مدونة أحمد هتلر

رجاءً من البنات خصوصاً عدم مشاهده الفيديو لاحتوائه على لقطات ضرب عنيفه وألفاظ خارجه تخدش الحياء

مش عارف لغايه امتى طلبه الشرطه هيفضلوا فاكرين ان الخارجين عن القانون بشر من الطبقات التى لا تستحق الحياه ..
Sub-human races زي اليهود بالنسبه لهتلر .. ماهو طبيعي مادام شايفين قدوتهم والظباط الحاليين ده الطبيعي بتاعهم ..
ده انتهاك صارخ لحقوق الانسان وللدستور اللى بينص على ان جميع المواطنين متساويين فى الحقوق والواجبات ..
من حق المواطن مهما كان مجرم ومهما كان حرامي انه يعامل معامله انسان ..
المشكله ان مفيش ولا فيديو بيتسرب من داخل السجون .. يعني كل المجرمين دول مازالوا فى الاقسام اقسام الشرطه ..
يمكن السجون والمعتقلات بيحصل فيها اكتر من كده وعليها رقابه .. ممكن برضه ..
وممكن لان فى ضغوط ورقابه من قبل منظمات حقوق الإنسان على السجون والمعتقلات ..
طيب مادام المجرمين دول لسه فى الحبس .. يعني لسه متحكمش عليهم .. بيضربوا ليه ؟
مفيش عقوبه فى القانون فيها اعتداء على جسد الجاني بالشكل المهين ده ..
وان كان فى عقوبه بتكون بعد الحكم من المحكمه .. لكن مش فى القسم ..
ولما تسال اى ظابط يقولك عايزني اجيبله حاجه ساقعه ؟؟ ده حرامي ابن كلـ ..
لا طبعاً انا بطب منك انك تطبق اهم مباديء دستور مصر .. كل المواطنين متساويين فى الحقوق والواجبات
مش حرامي يدخلك تضربه .. وهو سارق فرخه من سطح او حتى هدوم من على حبل
وحرامي تاني يدخلك تقوم تقعده وتسلم عليه .. وهو قاتل بني ادمين .. ومهرب ملايين
الكيل بمعيارين ينافي مباديء الدستور ..
القانون فمصر المفترض انه بيطبق على كل طبقات الشعب .. مشوفناش ليه ضرب بالقفا لواحد لابس بدله ؟؟

طبعاً احنا كمواطنين .. المفروض نصدق ان في تفرقه عنصريه لاننا شوفنا فيديو او اتنين ..
او سمعنا من حد كلمتين .. الفيديوهات دي سلاح ذو حدين
لو وقعت فى ايد المواطن العادي الغير مدرك للصراعات السياسيه والضغوط على مصر وحكومتها هيقول ان في ظلم وتفرقه عنصريه
واننا لازم نغير الحكومه دي وان كل رجال الشرطه ولاد كلـ .. وولاد .. الخ
ولو وقعت فى ايد ضابط شرطه هيقول ان دي مجرد حالات فرديه .. مع انها مش كده خالص ده نظام متبع
بس المفروض يبقى في رقابه اكتر من كده على اقسام الشرطه
المفروض الفيديوهات دي تتسلم للجهات المختصه وبس
عرضها للراي العام مالوش غير هدف واحد .. شحن المجتمع ضد الحكومه لا اكثر ..
وده فيه اخلال للامن العام وده مرفوض
نفسي يكون تسليم الفيديوهات دي لاعضاء مجلس الشعب ويتم طلب التحقيق فيها هناك فمجلسنا .. مجلس الشعب
مش فقناه الجزيره ولا فى العاشره مساءً
ولا حتى فمدونه وائل عباس .. اللى الناس خلاص عملته جيفارا لانه قدامهم المدافع الوحيد عن الحريه فى وجه الظلم والديكتاتوريه ..
يا جماعه شويه منطقيه في طريقه تفكيركم وحاولوا تلاقوا حل سليم للمشكله .. بدل ما تنجح الفيديهوات دي فى الوصول للهدف السيء منها

مره تلات مصاصين دماء راحوا كافيه
اتنين طلبوا دم مغلي
والتالت طلب ميه مغليه بس ..
عارفين ليه ؟؟

خلاص خلاص متتهوروش .. مش انا اللى قلت النكته والله .. دي كانت اخر حاجه قالتها شذى خطيبه علاء ابن عمي امبارح الجمعه ..
كان يوم لذيذ جداً والبنتوته كمان لذيذه .. (شكل علاء هيضربني)
المهم بقى انتوا ايه اخباركم واحشني موت ..
طبعاً مستنين مني بلاوي كالعاده .. بس انا مش هخيب ظنكم انا كنت فى الفتره الاخيره دي بعمل شويه سياحه فمصر كلها من القاهره للزقزوقه حبيبه قلبي ..
المهم الرحله بدات باسبوعين فى القاهره فى منطقه المقطم تحديداً .. الميه بيقولوا مقطوعه هنا بقالها اسبوع والناس عماله تعبي ميه فحلل وحاجات غريبه كده ..
المقطم طبعاً مكان جميل زي ما قولنا فى كازينوهات وديسكوهات وحاجات حلوه ..
بس اللى انصحكم تزوروه بقى كورنيش المقطم .. ياريت متروحوش يوم الخميس علشان بيبقى فى حمله اداب ..
القعده على الكورنيش بالليل بقى مع كبايه حمص الشام واغنيه بهواك لعبد الحليم هتلاقوا الدماغ متسلطنه ايه .. وياسلام بقى لو بنتوته جميله علشان القعده تحلوا ..
على فكره فى هناك شيشه للى عايز وفى كمان كابتشينو .. مش من ابو رغوه
انا كنت جايب طياره هليكوبتر كده اتعلم عليها الطيران وقلت اما اروح اكسرها هناك على الكورنيش الناس اتلمت عليا تقولش محمد عطيه يا ولاد .. المهم اقنعناهم اننا طلبه فى طيران مدني وده اختراع احنا عاملينه وبنجربه .. اصل منظرنا كان هيبقى وحش كل ما نطير الطياره 4 متر نوقعها على الأرض بطريقه غبيه جداً والطياره عماله تلف حولين نفسها ..
موضوع الطيران ده مسيطر عليا بطريقه غريبه اليومين دول لو حد متابع الرياضه دي يبلغني .. انا قابلت شاب من الزقازيق بس عايش فى مصر مهتم بالرياضه دي من 15 سنه وهو بيدرب دلوقتي .. نصحني انى مبدأش بطياره هليكوبتر وابدا بطياره عاديه بجناحات ..
المهم حسبلي التكلفه المبدأيه لطائره المبتدئين طلعت حوالى 5400 جنيه .. قلتله هعدي عليك قريب ان شاء الله
امال المحترفين بكام .. وراني طيارتين قالى دي بـ 10 آلاف ودي بـ 12 ألف قلتله انت معلم والله ..
ومن المقطم للزقازيق .. تخيلوا مكنه طباعه الكارنيهات بتاعه الحزب الوطني عطلانه يا جدعان .. الحزب الحاكم مكنه طبع الكروت بتاعته عطلانه ياهوووو .. شوفلكوا حزب تاني .. ههههههههههههههههههههههههههههههه
متسالونيش عرفت الخبر منين .. من مصادر سريه هيا عارفه نفسها ..

يلا كفايه عليكم كده ..
كان معكم هتلور المسحور .. عوووووووووو
هع هع هع هع هع

لسه مفهمتنيش
لما قلت لها فيوم انى من غيرها معرفش اعيش
ولما قولتلها لوحدي متسبنيش
انى ادمنتها .. بقت قرش حشيش
حطيتها فجيبي وفكمين ..اتاخدت تفتيش
اتحرزت مع السلوفان .. والفيش
لقوا معايا كمان سنتيان .. بكرانيش
كنت جايبهولك … آه بحب التقفيش
اترحلت بسببك .. ومن ظابط لشاويش
اتنفيت على الحدود .. فى العريش
متفتكريش نفوني فى الجنه .. سوق الحشيش
ده صنف غيرك يكيفني مفيش

مكانش فى دماغى خالص اكتب الموضوع كده خالص
بس معرفش ايه اللى قلب المدونه غرزه كده
يلا حصل خير ..

نعم يا سيدتي لقد استطاعوا تحريك قلبي
نعم يا سيدتى لقد اشعلوا فتيل نيران مشاعري
نعم انا الآن اقولها وأعترف … إني أحبك
كلا انه ليس القدر .. فكانوا يعرفون باني ساحبك
قبل حتى ان اعرف ملامح وجنات وجهك
عرفوا أني سأحبك .. لأنني لم أعترف إلا بأنوثتك
لم اتكلم معهم إلا عنك .. ولا إمرأه سواك ..

لا اعرف ماذا كتبت ولكن اعرف جيداً لمن ولماذا كتبت
لن يتحمل قلبي كل هذه المشاعر الجديده حبيسه فى داخله
ولن يخفف ضغطها بداخلى سوى هذه السطور
فبارك الله في مخترع الكيبورد فهو لي الآن دواء
وإن سألتم عن الإهداء .. فهو لمن شاء
أحمد هتلر