مدونة أحمد هتلر

20-8-2006
من مدينة الغردقه على سواحل البحر الأحمر
ومن محافظه البحر الأحمر المصرية
ومن ومن ومن
انا قاعد في انترنت كافيه فى شارع الشيراتون
من الآخر . المهم انا بقى بقالى 3 ايام هنا فى ضيافه عمي
المقيم بالغردقه ..
احكيلكوا موضوع الغردقه ده من البدايه
اصل انا ليا واحد غلس بيقولوا انه ابن عمي
المهم الواد ده كل شويه يتصل بيا يقولى تعالى الغردقه تعالى الغردقه
وعمال يحكيلي بقى عن السياح والمعاصي بقى ..
وانا بيني وبينكم بقى زي كل الشباب عايز ينحرف بس مش لاقي اللى يوجهه
قلت اما اجيله يمكن انحرف على ايده بقى
اتاريني كنت مخدوع .. زي كل الشباب المصري المخدوع
كل مافى الغردقه رجلين حلوه بس ..
آه والله رجلين بس مش اكتر
ده بالنسبه للنص التحتاني النص الفوقاني مفيهوش حاجه خالص بقى
بس حلو يعني ..
يعني الموضوع هنا ممتاز بس جايب مقبول
المهم انه نجح يعني
مش فاهمين حاجه طبعاً
ولا انا والله
انا هنا عايش فى جو من المتناقضات
سياح مش لابسين غير البكيني
ومصريات مش باين منهم غير وشهم
طبعاً انتم عارفين بقى باقي الفروق اكيد بتشوفوا السياح فى التليفزيون
ومش محتاجين انقل صور تاني ..
وبعدين كل ما الست الوالده تتصل بيا تقولى خلي بالك من نفسك وخاف ربنا ..
مش فاهم انا هو انا فى بلد الرزيله ولا ايه
ولا البت كل ما تكلمني تقولى اوعى عينك تزوغ يمين ولا شمال
تقولش انا جاي هنا علشان احترم نفسي
اما كنتش ازوغ بعيني يعني اعمل ايه انحرف
حاجه تانيه غايظاني بقى
انا اعرف ان الانجليزي ده اللغه التوب يعني وكده
اول مره اعرف ان الروسي اهم من الانجليزي هنا فى الغردقه
كل ما اكلم حد من السايحات اقولها كان يو سبيك انجليش الاقيها بتقولى نو
واحده تانيه عملتلى بايديها نص نص يعني
المفروض يعلمونا روسي فى المدارس بقى مدام الغردقه حته من روسيا
مش من مصر
لا وحاجه تانيه تغيظك بقى موضوع السفر والكماين فى الطريق من الزقزوقه الى المدينه المحروسه (الغردقه)
المسافه تقريباً 600 كيلو بايت
فيهم 3 كماين او هما دول اللى عدينا عليهم ..
اول كمين هو كمين العين السخنه
وده مالوش لازمه اساساً
ضباط محطوطين غلاسه
وبعدين راس غارب
المفروض يبقى اسمه راس الغراب
ده بقى اصعب كمين
بس اخوكم مبيهموش
انا مواطن مصري والغردقه مدينه مصريه ومفيش اي قانون يمنع مواطن مصري من التوجه الى او التواجد فى ارض مصريه
اه ومش من حق الضابط يعدي ناس وناس لا .. دي تبقى تفرقه ومخالفه للدستور اللى بينص على المساواه بين الجميع على ارض المحروسه ..
اخوكم اول ما نزل فى راس غارب
الضابط بيقولى بطاقتك اديتهالك
وبعدين انت بتشتغل ايه
الصراحه قرفت منه مش عارف اه الاسئله الكتيره دي
وانت مال اهلك انا بشتغل ايه
طلعت له كرنيه الهندسه لانى معييش غيره الصراحه
وبعدين قمت قايله الكلمتين اللى فوق دول قالى اركب العربيه
وطلعت من الكمين وانا مش مصدق
5 اتمسكوا من الميكروباص ونزلوا
لو كانوا قالوا انهم تبعي كنت عديتهم
وبعدين الاحياء و ده برضه مالوش اي لازمه
وصلت الغردقه وطبعاً وصلني الباص لعمي مباشره
هو عارف السكه والله انا معرفش ازاى
عجبني قوي اسم شارع هنا اسمه شيري
هو اصلاً بتاع واحده اسمها شيريهان بس بيدلعوها يعني
المهم الجو هنا بقى لا يطاق بيفكرني بجو قريه الفريق والسلامه احدي قرى مدينه القنفذه بمحافظه مكه المكرمه بالمملكه العربيه السعوديه
درجه الحراره لما تنخفض بتبقى 35
كان مالها اسكندريه بس
بس تقول ايه بقى فى الشراقوه !!!
ربنا يصبحك بالخير يا نوني قالتلى ياحمد محدش يروح الغردقه فى الصيف
عملت فيها شرقاوي ونفضت ..
المهم انا هبقى اكتبلكم باقي تفاصيل الرحله قريباً
في حاجات مهمه جداً ..
اسيبكم بقى دلوقتي ..

عجبي عليكي يا بلد
سلام ..

بيقولوا النهارده الثلاثاء

انا بقى فى الزقازيق من امبارح

روحت لدكتور السنان امبارح يلزق الضرس اللى بيتفك كل يومين ده

اما نشوف اخره الطرابيش دي ايه

الدكتور كتب تاريخ امبارح على الحيطه علشان يشوف الضرس هيقعد قد ايه

امبارح الصبح بقى كان صبح انما ايه

ياريت كل صبح يبقى زي صبح امبارح

وصلني تليفون بعد ماوصلت بالقطر من اسكندريه بساعه من مسز نوني بوسا ..

نوني : س/ انت فين .. فى الزقازيق ولا اليكس

أنا : ج / ليه ؟

نوني : رد على قد السؤال ياااض

أنا : خلاص آم سو سوررري

آم ان زقازيق ..

نوني : طيب انا نازله اجيبلك النتيجه

أنا : ليه بس كده متستريحي انتي انا هنزل اجيبها انا ..

نوني : لا انا نازله خلاص

أنا : طيب براحتك يا نمطيه ..

نوني : متقولش نمطيه

أنا : خلاص يا نمطيه

نوني : يووووه سلام

أنا : سلام

آه يا وداني .. قفلت على وداني بنت الــ ..

نزلت بقى اروح مشواري

ركبت تاكسي وقلتله المحافظه

لو قلت البنك الاهلى هيفتكر معايا فلوس ولا حاجه ويقولى هات 3 جنيه

البنزين غلى يا بيه

عربيه فيات 1300 ويقولى البنزين غلي

غلي مين يا اسطه ده احنا عندنا منها 3 ابويا بيمشهيم بالجاز وهما بنزين ..

وانت تقولى بنزين 90 انت اش عرفك الـ 90 ريحته ايه ؟؟

المهم روحت البنك

ودخلت خلصت اوراق الحواله وخليت مدام مش عارف ايه التخينه دي تمضيها لان استاذ عطيه مش موجود ..

المهم لسه قدامي 100 رقم

قلت بقى اتصل بنوني اشوف ايه الاخبار

ولسه بطلع من باب البنك للهوا بره

ببص لقيت نوني فوشي قدام ماكينه الـ ATM

بتسحب المصروف

يا محاسن الصدف يا ولاد

ده انا كنت لسه هتصل بيكي

بقولك ايه

انتى مش مامتك بتشتغل هنا فى البنك ؟؟

قالت اه

قلت تمام

خدى بقى الورق ده خليها تمشيني لان لسه قدامي 130 رقم

وعايزين نروح الجامعه نجيب النتيجه

بيقولوا اني استغلالي بس انا غلبان والله ..

وعايز اتجوز وابطل اروح لصباح وقصدي شريف

المهم مامتها نزلت وطبعاً ان امكسوف جداً بالبرمودا اللى انا لابسه ده

بس كان دويتوا جامد بقى بالنسبه للزقازيق

انا بالبرمودا والكاب ونهال بشعرها بقى اللى مجنني ده

المهم خلصنا الورق وطلعنا على الجامعه نجيب النتيجه بقى

علشان فى واحد غلس ابن (***) قطع الورقه اللى فيها اسمي

اكيد غلس مش اسمه احمد ..

روحنا لشؤون الطلبه بقى

وانا لا معايا كارنيه ولا معايا وصل مصاريف حتى

بس والله دافع المصاريف بس مفيش اي اثباتات

وبما ان البريء متهم حتى تثبت برائته نهال ادت الفراش رشوه 10 جنيه علشان يجيب النتيجه ..

وانا قاعد ولا فى دماغي وهيا واقفه فى الزحمه يا عيني

مش بقولكوا ندل من يومي !!

ام سعاد

جابت النتيجه ويا لسعادتي نجحت يا ولااااااااااااااااد

لاول مره فى تاريخ الكليات المصريه

انجح وانتقل للصف الثاني الجامعي ..

يا وشك الحلو عليا يا نوني يا حبيبة قلبي انتي

كانت حرانه عزمتها على كانز بقى واديتها دولار من معايا

يلا علشان ماحرمهاش من حاجه

ورحنا بقى وعدى اليوم على خير

طبعاً في تفاصيل مش فاكرها وتفاصيل مينفعش اكتبها

انا لغايه دلوقتي مش فاهم الهدف الاساسي من اختراع البلوجز

نكتب يومياتنا ولا ارائنا وافكارنا

ايه النيله المنيله بنيله دي ..

حاجه تخنق ..

ام حنان

النهارده بقى

مفيش حاجه مهمه غير انى مسافر باليل الى الغردقه

ولاول مره ازور المدينه اللى بسمع عنها من زمان

نفسي الف مصر كلها

بس مفيش وقت ومفيش فلوس ومفيش حد يشجع (كان زمان)

هروح بقى الغردقه واقابل السياح واتصور معاهم واتكلم انجليزي بجد بقى

وهبقى انقلكم من هناك اخر التطورات ..

اسيبكم بقى ..

سلام والى لقاء

منهم يا ناري

لاخد بتارى

وابكي عيونهم

لو شعري شايب

ابدأ من الزقازيق 8-8-2006 (آه لو كانت 2008 )

اتحرك من منزلى فى تمام الساعه الثامنه و 15 دقيقه مساءً

متجهاً لمحطه قطارات الزقازيق

للحاق بالقطار المتجه للاسكندريه فى تمام الساعه 9 مساءً

وطبعاً تأتي الرياح بما لا تشتهي السفن

وانت تريد وانا اريد والله يفعل ما يريد

يصل الى المحطه القطار المتجه الى بورسعيد

بعد قليل .. يدق جرس المحطه معلناً انطلاقه ..

واذا بالقطار يتوقف

والأمن يتحرك بسرعه فى المحطه

اخر مقطوره في القطار تشتعل

يا ويلي

وإذا بي اقتمص شخصيه المحقق الخطير

شرلوك هتلر

واخرج موبايلي الـ 6630 من انتاج شركه نوكياً

وابدا بتصوير الأحداث الساخنه

وانتقل من رصيف 3 الى رصيف 4 المعاكس للقطار

لاحصل على صوره اوضح

وبعد انتهاء الشرطه والمطافيء بالمحطه من اطفاء الحريق بالعربه

لمحني ناظر المحطه وانا شاهراً كاميرا موبايلي

وأطلق خلفي كلاب الحراسه فأنا أرتكب جريمة تصوير منطقه عسكريه

محظورة وأنا لا أعرف ..

ثم تم القبض علي بتهمه التصوير بدون تصريح

والقائي فى التخشيبه ومصادره الموبايل

ولولا اني كنت على معرفه سابقة بضابط المحطه

لكان الموبايل طار يا عبد الستار

خدت الموبايل بعد ما مسح الاندال كل الملفات التي قمت بتصويرها

وتفنيط الموبايل بحثاً عن اي صوره أخرى

وطبعاً اتفرجوا على كل حاجه من اول رقاصه اسكندريه لغايه صباح

وهاتك يا بلوتوثات

ظباط فاشله .. ولا ابن الظابط شمس بيه فرح قوي لما شاف الاندر وير بتاع الرقاصه

يلا حصل خير … المهم القطر بتاعى فاتني واضطريت اني اركب بيجو

المشكله بقى فاني كنت نسيت الحقيبه بتاعتي على الرصيف عندما اتجهت لتصوير الهدف والاستاذ كمساري العربه الثانيه المكيفه خدها وحطها فى القطر ..

يالهوي يالهوي كياس المكرونه والرز طارت ولا ايه

الراجل طمع فيهم شكله كده

روحت للناظر اتصل بمحطه بنها قالهم ان في كيسه مطلوب القبض عليها وتسليمها لناظر محطه سيدي جابر ..

وصلت اسكندريه بعد البوابه وقبل السيوف شماعه

نزلت ركبت سيدي بشر قبلي

ومن هناك سيدي جابر المحطه

روحت للشرطه واستلمت الشنطه بعد الادلاء بمحتوياتها

مش فاكر رقم محضر التسليم

بس كانوا شمعوها وحرزوها

تقولش فيها مخدرات

س انا احيي رجال الشرطه على دورهم ده

بس لا احييهم على دورهم اللى قبله

كان نفسي فى الصور

عموما انا هدور فى القانون بقى واعرف اذا كان من حقى التصوير ولا لا

وانا لو لى حق مش هسيبه

سلام

إصرخ بوجه اللي يظلم
إصرخ بوجه اللى يخون
اصرخ وصحي المنافق
اصرخ وصحي المخادع
يــا ضمير …

الله عليك يا كاظم
يا قيصر الفن العربي

اغنيه من اروع ما غني القيصر
اغنيه لا يا صديقي
طولها 43 دقيقه
اغنيه نادره ولم اعثر عليها بسهوله

المهم

اليوم هو السبت الموافق 4-8-2006
ومازلت بالاسكندريه بشقه ميامي
تمر الايام بي وتنقضي الاجازه بلا جديد
وبدون اي تقدم او تطور
الحاله الماديه شبه منعدمه
اعيش على الاعانات حالياً
تكاليف الحياه هنا باهظه جداً

لا اعرف لماذا

منهم لله اللى خانوني
منهم لله

لا اعرف سبب الحاله التى انا فيها منذ الصباح
اغاني لعبد الحليم وام كلثوم
فن اصيل لماذا لا افهم
مع اني بدات يومي بايمينيم
استيقظت على هاتف طلال احد عملائي بالمملكه السعوديه
صاحب موقع www.dqat.com
يخبرني ان منتدى الموقع قد اخترق ..
اصطبحنا بالاختراقات
وثغرات منتدى الفي بي الغبيه
والاطفال الذين يعبثون فى مواقع الناس ..
لا يوجد باك اب جاهز
ما العمل
هذا الموقع اللعين
حاولت نقله ولكن لا امل
حجمه تجاوز الـ 5 جيجا بايت

تحادثت مع سعيد مندوب مبيعاتي بالمملكه السعوديه
وتفقدت احواله واخباره

قمت بتوزيع بعض بانرات السكربت الجديد
سكربت خيمه الجوال في منتدى ترايدنت
ولم اطرح موضوع له بشكل رسمي الى الان
ولكنى نزلته فى موقع الاستضافه ..

قمت بنقل الموقعين الخاصين بالدكتور البيضاني الى السيرفر الجديد
وقمت ايضاً بطلب بيانات نطاق الشناوي للحاسبات
وقمت بنقل موقع الشاعر فيصل الشمرى ايضاً
قمت باعمال كثيره اليوم

نهال غائبه عن الماسنجر منذ فتره تجاوزت اليومين
لا اعرف لماذا
افتقدها قليلاً ..

اخر مره تحادثنا بخصوص تربيه الضفادع والناموس
واقنعتها اني كنت اقوم بتربيه ضفدع وعيناه خضراء وكان وافداً من فرنساً
كهديه من خال لي ..

كفاكم هذا اليوم ..
واعود اليكي قريباً يا مدونتي العزيزه ..

سلامي