مدونة أحمد هتلر

او لا يفل الحديد الا الحديد
او الجزاء من جنس العمل
او لكل فعل رد فعل مضاد له فى الاتجاه ومساوي له فى القوه ..
ده أولاً

القوه مش بس قوه تقاس بالنيوتن
او بسرعه الرصاصه
او بالالم الناتج عن التعذيب
القوه مش لازم تكون قوه ماديه
القوه احيانا ممكن تكون حسيه

صحيح القوه ممكن متكونش ملموسه !!
وفنفس الوقت يكون ضررها اقوى
القوه ممكن تكون فكريه
الغزو والضرر ممكن يكون عن طريق زرع فكره
الفكره ممكن تكون اقوى من الرصاصه
دي حقيقه !!

كنت بتفرج النهارده على الجزيره الوثائقيه
حلقه عن التمييز العنصري
شويه حاجات لفتت نظري
الاديان السماويه محرمتش بشكل نهائي وقاطع للعبوديه !!
التخلص من العبوديه كان عن طريق ثوره من العبيد نفسهم
الكتاب الاوروبيين ومناهضي العبوديه مقدروش يمنعوا العبوديه

العبوديه ممكن تكون عبوديه فكريه
الرومان كانوا بيعتقدوا ان الرجل مخلوق ارقى من المرأه
الفكره دي لسه موجوده عندنا كشرقيين
العقليات المتشبعه بالافكار الذكوريه لسه عايشه وسطينا
منكرش اني فيوم من الايام تصرفت كانسان ذكوري بحت
لكن ده ناتج عن افكار تشبعت بيها منذ صغري
اغاني زي البنات البنات اجمل الكائنات
كنا بنحولها للبنات البنات صراصير البلاعات !!

فكره ان الذكور والاناث عنصرين مختلفين فكره خاطئه
متختلفش عن فكره الابيض السيد والاسود العبد فى المبدأ

شوشيت النهارده بتشتكيلي من واحد حط رد فمدونتها
على موضوع عن الجواز هيا كتبته 
اتهمها بانها بنت مش طبيعيه
وانها لو طبيعيه مكانتش هتكتب كده "عالنت وقدام الناس كلها"
وبمنتهى الوضوح قال "انتي لو اختى كنت منعتك تقعدي عالكمبيوتر طول عمرك"
هنفترض ان شوشيت اخطأت
اعتقد هوه كمان او اخوه الولد مثلا فمره دخل موقع اباحي
معتقدش هيكون رد فعله انه هيمنعه يستخدم الكمبيوتر طول عمره !
تاني افتراض لو ولد هو اللى كان كاتب
موضوع عن الجواز وانه محتاج يتجوز
وانه مش لاقى البنت المناسبه لان البنات كلها "فدماغها صراصير"
معتقدش هيكون رد فعله عليه احترم نفسك عيب تقول كده
الكلام ده ميتكتبش عالنت قدام الناس
هو ايه النت ؟؟ ماهو ناس بتكتب وناس بتقرى ؟؟
بمساحه حريه اكبر
ايه العيب ان الانسان يعبر عن افكاره بمنتهى الحريه
حتى ولو كان بنت ؟؟
ليه البنت مفروض انها تعامل على انها كائن اقل حكمه وثقافه
ليه البنت مفروض تعامل على انها يجب ان تكون اكتر ادباً وحياء فى معامله قضيه تخصها ؟؟
يعني ايه البنت تتكلم عن الجواز مع اصحابها بس ومتكتبش عالنت ؟؟
هو النت ووسائل الاعلام العامه ملك للذكور مثلا ؟

الرد من الزائر باسم مجاهد وبدون تعليق على الاسم
بيعطي انطباع عن انسان متعصب متشبع بافكار رجعيه بحته
لو اخته اخطأت فهيحرمها من الانترنت طول عمرها
لانها بنت وميصحش تغلط
لو اخته عبرت عن رايها بحريه بشكل معجبوش
هيمنعها تعبر عن رايها طول حياتها ؟!
باي حق يمنع اخته من حريه التعبير
ازاي هوه مقتنع اصلا انه يكون عنده القدره انه يعمل حاجه زي دي فاخته ؟؟
هو ليه مقتنع ان اخته كائن تابع ليه مش انسان مثله متساوي فى الحقوق والواجبات ؟؟!

موقف تاني من كام يوم
بنت صديقه ليا اتخطبت
اتصلت بيا علشان تقولي ان خطيبها طلب منها متكلمش اي حد من اصحابها الولاد
وياريت ما اتصلش بيها تاني .. ممممم
دي بجد حاجه حرقت دمي
مش هقول انه معندوش ثقه فنفسه وبالتالى مش واثق انها تفضل معاه لو كلمت ولد تاني
انا شايف ان دي قصه فارغه .. هوه مريض مش دي المشكله
المشكله بقى .. انتى كبنت
ازاي تقبلي انك تكوني ميته اجتماعياً ؟؟
هو خطبك ولا اشتراكي ؟؟
يعني ايه طلب منك متكلميش اي ولد تاني ؟؟
ازاي توافقي على حاجه زي دي اصلا
ازاي توافقي انك تكوني عبده ليه يحرمك من حقوقك كانسانه ؟؟

التغيير والرفض للاساليب الذكوريه لازم يبدأ من المرأه
ثقافه الحقوق والحريه يجب ان تؤمن بيها المرأه المصريه
اللى بيتم استعبادها والتحكم فيها تحت اطار الدين والتقاليد
وانا شايف ان الظروف المحيطه بينا هتخلق جوانا تاني هدى شعراوي وصفيه زغلول
هتخلق جوانا صوت انثوي مصري حر
الحريه موجوده فدمنا محتاجه بس اللى ينشطها
والقيود اللى بتتفرض كل يوم على المرأه المصريه 
هتطلعها من قهرها وتخليها تصرخ باعلى صوتها
وتدافع عن نفسها .. وانا مؤمن بده