مدونة أحمد هتلر

النهارده الجمعه 6 اكتوبر 2006
وطبعاً زي كل سنه مصر والمصريين بيحتفلوا بالنصر العظيم على كيان اسرائيل
واستعاده ارضنا المغتصبه ..
يا ترى الايام مخبيالك ايه يابلدي
يا ترى الايام مخبيالنا ايه ياولاد بلدي
ياترى هنبقى فيوم زي العراق ؟
ومين اللى هيعمل فينا كده امريكا ولا اسرائيل ولا روسيا ولا الصين !!!
اتفرجت النهارده على حلقه من مسلسل عائله فى زمن العولمه على قناه البغداديه
فكرني بمسلسل العو عو لمه لم لم لمه اللى كان بيجي فى السعوديه
المهم .. كانت لمحه بسيطه عن بغداد والعراق ,,
كهرباء مقطوعه .. الوقود غير متوفر حتى بالسوق السوداء
ماء دجله والفرات ملوث بجثث القتلى !!
والبطل يحسد اهل مصر ببلدهم ام الدنيا ..
الم تكن العراق فى يوم من الايام دوله افضل من مصر ؟
الم يكن شباب مصر يذهبون للعمل فى العراق بحثاً عن الرزق ؟
ولكن مكتوب لنا ان يسجل التاريخ عار دخول الامريكان لبغداد
بغداد ساحقه المغول والتتار
كاسره الانوف والجبابره ..
لطالما كانت بغداد تصد الغزاه على مر العصور
ولطالما كانت مناره العلم والادب والفن والسياسه على مر السنين ..
والآن ضاعت بغداد .. وتكررت النكسه .. من قام فى الماضي بردم النهر بالكتب
جاء مع تكرار الزمن لاحداثه من يردم النهر بالجثث !!
ياترى هيجي اليوم اللى تتحرر فيه بغداد ؟
وفلسطين .. وتتوقف الاعتداءات على لبنان والضغوط على سوريا وليبيا ؟؟
ياااه يا دنيا .. كان العرب فيكي ملوك ..
وبقوا فيكي ____ .. كلنا عارفين احنا ايه
باللغه المحترمه .. احنا العالم التالت !!

كالروتين الاسبوعي يوم الجمعه بيكون فى منزل جدي
وبدات مناقشه بسيطه بيني وبين خالى قبل الافطار
حول الاوضاع المجتمعيه .. وسياسه تواكل الافراد على الله وعلى الحكومه
وظاهره المعاش والتموين وغيرها من الظواهر فى مجتعنا ..
تناقشنا ايضاً حول المستوى المعيشي العام لسكان مصر
فى فتره الستينات والسبعينات حتى عصرنا الحالى
واستغربت لقول الناس انه لاتوجد فلوس فى البلد
وطول مانا ماشي فى الشارع عربيات زيرو ……
الناس كلها بتقول البلد مليانه حراميه ..
قلتلهم .. احتمال !!

اسيبكم دلوقتي …
عندي مكالمه هامه لمده 10 دقائق .. زي ما بيقولوا كده حقنه
ولازم الواحد ياخدها كل يوم
بكره الحقن على فكره
كل ماخد حقنه يغمى عليا
احتمال انام بعد الحقنه
قصدي المكالمه ..
سلامي
لمصر
لبغداد
لكل ارض تنطق بلغه الضاد !