مدونة أحمد هتلر

لسه واصل النهارده من مدينه مرسى مطروح او زي ما بيحبوا يسموها مطروح
مطروح وتيجي بسرعه .. هع هع
عايز الاول اقول ان موقع سمعنا بقى بيحقق دخل ~3$ يوميا تقريبا 15 جنيه يومياً
اللهم لا حسد .. هو لغايه دلوقتي مبيغطيش التكاليف الشهريه لكن ان شاء الله هيغطيها فى فتره قصيره
وهيغطي تكاليف انشائه من يوم ما بدأ .
نرجع بقى لموضوع مطروح
محافظه مطروح هيا من اهم محافظات الساحل الشمالى الغربي المصري 
هي المحافظه الوحيده اصلاً
وهيا ممتده من اول حدود ليبيا لغايه محافظه اسكندريه
فيها طبعاً مصايف رائعه وشواطيء اروع مخصصه لطبقات مجتمعيه متوسطه ومرتفعه
زيارتي لمطروح كانت مفاجأه وكانت عائليه
فللاسف انا مكانش معايا عربيتي ومقدرتش اتحرك كتير
وقعدت هناك يومين بالضبط
بس كانوا كفايه يدوني انطباع ولو بسيط عن المدينه واهلها
المدينه واسعه وصحراويه بالطبع
اقرب للاسماعليه من 10 سنين
مع فارق ان ماء الاسماعيليه هو ماء قناه السويس
وماء مطروح هو ماء البحر المتوسط النقى
درجه الحراره منخفضه هنا حسيت انى في الشتا
الناس هنا واضح انهم طيبين وغلابه
وحاسين بالامان .. عادي جدا ان البيوت مفتحه
والبوابات مفتحه
ودي تبقى بيئه خصبه للحراميه اللى عندنا
اللى بيسرقوا من اول الجزمه لغايه باب البيت نفسه
اسعار الشقق هنا غريبه جدأ
الشقه فى شارع اسكندريه وده شارع كبير فوسط البلد
زي شارع خالد بن الوليد فى اسكندريه كده
سعر الشقه دلوقتي فى اخر الموسم 90 جنيه لليوم
وسعر الشقه تمليك فى الشارع ده 150 متر بـ 300 الف
على ايه متعرفش ..
بس مستغربتش كتير اذا كان عندنا فى ميدان القوميه
الاسعارضعف المبلغ ده وطبيعي انك تلاقي شقه 200 متر بنص مليون
تقولش على النيل يا خويا
وربنا يخلى المتخلفين اللى بيدفعوا الاسعار دي فى الاماكن دي ..
الناس هنا متدينه سواء مسلمين او مسيحين
ودي طبيعه اهل البدو
الالتزام بالتقاليد الدينيه والاخلاقيه
محافظه مطروح كلها عدد سكانه لا يتجاوز 320 الف مواطن
ودول يمكن يكونوا سكان شارعين عندنا فى الزقازيق
مع الفارق الشاسع فى المساحه
معنديش خلفيه عن مصادر الدخل هنا
مع انى ملاحظ تدني المستوى المعيشي لسكان مطروح
مع ان فى نشاطات سياحيه ضخمه المفروض ان ليها عائد على المواطن المطروحي  ..

صور للغروب بشاطيء روميل

طبعاً معروف من هو روميل ؟
هو قائد القوات الألمانيه التى كانت تجاح الشمال الافريقي بمسانده القوات الايطاليه والألمانيه (دول المحور) ضد قوات الحلفاء 
وجرت معركه العلمين سنه 1942 فى الحرب العالميه الثانيه وتركت لنا العديد من الآثار ومقابر الأموات 

الحرب سابت لنا مشكله او نقدر نقول مصيبه بيعاني منها كل سكان مطروح 
الحرب دي سابتلنا مخزون هائل من الالغام الأرضيه اللى ممكن تنفجر فى اي انسان بدوي بسيط ماشي فى الصحرا الغربيه 
الحرب سابتلنا 24 مليون لغم القوات المسلحه شالت منهم 3 مليون لغم وفاضل 21 مليون لغم 
طيب ناس تسال والقوات المسلحه مشالتش باقى الالغام ليه ؟
اقولكوا انا ليه .. تكلفه رفع اللغم الواحد 1000$ يعني 5 الاف جنيه تقريباً 
يعني محتاجين مليارات علشان نشيل الالغام دي 
وعايز اقول كمان ان بعض الالغام دي معقده بطريقه متعمده 
كانوا بيزرعوا لغمين فوق بعض بحيث لو شالوا واحد التانى ينفجر 
وبتوصل لغايه 3 الغام فوق بعض محطوطين بطريقه فنيه رائعه 
لكن للاسف للدمار والخراب 
وضحايا الالغام فى مرسى مطروح كتير والمحافظه بتشتكى فعلا من الموضوع ده 
اللى واقف عائق قدام تنفيذ مشروعات زي منخفض القطاره لتوليد الكهرباء مثلاً 

ضحايا الألغام الأرضيه

لو الحكومه قدرت توصل لطريقه منخفضه التكاليف اعتقد نقدر نشيل الالغام دي اللى كل يوم بتقتل او بتعوق مواطن مصري 
افتكر ان صدام ايام الحرب مع ايران كان بيمشي قدام الجيش حمير علشان تطهر الطريق من الالغام 
حقوق الحيوان هيولعوا فينا بس اعتقد ده حل اوفر واحسن من اننا نموت بني ادم 

نرجع للصوره الحلوه لمرسى مطروح 

كنت نازل اول امبارح بالليل بالعربيه 
ولقيت موتوسيكل مرور واقف على اول الطريق وقافل السكه 
فى ايه .. ده معمر القذافي هنا 
نعم ياخويا ؟
سبته ومشيت من طريق تاني 
قلت البلد هتبقى مقلوبه بقى 
لكن ولا كأن فى حد هنا 
لقيت الاخ الزعيم قائد الثوره الليبيه عامل خيمه 
زي بتوع المآتم اللى عندنا جنب فندق وعمالين بقى يقولوا فقصايد وشعر 
ادور على عسكري امن مركزي واحد مش لاقي 
ايه ده هو الاخ برضه مش رئيس دوله ؟
كل اللى عملوه موتوسيكل على اول الشارع وموتوسيكل فاخره 
ايه التهريج ده 
لاقدر الله لو حصلت محاوله اغتيال ولا حاجه هتحصل ازمه دبلوماسيه بين مصر وليبيا 
يبقى ليه التهريج ده 
الراجل واضح انه مش خايف من اي حاجه ولا كان ليه اعداء سياسيين ولا حاجه 
هو مفيش معارضه فليبيا اليومين دول ؟
توقعي لو رئيس دوله تاني من الدول العربيه مشي فى الشارع 10 دقايق هيكون الشعب صفاه 
بس الوضع مستتب والحال أمان ..
وانا راجع رحت محطه القطر اسال عن المواعيد 
مفيش غير ميعادين بيروحوا اسكندريه 
واحد الصبح وده العاده 
والتانى الساعه 4 العصر تقريباً
وده بقى الاسباني ولا مش عارف اسمه ايه 
سالت الراجل ده بيوصل اسكندريه امتى 
قالى الساعه 9 كان هيغمن عليا 
5 ساعات فى السكه ليه يعني ؟؟
ده انا قلت ساعتين بالكتير ويكون وصل دول 280 كيلو يعني مش موضوع ..
ركبت بيجو بـ 15 جنيه ومخدش غير 3 ساعات تقريباً
ونختتم بصوره للرائعه روزي وهيا مأنتخه 

ذات العيون الزرقاء

الى لقاء آخر 
ورمضان كريم ….