مدونة أحمد هتلر

تكمله لموضوع اسكندريه بنكهه جديده
انا قعدت فتره ادور على اسم للقصه قبل ما اكتبها
فكرت فاني اسميها "فتاه الغرفه المجاوره"
وبعدين استقريت على سبع ليال
قريت كمان كتيب قصص قصيره لاحسان عبد القدوس كان عوف ادهولي
علشان احاول افهم اي حاجه عن طريقه كتابه القصص القصيره
مقدرتش اوصل لهيكل معين اتبعه سوى اني بوصف الاول الشخصيه
وبعدين بكتب القصه .. مش عاجبني النظام ده
عاشت الفوضى .. انا هكتب اللى هيجي على دماغي حسب ما هفتكره وخلاص

ضهر تاني يوم الساعه 12 صحينا من النوم
يدوب جهزنا بسرعه ونزلنا
خدنا العربيه وطلعنا على سان ستيفانو
دخلنا سلينترو .. الوايرلس كان فيه مشكله
طلبت الكابتشينو بالفلافور المفضله ليا
ويانيا طلبت لاتيه مكياتو .. قعدنا نتكلم حوالى نص ساعه
بعد كده نزلنا خدنا العربيه من الباركنج
كنت مخطط اني هبدأ بمتحف المجوهرات الملكيه
لكن للاسف المتحف مقفول بيتعمل فيه ترميمات
ومتوقع افتتاحه كمان شهرين
نفس الكلام حصل مع المتحف اليوناني الروماني
وبصراحه مش عارف ازاي متحفين من الكام متحف المعدودين عالصوابع
الموجودين فى اسكندريه يكونوا مقفولين وبيتعملهم ترميمات فنفس الوقت !
فنفس المنطقه فى متحف الاسكندريه القومي

قعدنا نص ساعه ندور على مكان نركن فيه العربيه فى الشوارع المحيطه بالمتحف مفيش اي مكان نهائي !
المهم لقينا مكان اخيراً وبصراحه معرفش لغايه النهارده هوه كان مخالف ولا لا ..
داخلين المتحف .. وكانت اول مفاجأه ليا ..
انا طالب مصري دفعت تذكره 2 جنيه تقريبا
يانيا سائح اجنبي دفعت 40 جنيه !
20 ضعف فرق فى السعر
هيا صحيح التذكره بتاعتها شكلها شيك عن حته الورقه بتاعتي
بس برضه البنت حست بتفرقه عنصريه
لدرجه انها قالتلى دي سرقه علنيه !!
عملت فيها الاشتراكي .. وقلتلها دي ممتلكات الشعب
وانا من الشعب المصري
انا المفروض مدفعش فلوس اساساً !!
دخلنا الدور الارضي .. كان فيه تماثيل من العصر الروماني

كان في برضه بعض الاثار المستخرجه من بحر اسكندريه
انا بجد نفسي انام واصحى والاقي متحف الاثار الغارقه بيستقبل الزوار
المتحف ده لسه تحت الانشاء .. وفي كميه اثار ضخمه جداً موجوده لم تستخرج
من العصرين الاغريقي والروماني .

الاضائه كانت ضعيفه فبعض الاماكن .. يمكن للحفاظ على الاثار
كان مسموح بالتصوير لكن بدون استخدام فلاش .. حسب رد موظف الامن
مع العلم ان مفيش اي يافطه توضح ان الفلاش ممنوع وكان فى اكتر من سائح بيستخدم الفلاش !

يانيا جت قدام الكابتن ابو دقن اللى عالشمال ده وقعدت تصوره وتضحك
بتقولي اصله شبه باباها

دي لوحه من اللوحات الكتير اللى كانت موجوده واللى تم ترميمها بدعم من بنوك اجنبيه
ومنظمات عالميه .. اموت وافتكر الست اللى شعرها تعابين دي كانت رمز لايه
واموت واعرف ازاي يانيا كانت بتقف قدام كل رسم وتشرحلى كل حاجه فيه
وانا اللى المفروض دي اثار بلدي محدش طلع قبل كده وشرحلي اي حاجه عنها !

مقولكوش بقى على كميه الاخطاء في الترجمه والكلام اللى بيكتبوه فى العربي حاجه والانجليزيه حاجه تانيه
يعني هنا مثلا مكتوب النبيذ win بدل wine
والنكته بقى ان يانيا بتحلفلي ان الاوعيه دي كانت لحفظ القمح والحبوب مش الخمور !!
ووريتني شكل الاوعيه بتاعه النبيذ وفعلا اقنعتني ..

ايجبشن مزه
شبه البت ماتيجا
ما علينا .. دي كانت نهايه الدور الأول ..

الدور التاني فيه اثار العصر الاسلامي والعثماني
وعملات قليله للفتره الملكيه وبعض مقتنيات الاسره المالكه المصريه

ده مدفع على شكل بندقيه
اما العثمانيين دول كانوا خبثه بشكل
البندقيه طولها متر ونص تقريبا !!
مش عارف كام واحد كان بيشيلها دي ومين اللى كان بيدوس عالزناد !
ماهو مش معقول الناس زمان كانت عمالقه كده !

خوذه بيلبسوها لما يركبوا على اي حاجه باربع رجلين 
علشان قانون المرور العثماني القديم كان بيخزوق اللى مبيلبسش الخوذه
انا مش محتاج اشرح واضح ان دي خوذه عسكريه

وذلك فى شهور سنه ثمان وخمسه وسبعمائه
(مش فاكر بالظبط)
انا قعدت ربع ساعه عمال اجمع حرف حرف
وجه واحد قالهالى كلها فخمس ثواني
يانيا مكانتش مقتنعه ان دي كتابه مكونه من حروف قابله للقراءه

فكروني بمقوله الحجاج بن يوسف
ارى رؤوساً قد اينعت وحان وقت حصادها

منحوتات خشبيه من العصر القبطي

دول بقى بعض الادوات النسائيه
واللى ورا ده البتاع اللى بيعملوا بيه البفتيك

 

 

صوره للعشاء الاخير للمسيح
وموضوع علامه على الخائن اللى وشى بيه للقيصر
يانيا شرحتلى قصه العشاء الاخير بس مش فاكرها صراحه
لفت نظري ان فى بنت مرشده كان معاها وفد
ولقيتها بتقولهم دي لوحه العشاء الاخير لعيسى
هوه حد بيقول عليه عيسى بره ؟؟!

صور خارجيه للمتحف قبل المغادره

بعد كده طلعنا من المتحف
اتفرجنا على بقايا السور الاسلامي للاسكندريه
وخدنا شويه صور للمنطقه المحيطه

كاتمه الاسرار

بفكر اجيب ساريه من دول احطها على باب الشارع عندنا
مكان مقام عبد العزيز

احد مباني المنطقه

دي بقى اللى كانت كوميديا
اخر حاجه كان ممكن اتوقعها ان في دار فتوى للوزارات والمصالح الحكوميه
حد سمع عن الموضوع ده قبل كده ؟

بعد اللفه الطويله دي كان لابد من الغداء
وبصراحه انا كانت طالبه معايا لحوووم
خدت العربيه ويانيا وطلعت على بلبع
ضربنا كباب وكفته .. ومن هناك عالبيت مباشره
وكان اول كورس رقص سوينج ووالس
الوالس ده كان مشكله !
مع انه بسيط الا اني مقدرتش اتحكم فى اعصابي وانسحبت
بعد كده اتفرجنا على فيلم قديم اسمه جريس لجون ترافولتا
وبكده انتهى اليوم
والى اللقاء فى الجزء القادم .