أتذكرين تلك الليله ؟
عندما تقابلنا في حفل السهره
تحت الأضواء الخافته
جلسنا بعيداً فى تلك الحجره
اسدلت ستار رموشك
ووافقت معي على الهجره
ووضعتي يديك فى يدي
اتذكـرين أول قُبله ؟
اتذكرين انتفاضه قلبك
ورجفه جسدك والرعشه
اتذكرين ام نسيتي
او لم يعد لنا إلا الذكرى ؟
.. صحيح طارق بيقول فى طياره هيلكوبتر وقعت فى ابو كبير امبارح وانفجرت .. بالليل والدفاع المدني جه وقزاز بيتهم كله اتكسر .. ياريت يا جماعه لو فى حد عنده صور ولا حاجه يقولنا ..
عباره سابق ولاحق المشهوره
مكنتش واخد بالى منها زمان
بستغرب انا من اصحابي اللى كل ما تقولهم حاجه يقولولك نعمل ايه وهنعيش ازاى وووو ..
احنا امكانياتنا كده وكان ربنا قدر عليهم انهم يموتوا قبل ما يعيشوا
تواكل بطريقه فظيعه .. ناس عايشه وفاضيه مبتعملش اي حاجه فاي حاجه فحياتهم
والثقافه الوحيده عندهم جنسيه واحتمال مخدراتيه ..
من يومين لقيت اخواتى الاتنين الصغيرين قاعدين قدام التليفزيون يخلصوا الكرتون يشوفوا فيلم يخلصوه مسلسل وبعدين يقوموا يلعبوا العاب على الكمبيوتر .. كنت هتهبل ..
انا : انت ياض انت وهوه
هما : نعم
انا : كل واحد فيكوا يجيب ورقه ويكتبلى 10 افكار او اختراعات جديده .
هما : يعني ايه ؟
انا : يعني تشغلوا مخكوا انا عايز اختراعات اقفلوا الكمبيوتر ده واترزعوا اخترعولى
هما : ازاي يعني نخترع ؟
انا : معرفش انا هنام اقوم الاقيكوا كاتبين الاختراعات
ماما : طيب اديهم امثله انت عايز ايه بالضبط ؟
انا : يعني مثلاً ممكن نفتح باب الشقه بالريموت كنترول .. اى اختراع احنا محتاجينه فى البيت لتسهيل الحياه .
طبعاً قمت من النوم ناسي كل حاجه وبعد ما هما كانوا ناموا ..
بس النتيجه كانت لحد ما مرضيه شويه افكار مجنونه … بس انا هدفى كان انهم يشغلوا مخهم شويه بدل ماهم متنحين كده … مش ناقصين تخلف البلد كلها بقت معاتيه …
وده اللى مضيعنا بجد ..
بابا جاى من قيمه كام يوم ومش عارف يزرع الارض ايه
سافر لقى الراجل اللى جنبه زارعها تين شوكي
لقيته جاى بيقول انا هزرع تين شوكي
كنت هقتله !!
تين شوكي ايه ياعم انت انا مش عايز اموت بالضغط والسكر ارحمني
هو علشان الراجل زرع تين شوكي يبقى نزرع تين شوكي انت هتشلني ليه ؟
لقيته بيقولى امال يعني ازرع ايه
قلتله السؤال ده تساله لشركه زراعيه او مشتل او مهندس زراعي يشوف تربه ارضك وامكانيتها والري فيها ويقولك انت ممكن تزرع كذا وكذا وكذا وكل حاجه تكاليفها هتبقى قد كده .. مش تاخد قرار انك تزرع الارض لمجرد ان اللى جنبك زارع نفس المحصول ارحمني ..
الموضوع فكرني باللى بيحصل فى اي بلد فى مصر .. لو فى حد فتح بقال ونجح تلاقي واحد فتح بقال برضه قدامه ونفس الكلام فى المطاعم وافران العيش الفينو .. وبيتهيالى انتوا عارفين فى كام محل اتصالات فى مصر .. ده غير موضه سيبرات النت اللى كانت فى كل شارع عندنا هنا فى الزقازيق .. كل شارع فيه سيبر على الاقل …
بيتهيالى ده فى الاساس لان مفيش حاجه اسمها تفكير … ولما الواحد من الناس دي بيحاول يفكر بيدمر … لانه متعودتش يفكر صح !
عموماً البلد دلوقتي محتاجه انسان بيفكر وبيفكر صح .. علشان تبقى ناجح لازم تكون بتعرف تفكر .. يا اما تشوف حد يفكرلك بفلوس .. ولو معكش ده او ده تموت احسن ..
دقايق يا جماعه هروح اقلى بطاطس وارجعلكم …
عُدنا .. هتلر توون ..
البطاطس لسه على النار استنوا يا جماعه بلاش استعجال
على الله بس الحقها ومنساهاش واروح الاقيها اتحرقت زي كل مره .. هع
البطاطس دي الحاجه الوحيده اللى بعرف اعملها وبحب اكلها لما بكون جعان ومستعجل
بغض النظر عن الأجبان والبيض وبعض محتويات مطبخنا وثلاجتنا العتيقه اللى عمرها من عمري الا ان البطاطيس ليها منزله خاصه فقلبي ..
حلوه البطاطيس دي فكرتوني بايام الإبتدائي فى السعوديه
كانوا دايماً فى المدرسه يقولولنا ان الانسان لازم ينوع فى غذائه وياخد نسبه من الكربوهيدرات والنشويات والكالسيوم والحاجات دي اللى مش فاكرين اى حاجه عنها دلوقتي .. وكل ما اروح للدكتور يقولى عندي نقص فيهم ..
كنا دايماً نعرف ان البطاطس فيها كربوهيدرات ونشويات والمشكله ان البطاطس كانت هيا الوجبه الوحيده الموجوده فى المدرسه فالواحد كان حاسس ان دمه كله نشويات وكربوهيدرات .. المقصف او الكانتين بالمصري مكانش فيه الا اصناف محدده سنويتش بطاطيس وسندوتش بيض مسلوق وطبعاً لكل واحد الاختيار عايزهم بالمايونيز والكاتشب الهاينز ولا لا .. تقريباً تلت اربع الطلبه مدمنين كاتشب وبطاطس .. وكان في من المشروبات عصير برتقال صن توب وحاجه زي البيبسي اسمها صن كولا .. كل حاجه صن صن مفيش موون خالص ..
يالهوي زمان البطاطس اتحرقت ..
.
.
حصل خير متحرقتش كلها .. اتفضلوا معايا بقى
احسن متتفضلوش .. انا اصلا قالى كام بُطيطسايه كده على قدي ..
ياه فين ايام بطاطس السعوديه اللى كانت البطاطسايه قد 5 بطاطسات من الفلاحي دول .. البطاطس المزروعه فى الرمل بتبقى كبيره فى الحجم مش زي الصغيره المزروعه فى الطين عندنا .. كان دايماً بابا يجيب كراتين البطاطس من السوق الاسبوعي الكرتونه تقريباً بتبقى 10 كيلو بطاطس لما تفتحها انت وبختك تلاقي معاهم عقربه صغيره ممكن اتنين انت وبختك يعني .. دايماً لازم تجهز شبشب علشان تموتها .. تقولش بتموت صرصار ..
بس خلاص الواحد كان متعود على جو العقارب والتعابين ده الواحد كان بيموتله عقربه يومياً .. مره اتخنقت من واحده دخلتها برطمان وطلعتها فى الشارع ونزلتها على الاسفلت كان مولع نار درجه حراره الشمس هناك مش اقل من 40 المسكينه قعدت تطنط قدامي وانا هموت من الضحك مش عارف ايه الساديه اللى كنت فيها دي .. بس برضه لو مكنتش قتلتها كانت هيا اللى هتقتلني .. بس تفتكروا القتل الرحيم هيكون احسن معاها ولا القتل بالشبشب ؟ اهو كله فى النهايه قتل وكده كده هتموت ..
المهم بقى ان النهارده اول يوم فى الدراسه فى الترم التاني من السنه التانيه لي فكليه الحقوق .. وبصراحه انا مش ناوي انزل الجامعه اصلاً بس بفكر يعني ممكن انزل وممكن لا ..
الساعه دلوقتي 9 .. احتمال اسافر القاهره النهارده .. كان نفسي اروح اسكندريه بس الظاهر مفيش نصيب كل اصحابي نزل عليهم الملل كل واحد فيهم بيتحجج بالدراسه والبيت والعيله .. هو مفيش صايع فى البلد دي غيري ولا ايه ..
ومش عارف انا ايه الصياعه اللى نزلت عليا مره واحده دي … هو انا علشان واخد حريه غير محدوده من البيت استعبط كده ..
آخر نكته بقى فى خطوبه ابن عمي كل واحده من قرايبنا عايزه تجوزني بنتها .. هو انا اه كان شكلى جذاب بعد ما حلقت شعري بس مش لدرجه 4 عرايس فى ليله واحده .. عموماً انا ردي فى الموضوع ده كان واضح للجميع .. يا جماعه انا منحرف وبعمل كل اللى انا عايزه اتجوز ليه بس ؟؟
عموماً انا عندي مبدأ فى الانحراف .. وعندي حدود ملتزم بيها طبعاً … انا بتاع قانون وبعمل كل حاجه بالقانون .. متخافوش اي حاجه خارج نطاق القانون بنبعد عنها ..
يلا سلام بقى …
توصيات ومناقشات وجدال واسع يسود الساحه السياسيه المصريه بخصوص التعديلات المقترحه لتعديل الدستور واستبدال قانون الطواريء الحالى بقانون الإرهاب ..
لا ادري لما يحب رجال السياسه اطلاق اسم قانون الإرهاب عليه مع انى اعتقد انه من المفترض ان يكون قانون مكافحه الإرهاب .
بلاش الكلام الكبير اللى انا بدات بيه ده ..
انا اللى خانقني فى الموضوع كله انهم مش عارفين يتوصلوا لتعريف واضح للإرهاب ومش عارفين ياخدوا تعريف مجلس الأمن ولا تعريف جامعه الدول العربيه (إذا كان عندهم تعريف اصلاً) ..
عندهم حق يحتاروا اصل احنا فمصر مكانش عندنا ارهاب قبل كده … حاجه تعقد ..
وبعدين مش عارفين يفرقوا بين الجرائم العاديه والجرائم الإرهابيه ..
تخيلوا الهبل وصل لغايه ايه .. آدي خبراء القانون المصريين ..
طيب علشان منبقاش سلبيين كده وننتقد من بعيد ..
الارهاب هو اي فعل يخل بامن الوطن والمواطنين …
طيب هنا هنحتار فحاجه مش ممكن يكون لدوافع سياسيه ؟
واذا كان مالوش دوافع سياسيه هيبقى ارهاب ولا لا ؟
يعني ممكن نقول على سفاح المعادي انه ارهابي ولا هنعتبره مجرد مجرم ونعاقبه بالقانون الجنائي ؟
مش عارف هما بيتكلموا فايه بس انا ممكن احط اطر او اسس من وجهه نظري
اعتقد مثلاً جريمه القتل لو وقعت ضد شخصيه سياسيه او اي مواطن غير عادي او اجنبي مقيم فى مصر تعتبر جريمه ارهابيه الا اذا ثبت ان الجانى لم يقصد المجني عليه بعينه ..
ممكن كمان نحط شرط ثاني ان الجريمه لو حصلت باستخدام ادوات معينه تعتبر ارهابيه يعني منقولش على واحد قتل باستخدام سكينه انه ارهابي لكن ممكن نقول على واحد استخدم بندقيه متطوره جداً او قنابل انه ارهابي .
وممكن كمان نربطها بمعيار الكم يعني لو المجني عليهم اكتر من 10 مثلاً ممكن نقول ارهابي انما لو المجني عليه فرد واحد نقول ارهابي .
نفس الكلام ممكن نطبقه على الخسائر الماديه يعني لو قلنا الخسائر الف جنيه ميبقاش داخل دائره الاتهام الارهابيه لكن لو الخسائر مثلاً 50 الف جنيه يبقى ممكن نقول ارهابي .
طبعاً انا بقول اقتراحات عامه ولو هناخد بيها يبقى لازم يتحطلها اسس واضحه للفصل فى ان المتهم له اهداف سياسيه او اجتماعيه او ينتمي لتنظيم او غيره وبرضه فى تحديد المعايير بحيث تتناسب مع كل جريمه وتكون منطقيه وواقعيه ودي من اختصاص الخبراء العسكريين والإقتصاديين .
وبعدين انا عايز اقول مثلاً ان تهريب المخدرات ممكن يكون اشد خطراً من الإرهاب بالنسبه لتعريف الجريمه الإرهابيه الحالى .. ليه منوسعش الباب شويه ونقول ان زراعه او تهريب او الإتجار فى المخدرات اعمال ارهابيه ؟ او جريمه امن دوله ..
وليه كمان منقولش ان تجاره السلاح وتهريبه ارهاب .. ؟
وبعدين لو خبراء القانون بتوعنا معرفوش يوصلوا لحاجه انصح نستعين بخبراء اجانب من دول سبقتنا فى التجربه دي .. واهوا نتعلم منهم حاجه بدل الخيبه دي .. وبدل ما نحط قانون فاشل يضيعنا بعد 5 سنين قدام ونرجع نعدل فيه تاني ..
قالتلى يا واد يا بتاع الهتلريه
عندي مشكله مستعصيُه
قالولى اتحجبي ياوليه
ده الحجاب فى الدين وصيُه
وقالولك ايه كمان يا عطيُه ؟
قالوا انى مسلمه عصيُه
ومن غيره مصيري النار الجهنميه
ولو لبسته هبقى رجعيه
وبساعد التفرقه العنصريه
ولو ملبستوش هبقى كافره ويمكن لا دينيه
اعمل ايه بقى فى الورطه ديُه ؟؟
قلتلها : كلكوا مخكوا ملوخيه !
ومش فاهمين ايه القضيُه
الموضوع مخطط للوهابيُه
وانتى وغيرك ضحيه غبيه
معرفوش يدخلولنا الشيعيه ولا البهائيه
ولا عرفوا يدخلوا الصوفيه ولا الصفويه
قالوا يدخلوا الوهابيه
ومصر مش هتكون وهابيه
مصر للقوميه المصريه
صوره لميدان الخديوي إسماعيل وعلى حسب اقوال شيماء فانه هو من بنى مدينه الإسماعيليه
كوبري طريق البلاجات المواجه للميدان مباشره
واذهب للمنزل لانام … لحظه تفكير وتأمل ..
أنا ومحمود في لحظه هبل وتخلف
وفي زياره لأحد الأقارب فى الحي الخامس وجدت هذا
الجرس العجيب فى سلم العماره
احد الأعمال الفنيه فى منتصف الطريق
وصوره رائعه لمؤتمر القطط الإسبوعي
صوره لتمثال النصر باحد الميادين ويقف فيها الجندي
المصري رافعاُ علم مصر عالياً ويضع قدميه على علم إسرائيل ويظهر خلفه
مآذن مسجد لا أتذكر إسمه ..
وعلى طريقه شعبان عبد الرحيم فى التعبير "أنا بكره
إسرائيل" قمت برسم الورقه التاليه
أحد الميادين .. التى لا يوجد ميدان فى نظافتها
بالزقازيق
لوحه فنيه مصنوعه من قطع السيراميك الصغيره موضوعه
باحد إشارات المرور
وفى الطريق للنصب التذكاري لحرب 1973 ركبنا المعدّيه
صوره للقناه ومكتوب على الرمال فى الطرف الآخر "WELCOME
TO EGYPT"
وفي الطريق للنصب التذكاري
لقطه رائعه للحظه غروب الشمس فوق القناه
وفي النهايه الإسماعيليه مدينه رائعه وبها العديد
من المتنزهات وجوها نقي صباحاً وصحو تشوبه الشبوره ليلاً نظراً لأنها
تطل على البحر الأحمر ..
ما لاحظته هنا هو تعصب سكان الإسماعليله الفظيع لفريقهم المحلى الإسماعيلي
لدرجه انهم لو اكتشفوا انك تنتمي بتشجيعك لأحد الفرق الأخرى كالأهلى
خصوصاً قد تختلف معاملتهم معك 180 درجه .. لا انصحك ان تقول انك اهلاوي
فى الإسماعيليه ..
شيء آخر شد إنتباهي طريق البلاجات لم أجد لوحه واحد تقول ان اسمه طريق
البلاجات كل ما وجدته هو طريق عماره السياحي .. وهو احد المهندسين
وكان محافظاً للإسماعيليه وهو من أنشأ الطريق …
مطاعم البحريات فى الإسماعيليه رائعه ويمكنك زيارتها وأسعارها متوسطه
..
التاكسيات تقريباً فى نفس اسعار الزقازيق من 2-3 جنيه فى التوصيله
ما عدا طريق البلاجات نظراً لانه طويل قد تصل البنديره لـ 5 جنيهات
..
وفي النهايه هذه صوره لي فى حفل خطوبه ابن عمي محمود فى الزقازيق بعد
عودتي من الإسماعيليه ..
ونراكم فى العدد الاحق من مغامرات هتلور
أحدث التعليقات