مدونة أحمد هتلر

تيررم تيررم ده أنا حتى بفكر اسمي بنتي تيررم .. هع
ممكن برضه ليه لا .. ده حتى إسم جديد ومش نمطي
تيررم تيررم ..
كان المفروض انى انزل يوم التلات والاربع بس بما انى مدمن نوم والجو بدأ يسقع
فانا عامل بيات شتوي …
كان المفروض انى اروح الجزب الوطني علشان اعمل عضويه
آه علشان أتمتع بحقوقي السياسه .. هع هع
بيقولولي إنت منافق رايح للحزب الوطني علشان هو حزب الأغلبيه والحزب الحاكم ..
قلتلهم يا جماعه الحاكم فمصر هو مبارك مش الحزب الوطني
مفهمونيش ..بتقولوا ماهو الإتنين واحد .. ممكن برضه مادام مقتنعين بكده ..
قلتلهم يا جماعه لما يبقى عندنا خلل لازم نحاول نصلحه وان كان مفيش مجال لحزب تانى غير الوطني يبقى نصلح من داخل الوطني ..
فهمتوا حاجه ؟
يقولولي من إمتى الكلام ده مانت طول عمرك بتقول ان النظام الفاشل يجب بتره وإنشاء نظام جديد ..
والله ياجماعه بقى مش فكل الحالات مادام في أمل ان النظام الحالي يتصلح
والله انا حاسس ان صحابي دول شراقوه مش عارف ليه
كنت امبارح في الجامعه .. معرفش كنت نازل ليه الصراحه .. مفيش سبب هام
اهو تضيع وقت وتغيير جو ..
علاقاتي النسائيه فى تدهور اليومين دول مش عارف ليه ..
بس شكلى كده هدور على علاقات جديده .. مانا اصلي زهقت من القديم ..
مش كل القديم
انا كل ما بنزل الجامعه (بنزلها نادراً) بكتشف حاجات جديده وغريبه
ممكن بالنسبه ليا بس بالنسبه لناس تانيه حاجات عاديه لانهم بيشوفوها كل يوم ..
من الحاجات دي الست لبنى اللى بعضنا عارفها ومتصاحب عليها كمان
لو عايزنها هتلاقوها عند كليه علوم قدام مدرج شلبي
بتعدي كل يوم من هناك وبتقف مع الطلبه وتتكلم معاهم ..
لما كنت بشوفها من بعيد وعلى حسب ما سمعت من الطلبه افتكرتها مختله عقلياً
لكن لما تقرب منها وتتكلم معاها هتلاقي انها تنفع مصلحه اجتماعيه او دكتوره نفسيه !
اسلوبها فى الكلام بيدل على شخصيه راسخه ورزينه من وجهه نظري مع انى متكلمتش معاها كل الموضوع اني شفتها بتتكلم مع واحد صاحبي .
الله اعلم وجودها فى الجامعه شرعي ولا لا ممكن تكون موظفه فى الجامعه كفراشه او اي شيء آخر الله اعلم .
لكن اندماجها وسط الطلبه اللى شد انتباهي ليها وكتره كلام الشباب عنها شوقني انى القى نظره عن قرب
عموماً قريب هبقى اكتبلكم تقرير عن الست لبنى ..

حاجه تانيه من الحاجات اللى شدت انتباهي هيا الأطفال المتسولين ودول بقى منتشرين برضه عند طب وهندسه وعلوم هتستغربوا انهم بيروحوا لكليات القمه ..
اقولكوا ليه الموضوع مالوش دعوه بالتنسيق
كل مافى الموضوع ان الطبقات العليا من المجتمع وولاد الذوات بيبقوا قاعدين هناك بيمارسوا نشاطاتهم اليوميه والجامعيه ..
وسايبين بقى الفلاحين والطبقات الدنيا من الشعب عند تجاره واداب وحقوق وتربيه
ممكن تلاقي شويه من الأغنياء عند تجاره انجليش بس معندهمش شحاتين ..
ممكن لانهم مزروعين فى وسط الفلاحين
وطبعاً المتسولين الصغيرين تلاقيهم عند الشباب اللى معاه فلوس
هما اعدادهم مش كتير بس ملحوظين وده لانهم كلهم فى متوسط اعمار 6-10 سنين وبالتالى الفرق السني بينهم وبين السن المفترض وجوده فى الجامعه واضح ..
ليهم اساليب غريبه فى التسول وجديده فنفس الوقت ..
طول عمري كنت بنزعج من المتسولين فى القطارات وهرباً منهم كنت بركب فى العربات المكيفه .
يوم الإتنين وانا امر بجوار هندسه انا وبنت طويله شويه نطت لنا واحده من الشحاتين
ياريتها كانت بتبيع حاجه مناديل مثلاً
كان باين عليها مش ناويه تسبني الا ما تاخد ربع جنيه ومسكت فرجليا وحلفت بالطلاق ما تسبني الا ما تاخد الربع جنيه .. يابنتي مبشيلش فلوس فكه
قالتلى هات نص جنيه … عبيطه دي ولا ايه
وطبعاً الموقف كان محرج فالبنت اللى معايا اديتها ربع جنيه
قعدت تدعي بقى ويارب تتجوزها ..
اتجوزها
هاتى يابنت الـ … الربع جنيه  …
وطلعت تجري قلت انا مش هسيبك النهارده ..
وراكي وراكي ..
مفيش شويه ولمحتها عند الكافتريا وراحت مديه للبنت اللى قاعده على الكاشير الربع جنيه الفضه اللى خدته من البنت وخدت منها ربع جنيه ورق ..
وكمان بتعملي تبادل عملات !
البت دي شكلها بتشتغل فى الفوركس
هو إيه الفوركس ده؟؟
مش موضوعنا مفيش شويه ولقيت العسكري معلقها من قفاها وطالع بيها بره الجامعه .
انا بقى عرفت كده طلعت ازاى من الجامعه فاضل الاهم وهو انى اعرف دخلت ازاى !
قريب هعرف كل حاجه عن المتسولين دول ..

قال اتجوزها قال .. مش فاهم انا ايه حكايه الجواز دي .. ده ابويا كمان عايز يجوزني ..
الناس دي جرالها ايه بس ..
جواز ايه يا جماعه .. مش متخيل نفسي ماشي فى الشارع بعد سنه وعيل بيجري ورايا يقولى بابا اوبح ..
اوبح ايه يابن الكـ … يلا ياض من هنا ياض غور على امك ..
خخخخخخ هع هع هع
قال بابا قال ..
كفايه كده بقى .. وسلامات ..