مساء الخميس وفجر الجمعه
5 من شهر 5 سنه 2006 (آه لو كانت 2005 )
اللهم لا حسد
وعين الحسود فيها عود
وعضه اسد ولا نظره حسد
مش عارف انا الشعب ده خايف يتحسد على ايه
الله يخربيتكوا ده انتم من افقر شعوب العالم
عندنا نسبه من الامثال الشعبيه تغيظ
اللي يسمعها يفتكر مثلاً اننا سويسرا ولا حاجه
ده الغني في البلد دي عنده 5 آلاف جنيه في البنك وعامل باشا وراكب
عربيه 128 فيات ايطالي ويقولك مطابقه للمواصفات الاوروبيه
امال لو زي ناس حبايبنا بيركبوا عربيه بـ 5 مليون $$ من الاخضر
انا مركز على رقم 5 علشان محدش يقول اني بحسده ولا حاجه
على فكره بكره الجمعه
يعني الاجازه الاسبوعيه
انا ملاحظ انى مكتبتش حاجه مفيده الاسبوع ده
الشهر ده مش Funny زي اللى فات
احمد منسي بيقولى يمكن علشان مفيش احداث
احداث ايه بس احنا خلاص لو اتمسكنا هنروح اللومان علطول
مفيش اي تطورات على اي الصعيد العاطفي
مالناش دعوه بالصعيد خالص
النهارده محمد اخوي الصغنطنط اللى فخمسه ابتدائي اداني حته سؤال
محرج بس في الزاويه القائمه 90 درجه
هيا الدوله المحتله هيا اللي بيقع عليها فعل الإحتلال ولا اللي بتقوم بفعل
الإحتلال ؟؟؟ وتخيلوا بقى قالى هديلك ربع جنيه لو عرفت
الصراحه اول مره اعرف اني فاشل في اللغه العربيه
انا اللى من اولى ابتدائي لغايه 3 اعدادي بتكلم الفضحى معرفتش ارد
على سؤال اخويا اللى عنده مش عارف كام سنه
بخصوص قانون الطواريء اللى شعب مش عارف عنه حاجه
بيقولوا ان الحزب الوطني (حبيبي << الأخ عضو حزب وطني هههه )
بيناقش طرح مشروع مكافحه للارهاب ليكون بديلاً لقانون الطواريء
وبلا فخر كنت انا صاحب الإقتراح بالقانون الجديد (من يومه حرامي وعايز
يدخل التاريخ بالعافيه ) ..
مش عايزين تفشوا غلكم في شارون شويه
خدوا العبوا في كرشه (بطنه بالعاميه المصرية) << الاخ فاكر ان في اهتمام دولي بالمدونه بجد
http://www.feckra.net/il/KillSharon.swf
ياما حليتلك آهاتى وهيا من قساوتك انت والأيام عليا
كنت تسمعها نغم .. واسمع صداها نار ..
والله مفيش احسن من الست ام كلثوم
ونانسي عجرم
النهارده فى الدرس عند مستر علاء الطويل الله اعلم ممكن يكون اسمه
هاني اصلهم اتنين وانتم عارفين انا عندي زهايمر مبكر واحد طويل وواحد
قصير وتخين المهم الطويل اللي كان علينا
واحنا قاعدين مين دخل علينا
تخيلوا
وانا اللى كنت فاكر المستر بيهزر معانا
تخيلوا نانسي عجرم جت قعدت معانا فى الدرس
كان زمان بيقول انه في حاله واحده بس ممكن يستنى فيها بنت وتتاخر
عليه .. بس لازم البنت دي تكون نانسي
هبقى اجيبلكم صورتها
وانا ماشي من ميدان القوميه في محل بتاع فساتين نسائي
عجبني فيه فستان جداً بفكر اشتريه لنهال بس مش عارف بمناسبه ايه
بس انا حاسس انه اتعمل علشانها
فلوسه كتير وبيطيرها بقى
يلا سلام وهتوحشوني
أحدث التعليقات