مدونة أحمد هتلر

فين يا جماعه ايام صباح وفيروز والفن الجميل
مش دلوقتي .. أنا أنا دانه أنا دندن
هو صحيح محدش ينكر أن الإستاذ جاد شويري بيطلع لنا مواهب رائعه ..
من أول ماريا ومرورا بتينا ودانا أيضاً
على الرغم من أن جاد مهتم فيما يبدو بالفتيات الفاتنات (كباقي الشباب) 
إلا أنه أخرج لنا مؤخراً كليب أعجبني جداً بمعنى آخر (زنجفني)
كليب رومانسي وهادي الصراحه مش فاكر هوه بتاع مين ولا اسمه ايه
بصوا هو كان فى واحد نايم على السرير وواحده نايمه جانبه
المهم هو حلم بيها بقى .. مش موضوعنا !!
والله مانا عارف هو ايه موضوعنا ..

لما افتكر هبقى اكمل الموضوع الفاشل من اوله ده !

قالوا عني باني لا ادخل مشروعاً فاشلاً ..
لكن من الذي يحكم على احد القرارات انه صحيح ام خاطيء غير النتائج ؟

أحمد هتلر

كنت قاعد بعد ما خلصت شغل بدور فى جوجل عن معلومات عن الشيعه
لقيت كذا موقع
بس شدني موقع لبناني .. طبعاً كلنا عارفين ان حزب الله حزب مسلم شيعي
انا مش هتكلم عن حزب الله
اللى شد انتباهي فى الموضوع بعد ما قربت انتهى من قرايته
الأئمه الإثنى عشر
في ناس اكيد سمعت عنهم وناس لأ
انا مش هشرح هما مين دلوقتي
بس اللى معانا في الحقوق ودرس شريعه سنه أولى حقوق هيعرف مين هما الأئمه الإثنى عشر
ومذاهب الشيعه كمان كلها
المهم نرجع بقى للي شد انتباهي فى الأئمه
تعالوا نراجع مع بعض الأئمه ونراجع مع بعض برضه طريقه وفاتهم أو إستشهادهم :
الإمام الأول : علي بن أبي طالب (رضي الله عنه)
استشهد بالسيف فى محرابه
الإمام الثاني : الحسن بن على بن ابي طالب
توفي شهيداً بالسم
الإمام الثالث : الحسين بن على بن ابي طالب
قُتل بالسيف
الإمام الرابع : علي بن الحسين زين العابدين
توفي شهيداً بالسم
الإمام الخامس : محمد بن علي الباقر
توفي شهيداً بالسم
الإمام السادس : جعفر بن محمد الصادق
توفي شهيداً بالسم
الإمام السابع : موسى بن جعفر الكاظم
توفى شهيداً بالسم
الإمام الثامن : علي بن موسى الرضا
توفى شهيداً بالسم
الإمام التاسع : محمد بن علي الجواد
توفى شهيداً بالسم
الإمام العاشر : علي بن محمد الهادي
توفى شهيداً بالسم
الإمام الحادي عشر : الحسن بن على العسكري
توفى شهيداً بالسم
الإمام الثاني عشر : الحجه محمد بن الحسن
(بيقولوا لسه عايش) << مش موضوعنا

تعالوا بقى نشوف ايه الحكايه
الفتره اللى تواجد فيها الأمه هيا من سنه 3 - 255 طبعاً بالهجري
يعني تقريباً 250 سنه
تعالوا بقى نشوف كام واحد منهم اتقتل بالسم
9 منهم ماتوا بالسم و الباقي بطرق مختلفه
مش غريبه …
لا مش غريبه
تعالوا ناخدها من الناحيه الإجراميه << عاملى فيها محامي
اساليب القتل بتطور على مر العصور
زمان مكانش في مسدس ومن كام سنه مكانش في كاتم للصوت
يبقى نستنتج ايه من الموضوع ؟
انتشار استخدام وسيله السم فى القتل فى ذلك الزمان
طيب يا ترى لسه السم بيستخدم اليومين دول ؟
طبعاً ولكن بطريقه اقل انتشاراً لوجود وسائل اخرى اسهل وصعبه فى الكشف
ازاى مش فاهمين ؟
السم معروف انه بيحدث تشنجات والآم على الجثه قبل الموت
واحتباس للدم فى مناطق معينه
الجثه تشريحياً بيبان انها مش ميته موته طبيعيه
وبالتالى مبتاخدش تصريح دفن إلا بعد الكشف الطبي عليها من قبل الطب الشرعي
وبيبان مباشره من الكشف ان مات مسموم ..
كل واحد يخلى باله من اكل مراته !!
اقولك
نصيحه … ما تاكلش …

اذا جلس الفرد بضع دقائق يفكر فيما حدث بلبنان من هجوم اسرائيلي غاشم ..
وما اسفر عنه من تدمير لبيروت … بيروت الأرض العربيه ..
دعونا نتناقش في نقطه من الموضوع
اذا كنت أباً لأحد الأطفال فى الحياه المصريه البسيطه
وتعدى عليه احد ابناء الحاره الصغيره التي تعيش بها
ماهو رد فعلك وقتها ؟؟
اظن ان اضعف الإيمان منطقياً هو ان تحمي ولدك لا أقول ان تدافع عنه وترد العدوان بالعدوان ..
اضعف الإيمان ان تحميه وتصد الضرب عن ابنك ..
حاله اخرى ..
لو كان اخوك …
لا فلنقل انه صديق لك
عشتم معاً منذ الطفوله فى مكان واحد وكنتم معاً قى السراء والضراء
واذا بك ترى احد الاشخاص يعتدي عليه بالضرب او يهدده بسلاح او او ..
لو لاحظتم انا لم اقل يقلته .. الموضوع بسيط اليس كذلك
رد فعلك هو الدفاع عن صديقك ..
اذا فالتساؤل هنا 
لماذا لم يقف العرب وقفه الرجال مع اخوانهم فى لبنان ضد عدوهم
لماذا لم تقف العروبه مع ابنتها بيروت
هل كانت فى يوم من الايام بنتاً عاصيه
وهل يتخلى الاب عن ابنه مهما كان عاقاً ؟
عرفتم مدى تخلينا عن قيمنا
اين دماؤنا الشرقيه التى تثور لاى شيء يجرح كرامتنا
اين كرامتك عندما يقتل اخاك وانت تتفرج
كل ما فعله العرب هو ارسال الامدادات
بمعنى اخر الحقن المسكنه للألم ..
هيهات يا عرب ..
مما حدث فى لبنان نكتشف اننا كعرب فعلاً لا نستحق الإحترام ..

القضيه الاخرى التى يجب ان نستنتجها
قضيه ردود فعل العرب تجاه القضيه اللبنانيه
فكلنا نعلم ان احبال الدبلوماسيه طويله
وكلنا راينا مجلس الامن المتخاذل الاكذوبه
وراينا انه لم ياخذ قرار الا بعد ان اعطى الفرصه كامله لاسرائيل لتنفذ مخططاتها
فمن الذي استحق الاحترام بعد الحرب من العرب ؟
هل هم القاده العرب اصحاب الدبلوماسيه
ام هو مجلس الامن (الامريكي)
ام هو القائد العربي المسلم الشيعي قائد حزب الله الإنسان حسن نصر الله
في الإسلام تعلمنا
ان السن بالسن وان العين بالعين
فعندما تكون معادله الحرب الاسرائيليه معنا الحرب بالسلم تصبح المعادله فاشله
اعتقد ان خيار حزب الله كان الخيار الأصح
وبلا شك
حصل حزب الله بقياده العربي حسن نصر الله على احترام العالم ..

بيقولوا روحوا الجامعه اتعلموا يا ولاد !!!
اروح اشوف الجامعه مع الولاد ..
الاقي الولاد نسيت انهم رايحين يتعلموا
لا على الارجح هما افتكروا انهم رايحين يتعلموا حاجه تانيه
يتعلموا ازاي يكلموا البنات ..
يقيموا علاقات مع الجنس اللطيف ..
يا حلاوه يا ولاد يا حلاوه ..
يا جماعه حد معاه جدول المحاضرات .. نوووو
طيب يا جماعه حد عارف ايه المواد اللى علينا السنه دي .. نوووو
طيب يا جماعه هو اسم عميد الجامعه ايه ؟؟ نووو
برضه نووو .. طب نووو عليكو وعلى اللى جابكوا الجامعه فيوم واحد …

طيب .. علشان محدش يقول اني معقد ولا حاجه
انا مبقولش منعملش علاقات مع الجنس اللطيف
ولا بقول نعمل كليه خاصه بالبنين وكليه للبنات ونفصلهم عن بعض ..
انا بقول كله يبقى فى حدود المعقول ..لكن لما يبقى الهدف الرئيسي هو التعرف على البنات
اعتقد دي تبقى مهزله .. والتعليم فى مصر مش ناقص مهازل ..
هتقولولي الحل ايه ..
هقولكم ان ثقافه النواصي اللى الشباب فى الجامعه بيتعامل بيها دي متنفعش ..
يعني نعمل ايه برضه مفهمناش ؟؟
ايه رايكم نعمل غرامه للى نلاقيه واقف على الناصيه ..
هتضحكوا صح
واحتمال تقولوا ايه المجنون ده .. ماهم هيقعدوا تحت السلم ..
وهيتقابلوا فى المحاضرات ..
لا يا جماعه هنا لازم نفصل
يتقابلوا فى المحاضرات حاجه وتحت السلم حاجه
عموما انا مش لاقي حل للمشكله حالياً ..
بس انا شايف ان دي مشكله وياليت يتحط حل ليها ..
المشكله دي فى كل كليات مصر
الحكوميه والخاصه .. مع اختلاف المستويات والطبقات …
ورونا الهمه يا بتوع تطوير التعليم ..