مدونة أحمد هتلر

بس بدايه هبدأ التدوينه بشكري للمحافظ الحالي المستشار يحيى عبد
المجيد ومحدش يفهم انها دعايه زي ما بنقل أدبنا على اللى بيخطيء
لازم نشكر اللى يعمل حاجه علشانا ولو كان ده واجبه بس من بابا
التشجيع وليس الإعتراف بالجميل …

هتقولولي ليه بقى موضوع الشكر ده … هقولكم الموضوع مش شكر ولا
حاجه كل الموضوع ان الراجل عمل حاجتين جداد علينا فى البلد .. وأول
مره يتعملوا .. وبكده هيدخل تاريخ الزقازيق المجيد

هتقولولي إيه هما بقى الحاجتين دول ياض صدعتنا .. أقولكوا اولاً
شركه النظافه الخاصه اللى نازله فى الشوارع كنس بعمالها الشيك اللى
لابسين يونيفورم واحد كلهم كده وعمالين يعملولنا أمان لرمي
النفايات فى الشوارع وعلى الأعمده أسوه بشركه اونيكس فى إسكندريه
عقبالنا يارب لما نبقى فنضافتها يارب ..  

الظاهر المحافظ شم خبر انى ناوي اعمل حمله الـ
100 ألف مقلب زباله وقال يبوظهالى من قبل ما ابدأها الحمله كانت
عباره عن تصوير 100 ألف مقلب زباله في الزقازيق وانشرهم هنا على
الإنترنت .. هتقولوا ايه بقى واحد فرحان بالموبايل الـ N90 الجديد
..

طبعاً طلع مع الشركه الجديده اشاعات جديده وكلام
جديد لسه او مره نسمعه ..
واحد منهم بيقول ان الشركه دي بتاعت الشيخ صالح .. وسمعنا كمان
انهم هينزلوا مصاريف على فاتوره الكهرباء للنظافه .. وبتوع حقوق
الإنسان ييجوا يهيصوا عرفت كمان انهم هيخلوا المصاريف فى القوميه
اغلى من المناطق التانيه .. هناك الناس أغنيا

 

الحاجه التانيه بقى هيا إن فى محطه غاز للسيارات جاري إنشائها الآن
مكان "وابور التلج" سابقاً واللى بيقولوا انه اتوقف العمل فيه لانه
بيلوث البيئه .. وبمناسبه البيئه عايز ابعت للسيد المحافظ مع
التهنئه حاجه يعملهالنا كمان ..
دي صوره لمصنع الزيوت والصابون اللى جنب الجامعه يالريت ده كمان
بالمره يتشال من هنا لانه يعتبر مصيبه بيئيه فى منطقه اصبحت الآن
سكانيه من جميع الإتجاهات .. حفاظاً على صحه طلبه الجامعه ياريت
يتشال او يتوقف العمل فيه او يتم فرض قيود بيئيه على المصنع اكتر
من كده ..

مع الإعتذار لأستاذ شلبي اللى متبرعلنا بمدرج
كامل فى الجامعه .. المصنع بقى خطر علينا ..

وكفايه عليكم كده النهارده لازم اروح انام نفسي
انام بدري مره واحده علشان اصحى واروح الجامعه …
على فكره انا مش تبع كفايه ولا حاجه .. انا عضو فى الحزب الوطني
الديمو قراطي ..
وخلو بالكوا من الديمو

غريبه يا انشراح …