مدونة أحمد هتلر

لغايه امتى هنفضل فى التأخر ده

كنت زمان بسمع المعارضه واقول الناس دي جاحده للنعمه اللى هما فيها

بس كنت عامل زي اللى بيدفن راسه فى الرمل

او اللى بيبص لتحت ويفتكر انه هوه فوق

مع انه لو بص قدامه مش فوق هيعرف انه تحت وتحت قوي كمان !!

انا مبتكلمش عن رصف الطرق والسكك الحديد

ولا الخطط التعليميه

انا بنقد اللى انا بفهم فيه

غير كده لا

مسكت تذكره قطر مكيف امبارح

لقيت مكتوب عليها (الآن يمكنك حجز التذكره عبر الإنترنت )

وموقع http://www.egyptrail.gov.eg/adocs/index.html

الصراحه مش عارف اوصفلكم الإحساس اللى شعرت بيه

إحساس بالنشوه والفخر .. ياااه أخيرا الحكومه الإلكترونيه المنيله على عين اهلها الفاشله دي عملت حاجه من اللى كانوا بيقولوا هيعملوها من خمس سنين

مش مشكله اتاخروا شويه بس عملوها

افتح الموقع الاقي المهذله كالعاده من الصفحات البيضاء والصفحات اللى كل المكتوب فيها كلمتين

إنتظرونا قريباً

هما كلمتين على رأي إيهاب توفيق !

وما شاء الله على مبرمجين مصر

الموقع كله HTML ما شاء الله جايبين ناس معاهم شهادات تخرج فى الفرونت بيج

ملعون ابو كده حاجه تحرق الدم !

مش كفايه المهزله اللى كانوا منيلنها من كام يوم وقطرين داخلين فبعض

كمان كدابين حتى فى النت كدابين !!

شوفوا موقع السفاره الأمريكيه فمصر مش موقع الرئاسه الأمريكيه بقول موقع السفاره

وحطوه جنب موقع بوابه الحكومه المصريه اللى كانوا حاطين فيه النشيد الوطني

http://www.egypt.gov.eg/arabic/default.asp

الموقع اللى ميشتغلش الا لما تكتب www قبل اسم الموقع

جربوا تفتحوه كده http://egypt.gov.eg يعنى حتى ابسط الأخطاء التقنيه مبيفهموش فيها !

كفايه مهازل فاشله مش كفايه فضايح نتيجه الثانويه العامه

مفيش فى البلد دي موقع ينفع يتقال عليه موقع انترنت متكامل ؟

يمكن هو موقع www.140online.com

اللى ينفع يتقال عليه موقع انترنت وهو الصراحه موقع عظيم بالنسبه للمواقع المصريه

الناس في امريكا بتدفع الضرايب ومصاريف المدارس عن طريق الإنترنت

مش عارف هما عاملين بطاقات الإئتمان فمصر ليه ؟؟

اذا كان مفيش موقع مصلحه مصريه بيقبل الدفع بيها

الا يمكن موقع الإتصالات المصريه وبتدفع فيه الفاتوره

وتلاقي الحراره مقطوعه عنك

وانت دافع الفلوس

يقولوك موصلناش حاجه وتروح تدفع فى السنترال لا وايه تدفع بالغرامه

لانك اتاخرت فى الدفع

وعلى المتضرر اللجوء للقضاء !!

تقولولى ياحمد مالك متنرفز ليه

عادي .. آه ماهو عادي بالنسبه ليكم لانكم بتمشوا فمكانكم

تركبوا القطر وتموتوا وتركبوا السفن وتغرقوا تمشوا على كورنيش الإسكندريه والعربيات تفرمكم

مدام انتم شعب مش عاملين للبني آدم أي قيمه يبقى عادي !!

وابقوا قابلوني ان نفعتم ولا البلد دي تقدمت

انا قاعد على كورنيش اسكندريه ومستنى البوارج الإسرائيليه تيجي تضربها

والله حاسس انهم هيجوا يضربونا وعلى ما تتحرك البحريه المصريه يكون الإحتلال وصل القاهره

اللى فاكر غير كده يبقى اهبل

ده انتم هتاخدوا مقلب .. نكسه ولا نكسه 67  وبكره تقولوا احمد قال …

مش عارف هنفضل فمصر لغايه امتى نتعلم دوس فى المدارس

وهنفضل لغايه امتى تحت احتلال مايكروسوفت

وهنفضل لغايه امتى تحت امر امريكا وبل جيتس ؟؟

طيب بلاش امركيا علشان ميزعلوش مننا

ليه كل المنح الدراسيه بتاعت الحكومه واللى بيقولوا انها لتطوير الشباب والقوى العامله لمواكبه السوق دورات تبع مايكروسوفت

بالنسبه لبرمجه المواقع يعني هتلاقوها كلها ASP و ASP.NET وقواعد بيانات SQL Server

حد يقولى انت كداب فى دورات PHP تبع الحكومه !!

مع العلم ان اغلب سيرفرات العالم كله والسوق العربيه كلها بنسبه 98% سيرفرات يونكس ولينكس

يعني كلها شغاله PHP وسيرفرات الويندوز ولا حاجه لانها اغلى بكتير

يعني برضه بنتعلم حاجه مالهاش علاقه بالسوق

ويقولولك لتطوير سوق العمل

بيكدبوا على نفسهم دول ولا ايه ؟؟

حرام عليكم هتفضلوا تعلمونا الدوس فى المدارس لغايه امتى

يا وزير التعليم يا رئيس الوزراء الحقوا الاجيال اللى بتضيع ورا بعض دي

قالوا حاسب لكل بيت

قلنا ما شاء الله

طيب اللى بيجيب لواحد عربيه هديه مش لازم يعلمه السواقه ؟؟

ولا يديله العربيه ويسيبه يمشي ويعمل بيها حوادث ؟؟

تحبوا اقولكوا الحاسب فى كل بيت بيعمل ايه

الحاسب فى كل بيت بقى :

1- ارشيف لأفلام الجنس من كل شكل ولون ووضع .

2- ارشيف للأغاني .

3- أرشيف للأفلام .

4- أرشيف للصور .

5- أرشيف مواد دينيه وإحتمال إرهابيه .

ده هو الحاسب فى كل بيت

اللى ربنا بيهديه وبيشتغل بالكمبيوتر فمصر

بيطلع بيه دي جي !!

بيتهيالى دي ثروه تم استغلالها بنظام فاشل

علموا الناس دي البرمجه اللى تاكلهم عيش

مش كلهم هيدخلوا النت ويدوروا يستعملوه صح ازاي ويطلعوا منه فلوس ياكلوا منها ازاي ؟؟

المحترم بيدخل النت يعمل شات

متضحكوش على نفسكم وتقولوا ابحاث علميه

متقولوش انكم خفضتم سعر الإنترنت

ده مخطط علشان الكل يحمل الافلام والاغاني براحته !!

كنت بضحك على السعوديه واقول متاخرين

كل المواقع يقفلوها

صحيح انتم عندكم حريه وسايبين كل حاجه للى رايح واللى جاى

بس لازم يبقى في كنترول

اسالوا الناس هتعمل ايه بالانترنت ؟؟

عايز سبب مقنع سبب واحد مفيد

بطلوا تضيعوا وقت الشباب !!

ارحمونا يا مراكز التخطيط ويا خبراء التنميه

الناس دي المفروض تتحط فى المتاحف بعد ما تترمي بالرصاص مكان رمسيس !

عجبي يا بلد

عايزه ولد بس مش اي ولد ولد مصري فرعون !