مدونة أحمد هتلر

ميدو بيقولى انت مكتبتش موضوع يوم الجمعه ليه ؟

انا اليوم الممل فى الاسبوع عندي هو يوم الجمعه

مبيبقاش فيه احداث جديده ابداً

علشان كده متسالوش عن الجمعه تاني

…..

النهارده انا مش عارف اكتب عن ايه

عن اليوم المعتاد فى الجامعه ؟؟

يعني اهو الواحد غير بدل كوكا كولا كانز بقى بيشرب ماونتن ديو

تغيير بقى وتحطيم للروتين والنمطيه

ومفيش جديد

نفس الولاد ونفس البنات

نفس الوشوش ونفس الدكاتره

حتى ان الواحد بيحس ان نفس المحاضرات بتتشرح

تقولش الواد بيحضر محاضرات

اللى شد انتباهى اكتر انى لقيت الاخوان المسلمين حاطين

لافتات مكتوب عليها لا للطواريء

انا الصراحه فكرت انى اعمل زيهم واطبع 1000 لافته والزقهم فى الزقازيق

واقول نعم للطواريء

هو انا مش مواطن مصري ؟؟

هو انا مش ليا حريه التعبير والرأي ؟؟

ومادام فى ديمقراطيه يبقى لازم كل واحد يعبر عن رايه

هما شايفين انه لا للطواريء

انا شايف انه لازم قانون طواريء

انا كان عندي نص القانون على الجهاز بس مش عارف راح فين بس

هجيبهلكم قريب ..

يا جماعه انا شايف القانون لصالح المصريين بكل المقاييس

ماهو لو مفيش قانون طواريء هتبقى فوضى

مش عارف انا ايه الاخوان المسلمين دول

يا اخوان انتم منظمه فاشله سياسياً

ايوه فاشله سياسياً

لو اتشال قانون الطواري هتبقى مجازر وهنبقى جزائر تانيه ولا نسيتوا اللى

حصل في الجزائر ؟

عملتم ايه يتحسب لكم ؟؟

اى واحد فاكر ان الاخوان المسلمين بقوا تجمع او حزب او قوة فى البلد

يبقى غلطان

في فرق كبير بين انك تكون قوه بانجازاتك وانك تكون قوه بمزاج الحكومه

فى واحد امبارح جاى بيقول ان اسوأ عصر عدى على مصر هو عصر مبارك

الاخ شكله مكانش عايش ايام السادات

وما بيقراش تاريخ حتى 30 سنه ورا

خير الامور الوسط ..

فينك ياسادات

تيجي ترميهم كلهم فى المعتقلات علشان يعرفوا ان الله حق ..

—

بعيداً عن الصداع والدوشه

أنا شباب ولازم أعيش حياتى

مش لازم اتشدد والبس جلبيه لغايه تحت الركبه بـ 10 CM

ولا دقني تبقى 15CM علشان ابقى مسلم

وبرضه مش لازم ابقى منحرف قوي يعني

يعني خير الامور اوسطها

ليه الناس كلها تبقى ماشيه في طريق وانا امشي في طريق تانى

مع اقليه انا مش مقتنع بصحتها

والقانون مش مقتنع بيها

واغلب المجتمع رافضها ورافض مبادئها المتشدده ؟؟

انا عندي اساس .. اى شيء بني على اساس ديني فى مجتمع فيه

اختلاف ديانات لازم يبقى فاشل بكل المقاييس

انا عاوز انزل اتفسح واخرج .. عاوز اعيش فتره الشباب بحريه

مش عاوز قيود من اي شكل

لا من حكومه ولا من متطرفين

سيبونا نعيش في امان وريحونا

بلا سياسه بلا قرف بلا وجع دماغ

اتخانقوا بعيد عننا

متخلوناش ماشيين فى الشارع خايفين ان واحد يفجر نفسه فوسطينا

متخلوناش ماشيين بالليل نتمسك تحري (انا مستثنى من التحري قانوناً)

ارحمونا وخلونا نعيش كلنا على ارض مصر فى امان وسلام

خلونا نحب بعض .. ليه منبقاش الاخوان المصريين

بدل الاخوان المسلمين ؟؟

انا رايح انام لانى تعبت الصراحه

الناس دي مش هتسكت الا لما مصر تبقى كلها معتقلات

لما الامن المركزي يديهم كل واحد علقه محترمه

لما تتصادر ممتلكاتهم ولما يمنعوا من ممارسه اي نشاط سياسي

عايزين يشيلوا الطواريء علشان يعملوا اللى هما عايزينه براحتهم

خونه وعملاء .. ممولين من الخارج أكيد طبعاً

مهما كان شعارهم الواضح انهم منهجهم الاسلام

عموما ممكن اكون انا غلط

الله اعلم

بكره كله يبان ..

موقع حقوق الانسان فى مصر
موقع الاستهبال الشعبي والافتراء والمبالغه واللامنطقيه
http://www.eohr.org

المواقع دي متسابه ليه ومش محجوبه فى مصر

علشان مفيش ديمقراطيه صح

مانتم لو عايشين فى السعوديه كنت عرفتم ان الله حق ..

بس اللى عايش فنعمه مبيحسش بيها الا لما يتحرم منها ..

سمعتم السبب في تفجيرات سيناء

بدو سيناء عايزين يحرروا سيناء من الاحتلال المصري ..

غريبه يا انشراح !!

ما شاء الله بقى في اهتمام دولى بالمدونه بتاعتي

تقولش صحفي فى الاندبنت ولا الدايلي بروجريس

والناس كلها بقى منتظره صدور آخر التصريحات

انا انفي اي علاقه لي بتفجيرات شبرا الخيمه

شبرا خيمة الإستضافه مش شبرا الدقهلية

وعلى فكره مصادر التمويل أجنبيه على رأي (بدون ذكر أسماء لغايه اما يلاقي حلاق يحلق دقنه)

وبعدين بقى فى الانفجارات بتاعت كل يوم

الواحد كده لما يمسك الحكم مش هيلاقي شعب يحكمه

ولا هيلاقي شرم الشيخ يصيف فيها

منك لله يا هيثم

طيب ابنى كده هيمسك الحكم ازاى

والناس يقولوا لا لتوريث الحكم

وعزبه احمد هتلر

واطلع بقى في القنوات الشرق اوروبيه

والقي التصاريح الخاصه

واجى بعد سنه من الحكم واعمل زي واحد صاحبنا واقول ان مصر توصلت

لتخصيب اليورانيم

ومجلس الامن يقول لا مجال لاستخدام الحل العسكري مع الزقازيق

كفايه كده انا جالي جواب من امن الدوله

الحكومه < < ده أنا بموت في الحكومه وبعشق الجنيه

بس ياريت تحطوا صوره واحده من السياح عليه

ولا بابا مبارك

ربنا يخلي بابا مبارك وماما سوزي

محدش شافها يوم الكاس بتاع الامم الافريقيه وهيا بتتنطط

فرست ليدي بجد … مفيش منها في الكليه الفقر بتاعتنا دي

لي عوده .. برب فور ناو

والله مالي نفس اكتب اي حاجه

مخنوق جدا

متضايق جدا

جوايا غضب ماليني

جوايا حزن جوايا ألم

النهارده عيد الربيع

او شم النسيم زي مابنقول كمصريين

بس مع انه عيد واجازه الا ان كل المصريين اكيد زي مش فرحانين

ده موضوع فى منتدى انا مشترك فيه باسم HETLAR4U

http://www.traidnt.net/vb/showthread.php?p=1394066

مش حرام اللى بيحصل لينا فمصر

مش حرام اللى حصل في دهب

انا متاكد انهم قالوا للى فجر القنابل دي

* انت مكانك مش هنا
- امال فين ؟؟
* مكانك فوووق
- فوق فين ؟؟
* مع الصديقين والشهداء

اكيد شفتوا السفاره فى العماره بتاع عادل امام

الناس دي فعلاً ماشيه بنظام واحد

لا تناقش ولا تجادل يا أخ علي

حاجه بنت كلب

انا لو عرفت مين اللى عمل كده هقتله بايدي

لا واللى يخنق اكتر انى الاقي عضو فى المنتدى باسم حسني مبارك

هههههههه

اعمل ايه فى الشعب ابن الرايق ده

عاصم بيقولى تعالى ننزل الجامعه بكره نعمل مظاهره

ربنا يخربيتك ياعاصم

بكره اجازه تحرير سيناء يعني الجامعه قافله

قلتله ميت مره يغير الصنف مبيسمعش الكلام

بقوله عايز تعمل المظاهره ليه وهتقول فيها ايه ؟؟

عايز يطرد صاحب البيت

الله يخربيتك يا عاصم بجد

قلتله تخيل يا عاصم تصحى من النوم بكره تلاقي مدرسه جمال عبد الناصر الثانويه للبنات متفجره بكل الطلبه اللى فيها

ولا تصحى ليه مانت هتتفجر معاها مانت بيتكم لازق فيها

ممكن والله يفجروها .. بس حرام البنوتات الحلوه دي هتتعور

ياه المدرسه دي كان لينا فيها ذكريات ايام ثانوي عام

فين ايام ما كنا بنط من على السور وندخل نقعد مع البنتوتات الحلوه نذاكر مع بعض

ويجي الفراشين يجروا ورانا

بس الصراحه اصل البنات هناك وبنات القوميه عموما مغريين

واحنا على قد حالنا غلابه يابا تقولش ياخويا قاعدين فى باريس

بنات ايه من اللى قلبك يحبهم وانا بقى ايه كنت لسه مراهق

ويا سلام بقى على الدروس الخصوصيه .. ولا المقررات

المقررات هناك سهله مقولكوش

بمناسبه المقررات السهله

انا مش عارف حكيتلكم عن البنت اللى اتصلت بيها على الموبايل وخربت بيتى 63 دقيقه وكانت قالتلى ان اسمها قمر

النهارده بعتتلى رساله مصورة (كل سنه وانت طيب)

كنت قايلها ان عيد ميلادي الاسبوع ده

الاخ فاكر نفسه عادل امام .. وهيقضيها اعياد ميلاد

هيا قالتلى ان اسمها شاديه

عموما شاديه قمر مش فارقه .. كلهن سواسيه

ومنك لله يا سوسن بوظتي المفاهيم العامه

دعواتكم لاخوكم جوليو وحبيبته روميت

تعلن جماعه أحمد هتلر مسؤوليتها الكامله عن تفجيرات دهب بالامس

وسيتم نشر كل التفاصيل الخاصه بالعمليه الجهاديه قريباً تابعوا التطورات ..

الجبهة الاعلاميه للجماعه ..

خخخخخههههههه

اراهنكم ان ده اللى هيتقال بكره في التليفزونات

هتطلع جماعه عبده الاقرع وتقول احنا اللى فجرنا دهب

خلاص يبقى اعلن مسؤليتى انا عن التفجيرات

وانا بقى بقعد على الانترنت كتير

وجبت تفاصيل صنع القنابل من موقع بمبه دوت فرقع

وكنت فكليه هندسه قبل كده وليه خبره في صنع الالكترونيات

ولي معاونين اهمهم ..

حماده زيته اللي بيشتغل في احد محطات البترول

سلام بقى هبقى اقولكم باقى الاخبار من داخل السجن بتاع امن الدولة ..

خخخخهههه

معرفش ابدأ إزاى ومنين
من الاول خالص
انا كنت عند رفعت للساعه 6 الصبح بنتفرج على افلام فى الابتوب
وبعدين روحت ونمت وطارق اتصل بيا الساعه 11 انزله الجامعه صحيت ونزلت ..
ورجعت نمت
بس انا كنت فرحان جدا
فى حاجات كتير مينفعش الواحد يكتبها .. قيود للحريه حتى فى الانترنت ..
المهم بعد الجامعه روحت البيت ونمت شويه ونزلت على ميعاد الدرس الجديد للشريعه اللى نهال قالتلى عليه .. كان المفروض تستنانى الساعه 7 قدام مكان الدرس بس انا وصلت وهيا اللى جت متاخره
اثناء الدرس كانوا بيتخانقوا ليه احنا مانخدش اجازه النهارده زي المسيحين
المستر بيقول اننا مسلمين وهما مسيحين وده عيدهم
انا وقفتله بقى :
قانون المواطنه بينص ان جميع المواطنين متساوين فى الحقوق والواجبات ولا فرق بينهم نظرا لدينهم او معتقداتهم الخاصه ..
واشمعنى هما بياخدوا أجازه فى الأعياد الإسلاميه
انا اطالب بالمساواه

من اول حصه شغب واعتراض ومظاهرات ومش هنسلم مش هنبيع مش هنوافق عالتطبيع ..
صاروخ ياشريف .. مش قوي كده

المهم طلعت من الدرس كان نفسي الصراحه اشوف نهال بس لقيتها مشيت .. ولاد الكلـــ … سواقين التاكسيات ولا واحد منهم عايز يروحني ..
انا زهقت من البلد النحس دي ..
بلا زقازيق بلا قرف .. حاجه تخنق
المهم روحت وبنادى على رفعت رد بيقولى نازل
بعد شويه رنيت تانى طلع لقيته بيزعق وبصوت عالى جدا
مش نااااااااازل
ايه ياعم هيا الحرب قامت ولا ايه
وقام داخل ورازع باب البلكونه
طلعت بتصل بيه مبيردش عليا .. شكل الحاج ابراهيم قارفه كالمعتاد

اسيبكم بقى دلوقتي ..
باي

الظاهر ان يوم الجمعه ده بقى ممل علطول

ربنا يخلي بريتني سبيرز

عندي حاله لا مبالاه وغياب عن الواقع

مش فاهمين حاجه … احسن لاني انا كمان مش فاهم

فعلا احنا بنحط القانون علشان نخالفه

كان معكم من امام الابتوب احمد هتلر ..

الابتوب ده made in ZaGazeG

اي بي ام مصر