مدونة أحمد هتلر

يُسمعني حين يراقصني كلمات .. ليست كالكلمات ..
ازاي متفهمش المهم ان دي اغنيه كلمات للرائعه ماجده الرومي (للتحميل)
انا بكتب من جهازي بغرفتي المطله على البحر الابيض المتوسط بمدينه الإسكندريه 
بقالى فتره مكتبتش فى المدونه 
بس طبعا الكتابه فى المدونه ليها طقوس خاصه 
من حيث توافر الرغبه فى الكتابه 
وحضور الروح الكتابيه المقدسه ..
نبدأ الموضوع من الاول 
نرجع بالذاكره الزمنيه اسبوعين للوراء 
نشره الأخبار : درجه الحراره آخذه فى الصعود ..
بابا : احنا ايه اللى مقعدنا انا مسافر اسكندريه .. مين جاى معايا ..
انا باحتجاج وبلهجه صارمه مهدده : مفيش سفر الا لما تجيبولى العربيــه ..
وكان من الواضح جداً انى آخذ هذا الموضوع بمحمل الجد 
ولم تفلح محاولات تجاهلى 
يوم الجمعه القبل السابقه 
كنا بنتفق مع صاحب العربيه الريتمو السماوي موديل 82 
السبت الصبح كنا فى المرور بنعمل التوكيل 
واستلمت الرخصه والمفاتيح 
وامتلكت اول عربيه بعد ايام قليله من عيد ميلادي العشرين 
وأعود أعود لطاولتي … أعوووووووووود … لطاولتي 
لا شيء معي .. الا كلمــــــات .. كلمــــــــات ..
سوري للخروج عن النص 
وها انا انطلق بالسياره هنا وهناك 
اتصرمح في شوارع الزقازيق العتيقه 
اتصرمح من فعل تصرمح يتصرمح تصرمحا 
يصيع يعنى 
صور من اثناء الصرمحه ..

 تانى يوم 
ومع اول فركه يا معلمى 
طار الفتيس 
والعربيه اعلنت العصيان ورفضها اسلوب القياده 
يا بنت الـ .. انا اللى يقل ادبه معايا اديله بالشوز 
بس انا هعديهالك المره دى ومش هبيعك 
لو عملتيها تانى هبيعك وبدون تردد
وبدأنا أول زياره للميكانيكيه..

واكتشفت فى النهايه ان العربيه محتاجه فتيس استيراد …
برررروم طيب بكام ده يا اسطه شحته عفشه ؟؟
يعمله 600 جنيه يا استاذ 
يالهوي .. يالهوي .. هو انا معايا اجيب للعربيه بنزين 
طيب مشيهالى على كده مؤقتا … 
ماشي يا بيه ..
المهم تخليداً لذكرى الأسطه شحته 
اول ميكانيكي اعتدى على عفشه سيارتي 
قررت تسميه اول هديه من نوني للعربيه باسمه 

كان فى (كلب) صغير كده هديه من نوني برضه 
بس مش عارف اسميه ايه ..
قلت اصبر عليه شويه هيجيله اسم برضه ..

بعدها بيوم الوالد والاسره خلعوا وسابوني فى الزقزوقه 
انا وشحته وحيداً وحيداً .. لا شيء معي سوى ..  كلماااااااااااااااات 
المهم ..
قررت الانطلاق الى الاسكندريه بسيارتي العصماء 
فى لحظه طيش وجنون ومع ملاحظه اننى بسوق العربيه مبقاليش اسبوع
ولا حتى عارف السكه اللى توصلنى ايه 
انا كل اللى اعرفه انى همشي علطول ..
علطووول الحياه .. نقابل ناس 
المهم 
طلعت من الزقزوقه لبنها 
ومن بنها للقاهره 
قابلت واحد صاحبي من هناك 
وطلعنا على الصحراوي 
وزربووووووووووووووو 
مشفتوش بقى الغرز بين العربيات النقل الكبيره 
ولا وانا بشد مع العربيات الفيراري والكاديلاك والبورش كمان 
وسعت ها ؟
هما كانوا مرسيدي وبي ام صراحةً .. خخخ
المهم وفى حركه جريئه 
تم الضغط على الفرامل بشكل مفاجيء 
لاختبار سرعه رد فعل السياره وتجربه الفرامل 
ومن على سرعه 110 توقفت السياره تماما بعد 11 متر تقريبا 
ومن هنا اكتشفت ان الفرامل ممتازه 
لكن وقفت بعد 3 متر من المكان اللى كنت عايز اقف فيه 
مش مهم رجعت بالعربيه الكام متر دول وامرى لله 
ونزلت اخد صوره تذكاريه للريتمو بتاعتي 
فى اول رحله ليا بيها على الطريق الصحراوي 

وسبنا علامتنا على الكيلو 98 اسكندريه القاهره الصحراوي ..
ووصلنا الأسكندريه بأمان 
وكان لابد من اعطاء دش حلو للفيراري بتاعتي كنوع من رد الجميل 

وبعد يوم واحد من الصرمحه فى الاسكندريه 
قررنا زياره المعموره 
واثناء القيام بجوله داخل المعموره 
وقفنا فى كمين للمباحث 
رخصك .. اتفضل .. اركن وانزل خد الوصل 
انت ياعم انت 
وصل ايه ؟؟؟
ممنوع التفييم 
نعم ؟؟
ماهي مصر كلها مفيمه .. اشمعنى انا يعني ؟؟؟؟؟
هو كده عاجبك ولا مش عاجبك ؟
خلاص ياعم هات الوصل وامرى لله 
طيب انت هتاخد الرخصتين ليه 
سيبلى واحده يا غتيت ..
المهم تم اطلاق اسم الضابط على اسم الكلب الصغير 
لانه اول ضابط يسحب الرخص من العربيه
كلمت ناس معارفي فى اسكندريه 
وقررنا ننزل المرور تاني يوم لانه قالى هتستلمها من مرور محرم بيه
روحنا المرور الراجل قالى هجيبلك الرخصتين من غير فحص ولا حاجه بـ 150 جنيه 
قلت مش مشكله يحيا الفساد والرشوه ..
قعد شويه وبعدين رجع وقالى مينفعش دول بيسافروا الزقازيق علطول ومعادوش بيقعدوا هنا 
قلت الله يخربيتهم 
قررت السفر للزقازيق 
ورجعت بعد يومين للزقازيق عبر الطريق الزراعي 
وكان معايا واحد صاحبي نفس اللى كان معايا واحنا جايين 
واحنا ماشيين على الطريق 120 على الطريق الدولى الاخ سرح مني ونام 
هوا من النوع اللى بيترعب من نفسه اساسا
ورابط الحزام ومؤدب قوي 
واول مره يسافر مع حد كان معايا فعربيتي 
بعد التاكد من خلو الطريق من ورايا وقدامي 
قمت دايس الفرامل بشكل مفاجيء 
ومرسوم على وشي انطباع اننا خلاص هنعمل حادثه وهنموت 
الاخ صحي من النوم مفزوع لقاني عامل كده وصوت الكاوتشات على الارض رعبه 
لقيته نزل فى الدواسه …
وانا خلاص بقى مت على روحي من الضحك 
ربع ساعه مش قادر امسك نفسي من الضحك كل ما ابصله اضحك 
بعدين لما هديت 
بيقولى هو كان فى ايه ؟؟
قلتله كنت بجرب الفرامل
المهم وصلنا الزقازيق 
سالنا على الرخص قالوا مش هتوصل قبل اسبوعين 
يالهوي الوصل مدته اسبوع بس
طيب الحل ايه ؟؟
قالولى لما يخلص الوصل تيجي تجدده من هنا 
وماله افضل انا واخد الزقازيق اسكندريه رايح جاى علشان ام الرخص والوصل 
وكل ده علشان سعادته مانع التفييم على الطبقات الشعبيه اللى غير تابعه للشرطه والجيش 
المهم مرديتش اعمل فيها ثوري وتاني يوم كنت راجع اسكندريه 
من الطريق الزراعي اللى جيت من عليه 
المصيبه بقى وانا في الطريق 
كنت حاطط الوصل بتاع الرخص في الشماسه
وصوره توكيل العربيه 
والاتنين طاروا في السكه من غير ما الواحد ياخد باله 
يادى النيله 
كنا فى طنطا تقريبا 
طيب نرجع الزقازيق ؟
ولا نكمل على اسكندريه 
نكمل على اسكندريه واللى يحصل يحصل 
دخلنا ابيس 
واذا بنا نفاجيء بالكمين اللى عمره ما اشتغل فى حياته شغال 
يا ام الغتاته 
حمد الله على السلامه .. رخصك .. مسحوبه 
طيب ممكن الوصل .. ضاع 
طيب اركن على جنب 
طيب .. 
يعني لا فى رخص ولا وصل ولا اى حاجه 
كده العربيه تتسحب 
عاصم بيقوله ممكن اكلم الضابط ؟؟
لقيته بيقوله هو انا مش عاجبك ولا ايه 
قلتله لا واحنا نقدر نزعلك يا كميل انت
انت الكل فى الكل يا معلم 
وقمت رازعه 20 جنيه 
لقيته بيقولى انت كده مقصر معايا قوي 
قمت مديله كمان 20 جنيه 
قالى اتفضل 
قلت قشطه يحيا الفساد والرشوه انا كده لو سارق العربيه بجد كنت عديت 
عاصم يقولى كتير 40 جنيه 
قلتله لا مش كتير شوف كنت هدفع قدهم كام مره لو العربيه اتسحبت 
المهم دخلنا اسكندريه وروحت نزلت الشنط وانطلقت .. 
رحنا قياده الامن المركزي فى الراس السوده
نعدي على ضابط صاحب عاصم من عندنا فى الزقازيق
واكتشف ان عربيته من غير نمر ومتفيمه دارك بلاك 
بدا الحقد الطبقى يشتغل جوايا والعن ام التفرقه العنصريه اللى البلد فيها 
بعديها بكام يوم كنا قاعدين مع عقيد خال واحد صاحبنا فنقطه المنتزه
وبيقولنا ان الضابط لازم يكون مثال للانضباط والالتزام بالقوانين 
كنت هقوم اقل ادبي لولا احترامي لسنه ..
المهم تمر الايام ..
ونحكي لكم عن البقيه لاحقاً 
لاني زهقت من الكتابه 
واكيد انتم زهقتم برضه من القرايه ..
سلااام