انطلقت يوم الثلاثاء 16-1-2007 الى عاصمتنا المحبوبه القاهره
ركبت البيجو (504) الى عبود ونزلت المؤسسه وركبت المترو لغايه محطه مبارك
كان المفروض انى هقابل محمد صاحب موقع طرب قطر www.6rbq6r.com فى كافيه فندق هلتون رمسيس … اول ما نزلت فى مبارك وطلعت بره المترو افتكرت ان هلتون رمسيس ده فى التحرير مش رمسيس 
نزلت ركبت المترو تاني والراجل كل 5 دقايق يتصل .. ها وصلت اقوله لا لسه دقايق واكون عندك ..
ركبت المترو ونزلت فى محطه انور السادات وبعدين اكتشفت انها مش المحطه المطلوبه من الخريطه الموجوده فى المحطه اللى بتوضح خط السير … ولقيت نفسي بعيد جداً عن النيل .. استنيت المترو التاني وركبت لغايه محطه جمال عبد الناصر ..
نزلت من المترو للمحطه وانا خارج سحبت فلوس من الـ ATM لان مكانش معايا غير 20 جنيه 
طلعت من المترو للميدان المنظر كان غريب عليا المره دي … تاكسيات صفراء انا كنت اسمع عن مشروع تاكسي العاصمه بس مشوفتهاش كده تاكسيات نضيفه وعلى الزيرو زي ما بيقولوا .. يجوا يشوفوا تاكسيات الزقازيق ..
طبعاً رهبه ميدان التحرير المعتاده الميدان واسع وكبير وفنادق ومباني من الحجم الكبير حوليا وقدامي متحف القاهره وعربيات سريعه بتعدي وناس كتير بتجري يمين وشمال واتوبيسات النقل العام اللى عفا عنها الزمن جايه من عبد المنعم رياض ..
عديت الطريق ومشيت علطول وانا بسمع داليدا "حلوه يا بلدي" وبتفرج على العمارات القديمه اللى على يمين المتحف .. وصت لهلتون رمسيس وقابلت محمد وبعدين طلبت نسكافيه مش عارف جابولى كوبايه طويله شويتين كده فبقول لمحمد بيتهيالى انى طلبت نسكافيه .. فقالى هوه ده النسكافيه .. قلتله ياراجل هوه بقى عائلي
المهم بعد ساعه من النقاش حول البرمجه والتطوير محمد بيقولى عندك كام سنه فقلتله تديني كام فلقيته بيقولى 25-26 فقلتله ياراجل انت بتهزر ده منظر 25 برضه !!
انا عندي 20 سنه لقيته راح مستغرب كده .. وبعدين قالى العمر كله ..
مش عارف ليه الناس بتستغرب اني ليا علاقات دوليه وانا عندي 20 سنه
مفيش شويه وباشر واحمد عبد القادر (زمايلي من ايام مودرن اكاديمي) اتصلوا بيا وقالولى قدامنا ربع ساعه ونكون قدامك .. الهم محمد خلاص قايم هيروح وانا قلت اطلع بقى اقابل الشباب … بالصدفه لسه طالع من الكافيه ومشيت خطوتين فلقيتهم قدامي كانوا بيتصلوا بيا وانا قدامهم .. باشر شافني واحمد قمت ناطط عليه زي القضى ازيك ياواد واحشني موت .. وبالاحضان وضي القناديل بقى وكده بقالنا زمن مشوفناش بعض ..
معلش يا ولاد انتوا عارفين انى ندل
الصراحه مكنتش مستريح لوجود باشر فى الموضوع لاني انا وباشر ده عكس عكاس او خلف خلاف من الآخر .. مش علشان هوه كان فشرطه قبل ما يجي الهندسه ولا حاجه بس زي ما تقولوا كده هوه من الشخصيات اللى بتخلى السوسته هتتفتح من كتر الانتفاخ …
المهم طلعنا على مول طلعت حرب .. ودخلنا السينما اللى فى الشارع اللى جنبه علطول كان فيلم مطب صناعي وبجد الفيلم ده عجبني لدرجه انى شوفته للمره التانيه مع احمد منسي يوم الجمعه 19-1-2006 ..
المهم بعد ما خلصنا الفيلم طلعنا نروح بقى .. كنا خلاص انا وباشر وصلنا للدرجه الخطره والموضوع كان هينفجر لولا انا احمد طلب منه انه ميكلمنيش خالص احسن له ..
ركبت تاكسي انا واحمد وطلعنا على المقطم .. كنت واكل زنجر سبايسي وبطني مش عارف مالها جالى مغص فظيع .. الله يخربيت كنتاكي .. آمين ..
المهم طلعت فى البلكونه فبص كده لقيت منظر عجيب جداً .. 4 عربيات واقفين ورا بعض .. بس المشكله كلهم عربيات لونهم أحمر ..
المهم كلمت احمد منسي قبل ما انام .. بساله عن الشغل لقيته بيقولى بكره يا احمد الموقع هيكون خلصان .. الواد ده على فكره مهمل ومبيلتزمش بمواعيد .. حسبي الله ونعم الوكيل فيك يا منسي مش عارف ليه عايز اعمل فيه زي الصوره دي كده ..
بس قلت ياله مش مشكله اما نشوف آخرتها معاه .. نزلت تاني يوم البنك الأهلى فرع المقطم الموجود فى نفس المسدان قدام عماره احمد .. الساعه كانت 1 تقريباً استغربت ان البنك فاضي جداً ودخلت على دوري تخيلوا كان 120 تقريباً هنا فى الزقازيق احياناً ببقى 500 فما فوق لما كرهت البنك اصلاً .. يلا بقى ربنا يخليلنا استاذ عطيه ومامة نوني ورجعت يومها بالليل الزقازيق بعد ما كنت خلاص هفرقع من باشر … وها انا فى زقزوقتي الحبيبه .. كان عندي امتحان النهارده تاريخ قانون الحمد لله حليت كويس وطالع قبل نص الوقت كمان استني فى نهال تطلع مفيش وبعدين ببص لقيتها واقفه مع زياد ايه يا نهال عملتى ايه .. عيطت قلت اهلاً انتى يابنتي احسنلك تنتحري .. اللى غاظني اني لما اديتها منديل خدته وهيا كان معاها علبه 
المهم بقولها ده انا اللى مش مذاكر حليت حتى السؤال الأول بيتكلم عن الحسبه ونظام المظالم فى العصر الاسلامي واللى ها كذا وكذا بتقولى انا كتبت الحاجات دي فى سؤال تاني لا وبتعيط شوف البجاحه .. ويوم ما كنت فى السينما يوم الجمعه انا ومنسي تقولى روح ذاكر ياحمد .. وهيا بتتفرج على ستار اكاديمي
المهم كده فاضل امتحان الإنجليزي ويبقى انتهينا من الترم الاول للعام الثاني بكليه الحقوق .. وادعولى بقى ..
أحدث التعليقات