
ده انتى شراييني ودمها

 المشكله انها طلعت كدبه ابريل فى النهايه
وانا اللى كنت عمال اقول هنتحر ازاي ومحتار
عموماً انا حاسس انى كنت ببعت لايميل غلط ولا حاجه
يعني افتراض حسن النيه .. هنعديهاله المره دي لكن الحلقه الجايه لا يمكن اعديها ابداً !
وقد زعتر من تمخطر ..

بقالى كام يوم عمال اضحك على الحكم اللى بيحطوها شبابنا الروشين على المازنجرات (جمع مازنجر) بتاعتهم .
معلش مكانوش بيطلعوا عندي قبل كده لاني كنت لاغي النك نيم بيطلعلى الايميل علطول .
ماهو اصلها غتاته الواحد يحفظ كل يومين نك نيم لكل ايميل يعني .
وخصوصاً لو عنده 45 واحد اون لاين .

نطرح لكم الحكم المازنجريه :

LoVe IS Not FazLaKa . . MuSt Need Some TaKtaKa . . NoT OnLY Nice Words . . But ALso Pounds In AsTaKa

صحيح قعدت دقيقه على ما قريته بس ضحكت خمس دقايق بعد ماقريته
يعني من الاشياء التى تستحق الانتظار زي الشبكه التالته اللى مصدعينا باعلاناتهم
وتفتح موقعهم تلاقيه مره يفتح مره ميفتحش .. يمكن اللود عالى على السيرفر بتاعهم .. طيب اما مش عاملين حسابهم في سيرفر قوي للموقع علشان الناس تحجز من عليه .. امال هيعملوا ايه فى الشبكه ؟

واحد تانى بقى لقيته حاطط الكومينت ده :

Mozza Needed

وطبعاً لا تعليق .. الراجل مجابش جديد
نفس الراجل لقيته بعديها بكام يوم حاطط ده بقى

معلش يابنات هوه مجتمع ذكوري ابن كلب انا عارف .. انت هتلاقوها من محمد عطيه ولا من مين بس يعني ..

طبعاً ايميلي لا يخلوا من حبايبنا العرب سكان منطقه الخليج والربع الخالى
واليكم احدث الحكم بالخليجي

المستريح اللى من العقل خالي .. ماهو بلجات الهواجيس غطاس

حد فاهم حاجه ؟؟ بيقولك خالى وغطاس .. تبقى الاجابه تركيا

واحده كويتيه بقى غاليه عليا

شنهو الجنيته وياك .. يا اسمر عذبتني ..

مش انا الاسمر يا جماعه والله

عم ابراهيم بقى

اذا رأيت نيوب إبراهيم بارزه .. فلا تظن ان ابراهيم يبتسم

الاخ فاكر نفسه في الكونغو الديموقراطيه .. عاملى فيها اسد

ده بقى احلى واحد عجبني الصراحه .. رومانسيكي كده وحرش (عليه مايونيز يعني)

عذاب الحب ينهيني وانا مالى سواك .. حرام انك تخليني قصه بلا (عنوان)

والله انا حاولت استخدم جوجل ترانسليتور فى الموضوع ده ومفهمتش برضه قصده ايه ..