مدونة أحمد هتلر

بابا طول الليل قاعد يتفرج على الجزيره وبعد شويه يقلب على التليفزيون
التليفزيون يقول شفافيه ومصداقيه وتلاقي ايه الصناديق كلها فاضيه مليانه لغايه ربعها ومدرسه عبده الاقرع مليانه ورق ..
تقولش الناس عندنا خلاص الثقافه الإنتخابيه عندهم ارتفعت مره واحده

اضغط على الصوره لتراها مكبره .. هع هع هع
المهم اول ما مسكت الورقه لقيت الشرقيه اون لاين قلت مساء الأخوان المتاسلمين ..
ودول مال اهلهم ومال التعديلات الدستوريه .. الله يخربيوتهم هما ورانا ورانا ..
طبعاً بابا فوجيء بهجوم نازي عليه انت جبت الورقه دي منين وبتتوزع فين .. كان ناقص اقوله ان دي منشورات لقلب نظام الحكم وان دي جريمه امن دوله .. هع هع
قلتله انت قريتها كويس .. قالى آه قلتله طيب .. كده انت سمعت راي معارض قريت بقى كلام الحزب الوطني .. بيقولى مانا بسمعه فى التليفزيون كل يوم .. قلتله قريت بقى نص التعديل ؟ قاللى لا قلتله لازم تسمع الطرفين وتعرف التعديل بالضبط ويكون ليك راي مستقل ..هو صحيح مالوش اى لازمه بس لازم برضه يكون ليك راي انت مش مواطن ولا ايه ؟؟
طبعاً انا موافق على 90% من التعديلات وده مش لاني عضو حزب وطني لامواخذه ولا حاجه بس الحاجات دي بديهيه ..
تعالوا بقى ناخد كلام الاخوان المعارضين بتوع الاسلام هو الحل ونرد عليه ..
من اول 4 سطور يتضح ان الاخوان الحلوين خدوا نفس طريق حكومتنا الحلوه فى تنصيب نفسهم فى دور الام الحنون الرشيد اللى بتنصح ولادها اللى مش عارفين حاجه لانها خايفه على مصلحتهم ولانهم مش هيقدروا يفرقوا بين الصالح والطالح ما بين التعديلات وهيا هتفسرلهم كل حاجه تعديل تعديل ..تقولش مدرس دستور خصوصي يا ولاد .. علشان يعيش المواطنين معاهم هموم الوطن اللى هما عايشينها لوحدهم ..

الموضوع انا بصيتله بشويه واقعيه ومنطقيه ومقارنه بين الواقع وبين المطلوب من وجهه نظر الاخوان ..

هما فسروا الماده 24 و 30 و 33 وغيرها على حد قولهم انها هتؤدي الى الغاء الدعم عن السلع والخدمات ومن ثم الارتفاع الامحدود لها ..
مش عارف بيجيبوا الكلام ده منين بس منطقياً اننا لازم نسعى لاننا نكون الافضل وده مش هيكون عن طريق اننا نعيش على الشحاته من الحكومه .. مش عارف هتقولوا نقتل الناس الفقرا دي ولا نعمل فيهم ايه .. لا مش هنقتلهم .. هنبعتهم يزرعوا الصحرا فالجيش الزراعي .. وبعديه الجيش الصناعي .. بدل ماهم قاعدين على القهاوي ..
انا مع الغاء الدعم الوهمي اللى بنسمع عنه زيت عربيات محروق وسكر المفروض انه ابيض وشاي كارف صابون وكيسين مكرونه معرفش ماركه ايه دعم وهمي مالوش اى لازمه .. اللى عايش على الحاجات دي معتقدش انه لازم يفضل عايش ..
لما يبقى عندنا فائض نوزعه على الشعب نبقى نعمل رخاء اقتصادي ودعم ونهيص بس مش واحنا بناخد معونات من كل بلد قد كده حتى القمح بتاع العيش بنشحته من السعوديه يبقى مفيش حاجه اسمها رخاء فى الفتره الحاليه ولا كمان 20 سنه قدام …

اذا كنت موظفاً مطحوناً ومظلوماً من رؤسائك فى العمل (فى حد هنا مظلوم من رؤسائه فى العمل ؟) .. فان التعديل يعني التحول الى نظام الوظيفه العامه اى التعاقد السنوي وسلطه الفصل المباشر مما يعني مضاعفه الظلم ..
الله بقى على النظره الثاقبه وكان الاخوان بيقولوا اللى عايز يا جماعه يروح الشغل يشرب شاي ويقرى الجرنان ويقول للناس تعالوا بكره ياخد راحته على الآخر ومحدش هيقدر يقوله انت بتعمل ايه .. ماهو موظف غصب عن عين التخين والناس تتشل ولا شكاوي تنفع ولا تسوى .. لا طبعاً البقاء لازم يكون للكفائات الأفضل مش للأموات اللى ماليين المصالح الحكوميه دلوقتي .. هتشتغل بضمير تفضل مكانك هتستهبل وتقضيها نوم فبيتكوا روح اقعد فبيتكوا .. الطبقه البروليتاريه دي لازم تتعامل بالحديد والنار .. تاخد على قد ما هتشتغل مفيش شغل هتاخد برضه بس على قفاك .. انا مش شايف اي ظلم الا لينا بالاعتراض على التعديل ده ..

اذا كنت عاطلاً لسنوات طويله ومنتظراً وظيفه فان التعديل يعني اعفاء الدوله من اي التزام نحو العاطلين وعدم القدره على منع تسريح العمال لينضموا الى طابور العاطلين ..
طيب بالزمه نخلينا واقعيين فى دوله متقدمه من اللى الحكومه عايزانا نبقى زيهم فيها حاجه اسمها توظيف عاطلين فى الحكومه .. خخخ هو في كام موظف حكومه اصلاً فى الدول دي .. الدنيا هناك كلها قطاع خاص .. من اول شركات النظافه لغايه اسلحه الجيش ..
هو في حد اصلاً بيتعين من الحكومه دلوقتي ؟؟ هيا الحكومه اصلاً محتاجه موظفين مكفايه الموظفين اللى فيها واللى خربوا البلد ..يا سلام بقى لو يخصخصوا المرور ويخصخصوا الطرق والكباري .. شوارعنا بيتهيالى هتنضف .. ويبقى دور الحكومه الرقابه والرقابه وبس ..

هتغدى ونكتب موضوع تاني نستكمل فيه الرد على التعديلات من وجهه نظر الاخوان ..
والناس اللى رافضه التعديل لمجرد الرفض . .بابا كان دايماً يقولى ان ايام السادات كان الناس تروح الانتخابات بس علشان تقول لا فى التصويت .. وتطلع النتيجه 99.9% قالوا نعم و 0.1% قال لا وكل واحد فاكر نفسه هو اللى قال لا .. خخخ
هوه تامر كان بيغنيلهم قولوا لا ولا ايه ؟
سلام هروح اكل ..