من 3 اسابيع وشويه
منسي كان جايله حاله اكتئاب
وعوف كان فى الغردقه مفلس
وانا كان معايا 500 جنيه وفلوس ادسنس فى الطريق
اتصلت بمنسي اللى بقاله اسبوعين بيزن عليا علشان نروح الغردقه
احنا هنسافر النهارده
قالى لا انت بتهرج خليها بكره قلتله لا النهارده بالليل هنسافر
قالى لا بكره مش هينفع النهارده خالص .. قلت اوك ماشي
رحت شركه MCV حجزت تذكرتين تاني يوم الضهر
قبل الميعاد بساعه كان كل واحد فى البيت بيجهز نفسه للسفر
قبل الميعاد بنص ساعه كنت واقف تحت بيت احمد منسي بتصل بيه علشان ينزل
قبل الميعاد بـ 10 دقايق منسي كان بيرميلي شويه هدوم ملفوفين بسماعه سبيكر من الشباك
لووووووووول .. لو حد كان شافني كان قال حرامي غسيل وش 
كفايه كده علشان مننضربش انا عارفه هزاره غبي
مش عارف بس ابوه حبكتله يتغدى وهوه بيتفرج عالتليفزيون فى الصاله يعني !!
نزل جري ومعرفش يفك الهارد بتاعه .. ميه مره اقوله اشتري فلاشه مبيسمعش الكلام
المهم وصلنا اول الشارع ..تاكسي يا جدعان
تاكسي يا شارع وادي النيل يا معفن !!
تاكسي يا كفره الاتوبيس هيفوتنا !
لقينا تاكسي اخيرا قلناله عايزينك تتطير عالموقف
وصلنا متاخرين خمس دقايق بس لقينا الاتوبيس لسه موجود
وكان في ناس مش حاجزه وبتركب وتحجز والباص واقف .. قشده يعني
اشترينا كام كيس شيبس على مولتو (عيال سيكي ميكي ياعم الحج) وقزازتين عصير منجا
اول مطب السواق فرمل الكيس خد قزازتين العصير ونزل تحت رجل السواق
شربناهم فى القاهره
الراجل قعد حوالى ساعه يلف حوالين الدائري تقولش كان نادر يلف القاهره
المهم وصلنا الغردقه بالليل وطبعا زي ماكنا متوقعين عوف الشهم واقف مستنينا فى المحطه بالتاكسي المكيف
معلش بهيس عوف طبعا واطي ومفلس قالنا اركبوا تاكسي وتعالوا انا عند فندق عرابيا
وصلنا الفندق حطينا الشنط واستغرقنا فى ثبات عميق
تاني يوم ضاع فى الاونطه زي ما بيقولوا
مابين اتصالات لغايه ما حجزنا رحله بحر ورحله سفاري
ودي شويه صور اللى قدرت اخدهم من عوف النصاب
علشان اعملهم سكان
شفتوا الوطنيه دي
من الشمال لليمين محمد – انا – منسي – عوف
اموت واعرف منسي كان عامل كده ليه
معجبه بولنديه 
مرضيتش ازعلها وخليتها تبوسني
لووووووووول .. بنعمق العلاقات المصريه البولنديه
وكله فى سبيل الوطن يهون!!
رحله السفاري
ومش هكتب عنها كتير
علشان مطولش عليكوا
ومش هقول ان منسي اول واحد يخمس بالبيتش بجي فوضع رأسي
ولا واحنا بنتدحرج من عالجبل بعد الشروق خخخخ
صوره مع ياسر الصبح واحنا راجعين من الجبل للغردقه
المهم زمانكوا نسيتوا عنوان الموضوع
وهوه صباح الخير سلوفينيا ..
وعمالين تقولوا مين سلوفينيا دي ياض
متخافوش مش المزه البولندي
فى ناس منكم اكيد قرت الموضوع اللى فات وعرفوا انها بلد
اني واي سلوفينيا دي بلد سكانها 2 مليون
على حدود ايطاليا الشمال شرقيه
وبتطل على البحر المتوسط برضه
طيب وانا مالى ومال سولفينيا دي
قبل ما نرجع بيومين
كنا بنتخانق هناكل ايه زي كل يوم
المهم استقرينا نروح نضرب بيتزا عند بيتزا هت فشارع الشيراتون
قشده .. طلبنا بتزايتين كده بـ 95 جنيه بس
وقبل ما نخلص اتصل بيا ماجد ابن عمي
انت فين يابني قلتله انا فبيتزا هت بتغدى
صحيح الساعه كانت 9 بالليل بس هوه ده ميعاد الغدا
لاننا يدوب بنصحى العصاري
نشوف فيلمين على ام بي سي اكشن وننزل
قالى طيب انا فى ستار بكس جنبك
خلص وتعالى معايا تلت مزز بيتكلموا انجليزي
يخربيتك بيتكلموا انجليزي فى الغردقه قشده
خدت عوف ومنسي ورحنا نشوف المزز اللى الواد قالنا عليهم
لقينا تلت بنات فى حدود 17 سنه
ايه يا ماجد احنا هنهرج !!
دخلت عليهم .. جود مورننج
مش عارف مورننج ايه ده اللى الساعه 10 بالليل لقيتهم بيبصولى باستغراب كده
واول ما ابتسمت فهموا اني بهرج وقاموا ضاحكين
قلت قشده
واستمرينا فى التعارف واتكلمنا عن مصر والسد العالى وعبد الناصر
والثوره والليبراليه فمصر والوهابيه فى السعوديه والشيعه فايران
لقيتهم متفاعلين جدا مع التاريخ والجغرافيا قلت ميه ميه
قعدوا يسالوا اسئله غريبه عن سن الجواز للبنات فمصر
والراجل بيتجوز كام واحده والمسلمين بيضربوا البنات ليه
المهم قدرت اوصلها صوره حقيقيه عن مجتمعنا المصري
والمجتمعات المحيطه ووضحتلها حجم الحريه الفعليه المتاحه للمرأه المصريه
وصحيح اننا مش زي بلدكوا في الحريه . بس برضه احنا دوله ليها تاريخ عريق
قالتلى انا درست مصر فاول سنه فى اعادي فى التاريخ قللتها شفتي بقى
انا معرفتش اسم بلدكوا غير منك
كان عندي مشكله فعليه اكتشفتها فى الارقام الانجليزي بتاعتي
انا بهيس بين 18 و 80 ايتين وايتي
المهم منسي قالى تين اربطها بالمراهقه اللى بتبقى فسن العشرين
فكره الربط دي بتنفع احيانا ..
يعني مثلا انا ربطت اسم اول بنت فيهم اللى اسمها يانيا بالباميه
لاني كنت نسيته بعد اول 5 ثواني وشكلى كان وحش جداً
كان فى بنت منهم بتحب الشعر قعدت كلمتها عن نزار قباني بقى
واحمد مطر وعزت ابو عوف وظبطتها يعني احنا مثقفين برضه
مين عزت ابو عوف ده … لووول
احلى حاجه عجبتني فسلوفينيا ان عندهم حريه فكريه ودينيه بشكل كبير
يعني مثلا فى نسبه كبيره من السكان هناك لادينين وملحدين
وبيتعايشوا مع المسلمين النازحين من البوسنه بعد الحرب ومازالوا مقيمين
وبيشوهوا صوره الاسلام بحسب ما وصفولى من اسلوبهم فى معامله النساء
والبنات الاطفال بطريقه غير انسانيه !!
اتمنى ان يبقى عندنا فمصر الحريه الدينيه اللى تسمح للكل انه يعيش ويتمتع بحقوق المواطنه
بدون اي تفرقه بسبب الاعتقاد الديني ..
من اليمين انا – يانيا – ماتيجا – ماجد – نينا – ياسر
كل الى اقدر اقوله انها كانت رحله كويسه
واستمتعنا فيها بعد ما اصدرنا موقع ايه سفن ايه فى وضعيه البيتا
واكتسبنا تلات اصدقاء من دوله سلوفينا
اللى تقريبا مالهاش سفاره فى الشرق الاوسط كله غير فمصر
والى لقاء اخر
29 نوفمبر, 2008 في الساعة 2:02 ص
طب يعني احنا نتعرف في زحمة وسط البلد
مش كنا نخلى التعارف ده في الغردقة عند عوف
كنتوا قولتولى اجي معاكوا كان طالنا من سلوفانيا جانب
1 ديسمبر, 2008 في الساعة 1:05 م
والله الغردقه مش هتسافر
ظبط المواعيد ونتقبل تاني ونتعرف من الاول ياعم الحج .. لوووول