مدونة أحمد هتلر

بقالى اكتر من 48 ساعه
مشغل اغنيه واحده متواصله
اغنيه عنقود العنب لمحمد منير
متعرفوش دخت قد ايه على ما افتكرت اسمها
انا كنت بدور على كوبليه معين جاي على دماغي
ده عنيكي دول مرايات مرسوم انا فيهم
قلبت البومات منير البوم البوم
واشغل عنقود العنب واسمع اول دقيقتين واقلب على غيرها
اتاري الكوبليه فاخر دقيقه فى الاغنيه
لازم تدوخنا معاك يا منير بس !
المهم بقى
انا مشغل الاغنيه
وانا بطبعي بحب اسمع منير بصوت عالي
والسماعات عندي بتعمل صوت بيوصل الشوارع اللي ورانا
بابا كل شويه يفتح الباب يقولي وطي الصوت
اسمع على قدك
وكل مره بوطي شويه واعلى تاني
النهارده قلتله متخنقنيش
انا بحب اسمع منير بصوت عالي
لقيته بيقولي وانا ذنبي ايه مبحبش الصوت العالي انا
اكتشتفت اننا اوقات بنتعدى على حريه ناس تانيه
علشان نحقق رغبتنا ونعمل اللى بنحبه
يمكن من غير ما نقصد وبنحس كمان انهم لو طلبوا حقهم
يبقوا كده بيتعدوا على حريتنا
الموضوع ده مالوش مقياس للاسف
بس الحل اني اسيب البيت واشوفلي شقه في عماره فشارع
مفيهوش سكان غيري
علشان اعلى براحتي بقى
واسمعك يا منير ..

4 عدد التعليقات على “صداع بس حريه ..”

1. الموطن مصرى يعلق:
   28 سبتمبر, 2008 في الساعة 12:41 ص

   كويس انك فتحت موضوع الحرية وكمان اتكلمت فى موضوع الاغانى بصوت عالى
   على فكرة انتا لو كنت عايش فى القاهرة كنت هتقدر الموضوع دة
   ينى لو انتا راجع منشغلك مصدع وراكب ميكروباص هتلاقى السائق مشغل أغنية شعبى بصوت عالى ,ولو كان مش مشغل حاجة هتلاقى الركاب مشغلة . انا مش ضد انك تسمع منير او سائق الميكروباص يسمع الاغانى اللى بيسمعها انا معاكم دة حقكم بس انا مع حقى فى الهدوء والراحة طول ماأنا محتجهم وعلى رأى القائل
   أنت حر مالم تضر.

2. أحمد هتلر يعلق:
   28 سبتمبر, 2008 في الساعة 4:27 ص

   اتفق معاك بس صدقني
   انت كمان اكيد بيجيلك وقت بتتجاوز القاعده ..

3. محمد صيام يعلق:
   28 سبتمبر, 2008 في الساعة 10:31 ص

   انا برضه ساعات ييجي في دماغي كوبليه اغنية ويكون نفسي اسمعها بس انا مش بدوخ زيك ياعم هتلر انا بخلي جووجل يقولي على اسمها. كفاية اني اكتب الكوبليه اللي انا فاكره الاقيه طلعلي اسم الاغنية بكلماتها سواء كانت اغنيه عربي انجليزي هيروغليفي.. جووجل حياتك. علي فكرة لو كتبت في البحث كلمات عنيكي دول مرايات هتلاقي موقعك تاني نتيجة في البحث

4. نانا يعلق:
   6 أكتوبر, 2008 في الساعة 11:51 م

   هاى يا احمد

   على فكره انا كمان شرقاويه

   اممم اصلا احنا اتعودنا من زمان ان حريتنا هى نمبر ون ومش بيهمنا غيرنا

   مدام انا مبسوطه خلاص محدش يشتغلنى بقى

   انا بقى ياعم احمد من الحناوى وانت عارف انها منطقه تتسم بالهدوء (( حلوه الهدوء دى )) مش بيحلى ليا انى اسمع العندليب الاسمر تامر حسنى هههههههه غير بالصب و6 سمعات اعمل ايه بحس بكده انا بطير مع كل اغنيه

   وبعدين الكل لازم يعرف ان تامر حسنى ومحمد منير وعمرو دياب لازم يتسمعوا بصوت عالى واللى مش عجبه يشوفلو سكن تانى

   طبعا انا عارفه انى بتعدى على حريه غيرى وبعمله ازعاج

   بس وايه يعنى مهى كل مصر بتتعدى على حريه بعض

   جت بقى على اغنيه نسمعها

   يا عم قول يا باسط تلاقى الدنيا هاصت

أضف تعليق.