مدونة أحمد هتلر

في يوم الاربع 5/9/2007
صحيت من النوم بدري عالساعه 10 كده 
المفروض انى هروح اجيب محمد عوف من المطار النهارده 
الاخ هيوصل من الرياض كمان كام ساعه 
قمت ولبست وحطيت اكل لروزي 
ونزلت .. سخنت العربيه 
دخلت البنزينه اللى على باب الشارع 
بـ 15 بنزين 80 لو سمحت 
مع ان الميكانيكي قايلي متحطش غير 90 
علشان الماتور الجديد 
بس اعمل ايه بقى مفلس
المهم .. طلعت على 45 
وخدته لاخره ولسه طالع منه لقيت واحد عسكري 
لابس ابيض كده 
فقلت اخده فطريقي ينوبني فيه ثواب 
المهم بيقولى زراعي قلتله لا صحراوي 
قالى طيب مش مشكله وقام راكب 
وقالى نزلنى على اول الزراعي قلت مش مشكله 
بعد شويه لقيته بيقولى متطلع زراعي 
ياعم بقولك انا طالع صحراوي 
يقولى الزراعي احسن فى الحر ده .. انا نازل دمنهور !
ياعم وانا مالى انا طالع صحراوي عاجبك ولا مش عاجبك
المهم نزلته على اول الزراعي وقلت توبه ان ركبت حد تانى 
هيا ناقصه رفع للضغط على الصبح كده 
دقايق ودخلت الكارته اديته اتنين جنيه مع ان المفروض ادفع 4
بس يالا بقى خليها عليكوا المره دي
خلوا الشعب ينصب مره على الحكومه من نفسه
المهم خدت الصحراوي 120-130 وفاوقات 140 
المهم وصلت الكيلو 100 بعد الريست 
وفى الكيلو ده اتسحبت رخصه العربيه علشان الفاميه
لما كنا راجعين من المزرعه انا وعاصم 
المهم المره دي بقى عملت ناصح قبل ما اوصل الكمين قمت 
واقف ولافف وماشي عكس 
لسه جاي امشي لقيت واحد جاي واقف جنبي راكب جولف 
وبيقولى هو ده رادار ..
قلتله ببلاهه انت شايف ايه ؟
قالى طيب وهتعمل ايه 
قلتله هرجع الريست لغايه ما يمشوا 
لسه ما كملتش كلامي لقيت السرينه 
والموتوسيكل واقف جنبي وبيقولى رخصك 
محبتش اعمل فيها فاندر جراوند واخلع
بمنتهى الاحترام اديته الرخص
قلت قشطه .. 3 مخالفات 
ماشي عكس السير ومفيم وكمان معدي السرعه 
قالى تعالى ورايا على اللجنه 
لفيت ومشيت وراه على اللجنه 
لسه داخل اللجنه لقيت العربيه اللى كانت واقفه قدامي
خلى العسكري يقف عند الشباك علشان يديله الرخص 
وقام جاري بالعربيه فى مشهد اول مره اشوفه 
ومن ذهولى لقيت نفسي قمت خابط رجل العسكري 
لقيته بيقولى متدوسني احسن 
كنت عايز اقوله روح اتشطر على اللي جري منك
قالى اركن على جنب 
لسه نازل من العربيه 
لقيت العسكري بيديني الرخصتين 
وبيقولى اتفضل 
الصراحه مفهمتش حاجه 
انا قلت هيسحبهم وياخد العربيه كمان 
ده حتى مسالنيش فين توكيل العربيه 
ولا كنت ماشي عكس ليه ؟
حصل خير حصل خير 
قمت ماشي 
عديت الكارته التانيه 
طلعت المحور وكل ما اسال يا جماعه فين المطار 
يقولولى امشي علطول 
حلوه الوصفه دي اما نشوف اخرتها 
المهم وصلت المطار بسلام 
دخلت الباركينج 
ادور على عوف 
يا جماعه محدش شاف عوف ؟؟
مش دي طياره الرياض ؟
ايوه هيا .. 
طيب مشوفتش عوف
مفيش عوف …
طيب كلمت منسي .. يابني هو في حد تاني هيقابله ؟
قالى لا ..
المهم رصيدي خلص وانا بكلم منسي 
يادي النيله .. اه انا كنت قايله يشحنلى كارت 
يارب يشحن وميستندلش زي عوايده 
المهم بعد مرور ساعتين ونص انتظار 
طلعت من المطار بعد ما فقدت الامل 
ودفعت اخر 5 جنيه معايا تمن الباركنج بتاع المطار 
وهكذا اكون فلست ومعييش رصيد 
يادي النيله العربيه كمان مفيهاش بنزين 
ايه الفيلم العربي اللى انا فيه ده ؟
لقيت نفسي فمدينه نصر 
جنب رابعه العدويه 
قمت راكن .. وقلت بس بقى 
انا انزل اشحت اى فلوس من الجامع 
وقلت لا ابداً انا اموت من الجوع ولا اني اشحت 
كرامتك يا هريدي العار يا ولدي 
المهم نزلت شربت من الكولديرات الكتير اللى هناك 
ودخلت عملت زي الناس وطلعت 
قعدت فى العربيه 
قلت بس انا هبات فى العربيه لغايه ما يبانلى صاحب 
وبعدين قلت ابعت بليز كول مي لاى حد من اصحابي اللى قارفني 
طول عمرهم هما بيبعتوا وانا اتصل 
اعملها مره من نفسي 
طيب هيا بتتعمل ازاي ؟؟
يادي النيله ايه النحس ده 
حسيت بالجوع من الصبح ما كلتش حاجه 
قلت يا واد اعتبر نفسك صايم 
رمضان على الابواب اتعود من دلوقتي بقى 
المهم مفيش شويه ولقيت التليفون قام رانن 
انا : الو مين ؟؟
عاصم : انا عاصم يابني انت فين 
انا : عاصم حبيبي الحقني انا فمصيبه 
عاصم : ايه يابني امن الدوله اعتقلوك ؟
انا : لا ياريت .. اولا انا مفلس 
ثانيا معييش رصيد 
ثالثا مفيش بنزين فى العربيه 
عاصم : طيب وانت فين دلوقتي ؟
انا : قدام رابعه العدويه بشحت
عاصم : ياعم كنت روح السيده ولا الحسين 
انا :  مش وقت تهريج والنبي
عاصم : طيب انا هجيلك هركب واجيلك .
انا : حولى كارت 10 وانا هتصل باي حد من اصحابي فمدينه نصر يلحقني 
عاصم : طيب هشحنلك واجيلك .
انا :  طيب مستنيك .
وخلصت المكالمه 
نص ساعه عدت ولا رصيد اتحول 
ولا عاصم اتصل قالى انا فى الطريق 
طيب حد تاني يتصل يعبرني يا جدعان 
قعدت ادور على اي فلوس فى العربيه 
من اللى كنت بدفع منها بقشيش ايام العز 
او الباقى اللى كنت برميه فى الدرج 
ببص ملقيتش الا ربع جنيه 
قلت الحمد لله فرجت 
وبعدين قلت وده هشتري بيه ايه ده 
اي حاجه بربع جنيه وخلاص 
المهم نزلت وداخل على اقرب كشك 
وبعدين قلت ايه ده 
انا اصلا مش معترف بقيمته الشرائيه 
الراجل هيحتقرني اوي 
ايه ده اللى جاى يشتري بربع جنيه ده 
المهم حطيته فجيبي ورجعت العربيه تاني 
لسه التليفون بمسكه قام رانن 
انا : الو ميييييييييين ؟
عاصم : انا يابني هو في حد بيعبرك غيري !
انا : حبيبي يا عصوم ها عملت ايه 
عاصم : انا كلمت مصطفى وهو مفلس 
وكلمت مش عارف مين عطيه وهو فماموريه دلوقتي 
وقابلت باشمهندس محمد وجاينلك فى الطريق دلوقتي ..
انا : ياعم وقعت قلبي ما تقول جايلك من الاول .
عاصم : لازم ازلك شويه زي مانت ممرمطنا وراك .
انا : ماشي ياعم اما تيجي بس .
عاصم : ساعه بالكتير ونكون عندك .
انا : اوكي مستنيكم .. باي ..
وعدت الساعه وعاصم لسه موصلش 
وعدت الساعه التانيه والواطي لسه موصلش 
قلت الواد ده مات ولا ايه 
ايه اليوم النحس ده
مفيش شويه ولقيته بيتصل 
عاصم : انت فين يابني انا قدام رابعه اهه وفى واحده هنا عماله تصوت والناس ملموممه 
انا : ايوه ماهى بتصوت عليا .
عاصم : ياراجل طيب انت فين .
انا : بيدفنوني دلوقتي .
عاصم : هو في شبكه فى الترب ؟
انا : انجز ياض انا دقيقه وهكون قدامك .. سلام 
واول ما شوفته 
حسيت كانى عيل تايه من والدته وما صدق شافها 
وقام ضاربها بالقلم وقايلها انتى كنتى تايهه فين
المهم خدته بالاحضان وبتاع 
ورجعنا على العربيه 
طلعنا على اول بنزينه 
حط بعشرين 80 
مفيش 80 في 90 بس يابيه 
يادي النيله 
بسال سواق تاكسي انت بتحط 80 منين 
قالى انا بحط من شبرا 
يالهوي شبرا بتسافر علشان تحط 80 
ايه هو مخدرات ولا ايه ؟؟
حطلى 90 ياعم وامري لله 
قالى ماشي وقام حاطط 90 
كنت خلاص هموت من الجوع 
طلعنا على رمسيس كلنا كشري 
الطبق بـ 3 جنيه وايه تلوث بقى مقولكش 
انا كان عندي استعداد اكل اى حاجه ساعتها 
الجوع كان هيموتني 
طلعنا من رمسيس على عبود ومن هناك على الزقازيق زراعي 
وعدينا بنها وماشيين على 70 علشان الباشمهندس مبيحبش السرعه 
مفيش شويه وحصل موقف لا كان على البال ولا على الخاطر
زلطه محترمه فرتكت القزاز الامامي

يادي النيله هنموووت ولا ايه ؟؟
انا مش شايف حاجه قدامي 
اديت انتباه وقعت اهدي واخد يمين 
كنت خايف اخبط حد قدامي من غير ما اشوفه 
وقفنا جنب بنزينه بسلام 
الراجل جه عملى فتحه فى القزاز زي انتوا شايفين علشان اشوف منها 
ولبست نضاره الشمس علشان القزاز ميدخلش فعيني والهوا 
ومشينا بدل 70 على 30 
وخدنا ساعه على ما وصلنا الزقازيق 
والناس عماله تبص علينا وتضحك 
ايه اللى لابس نضاره شمس بالليل ده 
وانا ايه فاكر الناس كلها مركبه فوانيس صفرا 
اتارى انا اللى احوليت ونسيت انى لابس النضاره 
وصلت البيت صحيت بابا ..  قوم جيب غطى للعربيه من الجراج 
بيقولى ليه 
بقوله اصل القزاز الامامي اتكسر 
بيقولى ليه ؟؟
انت عملت حادثه ؟؟
لا مفيش حاجه دي زلطه بس كده 
نزل معايا فتح الجراج وقام مدخل العربيه جوه 
وقعد يضرب كف على كف مش مصدق انى لسه حي ارزق ..
بيقولى يابني انا بقالى 35 سنه بسوق عربيتي عمر الموقف ده محصل معايا 
قلتله مانت جايبلى عربيه سكه اصلاً  ..
المهم طلعت انام 
واول ما حطيت راسي على المخده افتكرت حاجه مهمه جدن 
ومحدش يقولى جداً هيا جدن ..
ان روزي فى اسكندريه لوحدهاااااااااا
يالهوي .. هبقى اسافرلها الصبح بقى .
وهكذا انتهى يوم لن يمحى من ذاكره ايام عمري ..