وكالمعتاد عنوان مالوش دعوه بالموضوع والموضوع مالوش دعوه بيا
ام هند
النهارده 3 – 7 – 2006
ياه متخيلين الوقت بيعدي بسرعه ازاى
شهر ورا شهر عدوا
كنا لسه من كام يوم فى الجامعه والامتحانات والمود الغبي ده
خلصنا بقى وبقينا فى الشوارع مش لاقيين حاجه نعملها
وكالمعتاد بالنسبه للجيل اللى بيعشق حاجه اسمها الخمول لدرجه الموت
كافتريات وروتين ولا كاننا احنا اللى عايزين نغير الدنيا ونمسح الفساد ونحطم التقليديه والنمطيه …
مش مهم الكلام الكبير ده 
نرجع لموضوعنا الى مش عارف هو ايه
قابلت عاصم وشادي بالصدفه وانا نازل من التاكسي ورايح تكنولوجي مول
المهم قعدت معاهم حوالى 3 ساعات وطبعاً النقاش تطرق لاكتر من مجال
وكل مجال مالوش اي علاقه بالتاني خالص
تكلمنا عن مشروع طرح النتيجه الخاصه بالكليه على الموقع الخاص بيها موقع حقوق الزقازيق
وتكلمنا عن الشريعه الاسلاميه وكيفيه تطبيق الاحكام التشريعيه وملائمه الشريعه للعصر الحالى والجرائم والتوسع الانساني ..
متفتكروش ان كان فى عقليات متقده بالآراء بتتكلم كالمعتاد كنا بنتفاهم بالشباشب ..
طبعاً الموضوع ده بكتبه بعد فتره عدت 6 ايام مفتحتش فيها الموقع
وصلتني اراء من الزوار احدهم بيقول اني لازم انشط المدونه بكتابه مواضيع تستحق النقاش .. 
مش عارف بس ياليته كان كتب مواضيع زي ايه مثلاُ مش عايزين نبهدل الدنيا ونتمسك تاني يوم
النشر فمصر فيه حريه لكن كله بالقانون ومتنسوش ان لسه في قانون طواريء ..
والظاهر كمان ان اصدقاء زمان بداو يرجعوا لملتقاهم ووصلتهم الإلكترونيه بيه
موقعي
احمد عنتر حبيب قلبي صديق مودرن القديم
الظاهر كده ان الكل خلص الكليات وفضي وبدا يدور فى دفاتره القديمه بعد ما كان كل واحد مشغول بحريمه واصحابه ..
غريبه يا انشراح
انتوا هتموتوا وتعرفوا مين انشراح انشراح هيا الدنيا ..
الدنيا اللى مطلعه عنينا
ربنا يعدي ايامنا على خير ونحافظ على بلدنا ونطورها للاحسن
موضوع تاني تطرقنا ليه انا وشادي وعاصم وهو موضوع بدء انعدام الطبقه المتوسطه من الشعب وانقراضها بشكل تدريجي ملحوظ ..
عموما يمكن الناس تنتبه والكل يحاول ينضم للطبقه الارستقراطيه العليا
صدعتكم .. عموما انا بعت اجيب علبه اسبرين ..
سلاااااااااااام
أحدث التعليقات