بقالى اسبوعين بالظبط
كل يومين رايح لدكتور السنان
بعمل حشو عصب
مش دي المشكله
الم العصب اسهل عندي
من اني استنى ساعه
على ما يجي دوري وادخل للدكتور
وتعليق الدكتور : معلش معملوش لسه دكاتره سنان دليفري !!
اعتقد ان السبب الاول
فى اني مبحضرش محاضرات فى الجامعه
اني مقدرش اقعد نص ساعه اجباري
مع العلم اني بقعد بالتسع ساعات قدام الكمبيوتر
لكن مش حاسس بالالزام .. ودي مشكله الشعب المصري ..
النهارده بقى
كنت هفرقع من الغيظ
مناقشه مجاستير بنت عمتي
والمناقشه فكليه صيدله
المشكله مش ان القسم اسمه فارماكولوجي
ولا ان الفار اللى فى المناقشه سويسري
المشكله اني اقعد 3 ساعات فى مكاني
بسمع كلام بفهم منه كلمتين بالعافيه
لمجرد اني احضر مناقشه بنت عمي
وميصحش محضرش
طيب انا احضر بناء على ايه مثلاً
اولا مفيش حاجه عامه ممكن استفيدها
ثانياً المناقشه بالانجليزي وانا يدوب فاهم الانجليزي اليومي مش الفيراني ..
انا شايف ان اللى المفروض يحضر المناقشه
اللى هيناقش واللى عايز يسمع ويستفيد
وبعد المناقشه متخلص
ممكن نعمل احتفال بسيط كده ظريف
نشرب فيه حاجه ساقعه وناكل جاتوه
احتفال بالمناقشه يحضره الجميع
انما نحضر المناقشه ليـــــــــــــــــه ؟؟؟
كان فى حاجه كمان غاظتني
دكتور صيدلاني
مربي دقنه
طول مناقشته لبنت عمي
قال كلمه "واخده بالك" مالايقل عن 100 مره
وانا مطلع الموبايل وكل ما يقولها احطله نقطه فى النوت
اللى غاظني بقى
ان دكتور خلي بالك المتخلف
بعد ما خلصت المتاقشه
بنت عمي بتسلم عالدكاتره
ومدتله ايدها بتسلم
والاخ ميمدش ايده
مش دي اسمها قله ذوق برضه ؟؟
6 يونيو, 2008 في الساعة 7:35 ص
لا ياحلو مش قلة ذوق خالص
في الدين الاسلامي ممنوع ان الرجالة تسلم علي النساء
ههههههههه بنت عمك الي غلطانة مش الدكتور
6 يونيو, 2008 في الساعة 5:51 م
وهما الدكاتره اللى كانوا جنبه
دول كانوا كفار مثلا لما سلموا عليها ؟؟؟
ولا هو الدين الاسلامي دين قله الذوق ؟؟
16 يونيو, 2008 في الساعة 4:36 ص
صادف مره ان بتكلم مع شيخ في موضوع السلام علي البنات بالايد قالي حرام قولتله ليه ؟ قالي اصل ده بيثير الغرائز قولتله طب وممكن تلاقي واحد بيسلم عادي مش في نيته حاجه قالي يبقي مش راجل قولتله شكرا وسيبته مشيت طول ما احنا كده اكيد مصر حتتقدم بينا
19 يونيو, 2008 في الساعة 2:42 م
فكرتني برسالة ماجيستير حضرتها في كلية الهندسة كان الدكتور وهو بيناقش مقدم الرسالة قال “واخد بال سيادتك” اكتر من ميت مرة الظاهر ده مرض نفسي
23 يوليو, 2008 في الساعة 6:33 م
مش عارفه بس معتقدش ان البنت لو سلمت على الراجل هتدخل جهنم لو قارنت دا بجاجات تانيه بتحصل غلط ولو راعينا حسن النيه……………(الله غفور رحيم)