مدونة أحمد هتلر

كيفك حالكم ياقوم .. وكيف حال الأوس والخزرج
يقولون ان شيخ القبيله اخترع ما يسمى بتحديث الدستور
عمله أبجريد يعني
المشكله بقى ان فى ناس بتقول إن الأبجريد ده نزله من موقع متفيرس
والمصيبه ان النورتون حاول يعمل مظاهرات ويعمل اعتصامات بس الفايرس كان اقوى
وقدر يعمل بلوك للنورتون وعمل سيطره كامله على الهارد وكرت الشبكه ..
فاهمين اي حاجه ؟؟
والله مانا فاهم
عموماً معدش فى منه فايده الكلام فى موضوع التعديلات
وبمناسبه انى اتاخرت عليكم فى الغدا انا كنت عيان بقالى 3 ايام والناس اللى مرديتش عليهم فى الموبايل ميزعلوش مكنتش قادر اتكلم اصلا
وللأسف مقدرتش اروح الاعتصام يوم الأحد لاني كنت بموت ..
عموماً اخبار لجنه الإستفتاء فى دائرتنا المستطيله
من مدرسه مش عارف ايه اللى على اول شارع وادي النيل
المدرسه فيها تلت لجان .. بعد مفاوضات اقناع دامت 10 دقايق بس مع الحج دادي اللى كان عايز يمتنع مع حبايبنا الوحشين الممتنعين .. توجه دادي بسيارته الى مقر التصويت ..
ودخل الى اللجنه بعزيمه مواطن صالح
دخل اول لجنه من التلاته لقى فيها صندوق واحد مليان على آخره مع ان المدرسه مدخلهاش 20 واحد على بعض من الصبح والمصيبه ان الساعه كانت 7 والصناديق مقفوله بالشمع الأحمر .. شفتوا حاجه تفرقع اكتر من كده
بابا بدأت تشتعل فيه ثوريه جيفارا وحب شوفينيه لوطنه وبدا فى الاسئله الحاميه لمدير اول لجنه .. انت ياض ياللى قاعد هناك قوم كلمني .. انا عايز أدلى بصوتي .. كيف يمكنني ذلك يا رجل ؟
الراجل قاله اسمك فى الكشف بابا قاله لا
قاله تبقى فى اللجنه اللى جنبنا
بابا قاله وهل رأيت الأشلخ بن بلتعه ؟
اللجنه التانيه ياعم الحج امشي من هنا
طبعاً دخل اللجنه التانيه وكله ثقه وشفافيه
وديموقراطيه جاهليه
لقى اسمه فى القوائم
قال بس عليا وعلى اعدائي هصوت يعني هصوت
هقول لا يعني هقول لا .. هقول لا وخلاص
المهم
الراجل شاف عم الحج دادي ابو حسن مربي دقنه الراجل خاف وقالك الاخوان وصلوا مع ان ابويا لاهو اخوان ولو اخوان مكنتش هقعدوا فى البيت
قالوا انا عايز ادلى  بصوتي
المهم الراجل قاله وماله وهوه بيرتعش واداله ورقه الاستفتاء
ملاها وراح يحطها الصندوق ده كمان مليان ومتشمع بالشمع الأحمر
ايوه يا جدعان هوه فيه ايه ده محدش دخل اللجنه من الصبح ؟؟
فين ياعم الحج انت الحبر الفسفوري ؟؟
وبعد نقاشات ومفاوضات 
قاله امضيلي على البطاقه الإنتخابيه بتاعتي انى صـوت .. قاله اه وماله ماشي
وبعدين بابا بيقوله هات بقى السجل علشان امضي فيه اني صوت
قاله لا خلاص ماهو كده تمام
قاله لا انا عايز امضي
بالزمه شفتوا حكومه اجمل من بتاعتنا حتى الإمضه بيمضوهالنا والإنتخابات بيصوتولنا فيها ..
ياجدعان متريحوا دماغكم اما انتم غاويين تعب صحيح …

بابا طول الليل قاعد يتفرج على الجزيره وبعد شويه يقلب على التليفزيون
التليفزيون يقول شفافيه ومصداقيه وتلاقي ايه الصناديق كلها فاضيه مليانه لغايه ربعها ومدرسه عبده الاقرع مليانه ورق ..
تقولش الناس عندنا خلاص الثقافه الإنتخابيه عندهم ارتفعت مره واحده

نكته بقى حصلت فى مؤتمر التلت معلمين على التليفزيون المصري
واحده من الصحفيات بتسال كرم جابر مساعد وزير الداخليه
عن الشفافيه والديموقراطيه قالها انه كله تمام قالتله امبارح فى شارع كذا كان فى شباب عاملين تظاهر سلمي والامن المركزي قدامي جه وقبض عليهم فى عربياته ومشي بيهم
قالها محصلش
برضه الراجل معزور يمكن ميعرفش
تبقى مصيبه لو طلع مبيعرفش
أوعى حد يديله المدونه بتاعتي يا جدعان .. انا مبطيقوش لله فى الله
ووداعاً يا احبائي وداعاً
وأراكم عند إلتقاء الشمس بالدستور الجديد بعد ثوره العقلاء