مدونة أحمد هتلر

كنت قاعد بفكر فى انواع الجرائم المصريه .. وخصوصاً جرائم التعاطي
وبعدين استغربت من حاجه .. ليه انواع المخدرات اللى بتسبب ادمان واللى ممنوعه قانوناً بقت منتشره عادي وعلنى فى الشوارع وعلى القهاوي ..
بقى طبيعي جداً وانت ماشي فى اي شارع رئيسي مش جانبي كمان انك تلاقي مجموعه شباب ملموم على عربيه بيدوا بعض ابر .. تشم ريحه بانجو من المميزه ..
مين اللى استخدم سياسيه التعميم دي ؟
تخيلوا ان مراهق الثانوي بدل ما كان بيجرب السجاير وهو خايف بقى بيجرب البانجو او الحشيش بدلاً .. كنا غلابه قوي مش كده ..
مش هتكلم بقى عن وازع ديني او وازع مجتمعي ولا حتى قانوني لان الظاهر كده ولا واحد من دول بقى ليه اي لازمه فى المجتمع ده ..
تخيلوا صحيح لما يبقى حجز الشرطه فاي قسم بتتباع فيه المخدرات للمحتجزين علناً كده ..
الصراصير .. الصراصير دي موضوع تاني مهياش الصراصير اللى بنشوفها فى المطبخ ولا على الحيطان دي صراصير من نوع تاني واللى بيتعاطاها بيتقال انه مصرصر .. الصراصير دي حبوب صغيره من الادويه يقال انها بتخلى متعاطيها شايف كل حاجه قدامه صراصير .. والمشكله انه عايز يموتها كلها .. وتبدأ المهزله ..
وتسمع حكاوي المصرصرين تحس انك بتسمع قصه كوميديه بس للاسف انت بتسمع مأساه انسان .. كان انسان ..
تعالوا بقى نشوف دور المكافحه .. فى مجتمعنا المتفكك ده معتدش فى اي مكافحه من المجتمع .. لان الكبير والصغير بقى بيحشش وبيشرب بانجو فى جميع الطبقات ..
وحتى الناس اللى ربنا هاديها بتقول واحنا مالنا .. سلبيه ..
الاعلام بدا فى الفتره الاخيره يهتم بالموضوع بس للاسف انا شايف انه دور هزلى .. ومش هيفيد في اي حاجه .. طول ما المخدر نفسه موجود فى الشارع فى الحاره فى علبه السجاير فى المحفظه .. يبقى نقضي أولاً على المخدر ..
مش عارف ليه فى مصر تقدر تجيب مخدرات اسهل من انك تجيب بنت منحرفه ..
لغه الادمان بقت اسهل من لغه الجنس
رأيي انا بقى فى الموضوع ..
انا شايف انها كلها مواد بتودي عقل الانسان فى داهيه .. تغييب يعني ..
ليه مثلا ما يتمش توجيه الشباب ده لاستهلاك الخمور بدل المخدرات واهي تبقى اول الطريق على الاقل الخمور مش ممنوعه قانوناً وثانياً ضررها ااقل بكتير من ضرر المخدرات ..
ليه منوجهش طاقات الشباب دول بدل ضياعها فى المخدرات والاجرام ليه منوجههاش مثلاً للممارسات الجنسيه ..
ليه ثقافه التعاطي محصوره فى الحشيش والبانجو ؟
ليه النسبه اللى بتتجه للخمور اقل بكتير ..
انا فكرتي اننا مش هنقدر نمنع المدمن مره واحده
ومش هنقدر نمنع الشاب من انه يتمتع بنشوه التجربه والتغييب
بس نقدر نقدمله البديل السليم .. اللى نقدر نسيطر عليه بيه …
ياترى نقدر نعدل ثقافه الادمان من المخدرات للخمور ؟؟