مدونة أحمد هتلر

بقالى 11 يوم مقدم على خط linkDSL
ولسه موصلش لغايه النهارده
بصراحه الواحد مش عارف يقول ايه
الموظف قال انه فى خلال 7-10 ايام بالكتير
هيكون النت واصل
رحت يوم الاربع علشان اسالهم ايه الاخبار
وبعد ما طلعت الشركه وسالتهم
قالولى مفيش طلب عندنا بالاسم ده
اتاريني رحت شركه فيرست وكيل tedata
نزلت وانا بلعن اللخبطه والزهايمر
روحت شركه لينك
قالولى اسال يوم الحد هيكون وصل ان شاء الله
اما نشوف اخرتها معاهم ايه …

حاسس بلخبطه وحاسس اني مش منظم
وحاسس ان عليا 100 حاجه عايز اعملها
ومش عارف ارتبهم وابدأ بايه وازاي
دوشه اعدادت الموقع الجديد
والدرس اللى المفروض كان بدأ امبارح
وشقتي اللى هتتبني فى خلال اسبوعين
ومشواير للبنك والبريد والويسترن والميكانيكي
وتليفونات المفروض اعملها وانساها
وحاجه تخنق والجو بدأ يحرر
وعايز اركب تكييف

بالمناسبه انا كنت مشتري MP4
من محل فوسط البلد اسمه فور سيزون
بتاع موبايلات جنب فريندز علطول
المهم اول امبارح رحتله علشان يشوف الجهاز باظ ولا ايه
بيقولى الضمان دولي
قلتله يعني ايه دولي يعني فى ضمان ولا انت نصبت عليا
قالى اه في هناخد الجهاز ندخله الصيانه
وهتدفع تمن التصليح
قلتله طيب مانا كنت وديته لاي حد يصلحه وخلاص
وبعدين انت قلتلى وانا بشتريه ان فى ضمان استبدال
عالجهاز فى خلال 6 شهور لو حصل فيه اي حاجه
والفاتوره اهيه والكرتونه وكل الاكسسوارات كامله
قعد يقولى هوه ده النظام واوامر المدير ومش عارف ايه
المهم حبيت احذركوا من التعامل مع الناس الحراميه دول
الواحد يشتري من توكيل محترم
وبسعر اغلى 100 جنيه
بس يضمن حقه لان التوكيل هيخاف على سمعته
وهتقدر تطالبه قانونيا بحقك
انما دول شويه نصابين وحراميه
وحتى مش ملتزمين بالشكل الرسمي للفاتوره ولا مختومه ولا عليها رقم سجل تجاري
ومع ان المحل قدام مركز المدينه بس ولا فارقه معاهم ..

رحت اشتري راوتر ماركه سيسكو من كمبيو مول اللى
في الصاغه دخلت اول شركه
قالى سيسكو دي شركه بتدي دورات فى القوميه يابيه
ومبيعملوش راوترات قلتله شكراً أفدتنا أفادك الله
وبعدين قالى الانواع اللى هتلاقيها فى المول كله هيا دي
وطبعا كلهم صيني وانا بصراحه اتخنقت من الصيني كله
قمت واخد نفسي وماشي
ابقى اروح اجيبه من اسكندريه احسن
وكفايه عليكم كده ..