مدونة أحمد هتلر

ربنا يمسيك بالخير يا منير يا ملك
المهم انا بقالى اسبوع ويومين راجع من اسكندريه
وكنت راجع اضطراري نظرا لتعبي المفاجيء
حلوه مفاجيء دي زي بغتتاً كده (بغتتن لمتبعي النظريه النونيه ) 
المهم نبدأ من الأول 
كان لازم ندي العربيه شاور محترم 

وبعدين انطلقت على القاهره 
قابلت اخميد ابدو القادير فى المقطم 
ده لاننا كان فى جوله المفروض هنعملها 
وهيا اننا هنروح معرض الكتاب 
وكان فى حته كمان هنروحهها بس مش فاكر هيا ايه واقعياً 
المهم انتهت رحلتى فى القاهره منطلقا انا وعاصم واخميد ابدو القادير 
على الاسكندريه القاهره الصحراوي 
الساعه 2 فجراً بعد سهره طويله فى شارع الهرم 
مسترجعين فيها الذكريات 
من اول مسرحيه بودي جارد لعادل امام 
مرورا بالهرمين اللى طول عمري اسمع انهم تلاته 
وعمري ماشفت التالت ده
لغايه عاصم فى المريوطيه 
وصلنا اسكندريه 
طبعاً رحله عاصم كانت مفاجأه 
فكان جاى من غير اي استعدادات نهائي 
بالهدوم اللى عليه 
اتصلنا بمصطفى فى الزقازيق 
علشان يجيلنا يقعد معانا يومين 
وطبعاً علشان يجيب لعاصم اي هدوم من البيت 
لازم نستغله طبعاً 
المهم وصل مصطفى وسافر ابدو القادير رجع تلا بالمنوفيه 
وبالمناسبه سلامي لكل الاصدقاء القدامى من تلا (اي خدعه تلا نزلت عالنت ياجدعان )
أكيد طبعاً كان فى زيارات ميدانيه 
فى شوارع الاسكندريه 

كوبري ستانلي 

عالكوبري برضه 
وهنا كنا مستخدمين الكاميرا ام تايمر

لقينا العربيه اللاند روفر الغريبه دي عن القلعه 
كان عليها لوح جمرك السلوم 
وعلم سويسرا 
قعدنا نتصور جنبها 
طلع فى اتنين نايمين عالعربيه من فوق 
واحد منهم صحي 
وطلعلنا من فوق 
الافندي حران وطالعلنا ملط 
المهم اعتذرلنالهم اننا صحيناهم 
بصفتي بتكلم عنجليزي كويس يعني
وسبناهم على امل نلحقهم الصبح 
فى القلعه قبل ما يمشوا 
بس طبعاً صحينا من النوم الساعه 3 العصر ..
نزلنا اتمشينا كتير فى اسكندريه 
واول مره نشتري فاكهه من السوق اللى فبحري 
اتارينا كان بيتنصب علينا نصب فسيدي بشر 
قعدت اعلم عاصم بقى الفرق بين الموز البلدي 
اللى طعمه وريحته يدوخوا هوه صحيح قصير بس جامد 
لانه مدمن النشا الطويل ده اللى لا ليه لا طعم ولا ريحه 
وطبعاً كان هيتنصب علينا فى السمك نصبايه محترمه 
الا ان مصطفى بما انه كان عامل ريجيم 
كان كل يوم ينزل يجيب السمك المشوي ويجي 
وانواع غريبه عجيبه بس مكناش بنقول لا 
الجوع كافر برضه

الاسبوعين دول كان فيهم ماتشات نهائي كاس الامم الافريقيه 
ولكن ان تتخيلوا المهازل اللى كانت على كورنيش الاسكندريه 
والتجمعات البشريه الرهيبه 

لا الصوره دي قبل قبل النهائي

الصوره دي حكايتها حكايه 
كنا ماشيين بالعربيه ومطلعين العلم وبتاع 
لقينا حوالى تلت عربيات واقفين وشباب واعلام 
وبيصفرولنا قمنا واقفين ونازلين 
وانا اندمجت بقى 
وقعدنا نرقص نص ساعه وعاصم هيتشل 
ومصطفى مستغرب 
يابني انت تعرفهم منين دول 
قلتله يا عاصم 
علم مصر بيجمعنا 
قالى طيب كويس العشره جنيه تمن العلم 
جم بفايده

قبل النهائي 

النهائي 
كنت قاعد فمؤمن فسيدي بشر 
بتعشى بعد الماتش 
ولقيت الجماهير الغفيره دي 
قمت راكن العربيه 
وواخدها مشي 
بالمناسبه البانيه بتاع مؤمن ثري شيفس 
بيقولوا فى بانيه بصوص البطيخ 
هبقى اجربه بعدين لاني مفلس حالياً
وياريت متاكلوش عند مؤمن اساساًَ
لانهم جابولى الكول سلو من غير لامعلقه ولا شوكه 
وزعلت قوي على التلاته جنيه تمن الكول سلو لاني بحبه 
فينك بس يا كنتاكي لولا اني مش عارف عنوان الشقه كنت طلبتك دليفررري اهيء اهيء 

يوم الفلانتين ده بقى كان يوم عجيب 
كان طابب علينا واحد ربنا مايوريكوا شكله 
والمفروض اننا مسافرين انا وعاصم القاهره 
علشان حفله هيفا وراغب علامه فى الفور سيزون عالنيل 
طيب هنخلع من الافندي ده ازاي مووش عارفين 
المهم قلنا اننا رايحين لعمه عاصم فكفر الدوار 
الاخ قام لبس وعايز يجي معانا
قلناله لا يامعلم انت تنتظرنا هنا 
ربع ساعه وهنرجع مش هنتاخر متخافش 
اما عمه عاصم وعايز يجي معانا 
امال لو قلناله رايحين لهيفا هيعمل فينا ايه
طلعنا الصحراوي ورجعنا تاني القاهره 
وبعد عناء وصلنا الاوتيل الساعه 12
وحسينا كده ان الحفله بدات 
لان الباركنج كان FULL (مش هكتبها فول علشان فى ناس ممكن تغمس فى المدونه)
المهم اتاري الحفله هتبدأ واحده 
دخل الجارسون وصلنا للتربيزه بتاعتنا 
وعاصم اصطاده 
عندكوا فري ايه النهاااااااااااااااااااااااارده
وبعدين قالى نصيحه 
متفكرش تاخد حاجه مش فري 
الا لما تبقى من اصحاب الاطيان ياولدي 
بصراحه الفري بتاعهم كان محترم اساساً
لان التذكره بـ 1200 جنيه 
فمش مشكله ياكلونا بـ 200 جنيه ويدوا الباقى للست هيفا
عاصم لغايه دلوقتي مش مصدق انه هيشوف هيفاء 
وهيبقى بينه وبينها امتار معدوده 
بيقولى انا خايف اغتصبها
قلتله لا متخافش انا همسكك 
المهم طلعت هيفا 
وياليتها ما طلعت 
ومن هنا احب انشرها للجميع 
هيفاء طلعت مقلب يارجااااااااااااااله
الاضاءه مكانتش كويسه 
فالصور مش هتطلع واضحه قوي يعني 

هوه النص متر الاحمر ده هيفاء ياجدعان 
متفتكروهاش نانسي عجرم ولا حاجه يعني

بيني وبينكوا المصوره بتاعتها خطفت الاضواء منها 

كان موجود فى الحفله شيرين 
وكان شكلها متنكد على اهلها 
وضاربه بوز معرفش ليه 
وزوجها طبعا كان موجود بس معرفش لاشكله ولا اسمه 
بس هيفا نزلت باستهم هما الجوز وطلعت
وفي اللحظه دي بس اتمنيت اكون جوز شيرين
فى اشاعات طلعت فى الجرايد ان كان موجود احمد السقا وحرمه 
وكان موجود كريم عبد العزيز وحرمه 
واحب اقولكوا ان دي اشاعات مغرضه 
محدش من الناس دي كان موجود خالص 
ونزلت هيفاء اللى مسمعناش منها ولا كلمه طول ماهى بتغني 
مسمعناش غير مزيكا وبس 
حتى فى راجل جنبنا 
عمال يقول فين بوس الواوا 
فين بوس الواوا 
مش دي بوس الواوا
احنا اتنصب علينا ولا ايه ياجدعان
وطلع راغب علامه 
وما ادراكم من راغب علامه
راغب علامه اللى مسابش بنت فى الحفله الا ما باسها 
واحنا قاعدين هنتشل من الصواريخ اللى بتتباس 
المهم خلصت الحفله  
ونزلنا

صوره من داخل الاسانسير 
اللى مش فاهمين منه حاجه وخايفين نلاقي نفسنا عالسطح

رجعنا اليكس طبعا مهدودين وصلنا الساعه 7 تقريبا
والعربيه كانت عايزه تعمل فينا حركه مش ولابد
بس الحمد لله وصلنا 
حبيت اضيف ان مرايات تواليت الفور سيزون 
تحسسك انك بتشوف بني ادم قدامك 
تخليك تحب تبص لنفسك فيها 
وده عن تجربه ياجماعه 
يعني انا ممكن اروح الفور سيزون 
علشان اشوف نفسي فى مرايه التواليت
وبالمره نشكر الامير الوليد بن طلال 
على الفورسيزون 
وعلى روتانا اللى بعتتلنا هيفا ..

تالت يوم بعد مارجعنا 
رحنا قلعه قايتباي 
احنا رحناها خمسين الف مره قبل كده 
بس عمري مادخلتها نهائياً 
معرفش ليه 
مع ان التذكره بجنيه يعني 
بس عاصم عمل فلحوص 
وقالها احنا طلبه 
ودفعنا كل واحد نص جنيه بس
عاصم مش بخيل ولا حاجه ياجدعان 
بس هوه بيحب يتفحلص بس
هوه يعني ايه يتفحلص ؟؟
المهم الصور

قبل ماندخل (الصوره من موبايلي)

من موبايل عاصم 
وبالمناسبه قعد يتحايل عليا 
علشان اتصور بنضارته ام 300 جنيه اللى قارفنا بيها 
وطبعا الصوره من موبايلي احلى

مبنى القلعه من موبايلي 

تصوير عاصم من موبايله الـ 6630
وطبعاً باين الفرق فى الخبره فى التصوير 
معلش لازم اتنطط عليه شويه
كفايه غتاته ونكمل 

منطقه سريه مطلع على البحر مباشره 
كان في منطقه سريه بحري برضه جنبها 
كان فيها اتنين بيحبوا بعض 

على السطح 
ولو يعرف الاشرف قايتباي اللى بيحصل فى القلعه اليومين دول 
كان المفروض يبنيلنا فكل بلد قلعه

الغتيت لازم يحط اسمه فكل حته 
كانه مستلمها من المماليك علطول

حد فاهم حاجه؟؟

صوره من الداخل

صوره اخرى

من الداخل

ماكيت للقلعه 
الراجل بتاع الاونكس ده الا عايز يطلع فى الصوره 

صوره من الجهه الشرقيه مطله على الاسكندريه والميناء 

عاصم .. واخرج مالبيبان .. الحر الضييييقه 
مع العلم ان عاصم عرضي مره ونص 
فالباب ده يعدي 15 واحد من حجمي المتواضع

الغتيت التاني 
مش عارف مشوفتش حاجه مكتوب عليها اسم السادات ليه 
ولا هوه مكانش فاضي يبعت اتنين يكنسوا القلعه ويكتبوا اسمه ؟؟

المهم بعد اسبوعين 
الواحد حس انه خلاص ريحته طلعت 
وللافس مكانش معانا هدوت تانيه 
وكل ماقول لعاصم روح يابني 
ودي الهدوم تتغسل ينفض ويخش ينام 
قلت اما اعمل حركه جريئه 
وقمت جايب الهدوم 
وغالى ميه فى الحله 
معلش معندناش سخان فى شقه اسكندريه
وقمت حاطط الهدوم وقعدت اغسل 
واغني حبيبي قرب بص وبص بص 
وبالطريقه العجرمه 
انتهيت ونشرت الهدوم 
ودخلت انام صحيت لقيت نفسي جالى برد وضيق تنفس 
وخلاص هموت بقى 
اتصلت بالاغاثه السريعه جت من الزقازيق 
بتلاته كيلو ادويه 
وقعدوا ينضفوا الضقه اللى بقت مزبله
واكتشفت ان مقدرش اقعد لوحدى مع واحد مكسح زي عاصم 
فى شقه لمده اكتر من اسبوعين 
والا هنموت من الميكروبات 
الناشئه عن تعفن قشر الموز 
والعيش وبقايا كبايات الشاي
وكفايه عليكوا فضايح لحد كده
والى اللقاء فى حلقه قادمه ..