مش عارف حاسس العنوان طويل وكنت عايز ازود عليه ..
المهم طبعاً المتوقع من العنوان ان الموضوع هيبقى بالفصحى
لا الموضوع ده باللهجه العاميه الدارجه فى الشوارع وعلى القهاوي والغرز كمان ..
دايماً كنت اسمع ان السياسه ماهي الا مجتمع قذر مجتمع واطي من الآخر
مجتمع اللا أخلاقيات .. مجتمع لا يعرف الرحمه او الشفقه ..
والكلام ده بسمعه على لسان اهل السياسه نفسهم
طيب لحد كده وكويس .. احنا ولاد المجتمع والطبقه الوسطى التى لا تمت للبرجوازيه بصله والغير متحكمه فى السياسه او السياده منعرفش اي حاجه عن المجتمع ده الا اللى بيظهر منه واحيانا يمكن غالباً مبنفهمش .. ده فى حتى رجال سياسه مبيفهموش ..
يعني مثلاً لما السادات قال انه مستعد يروح لآخر بلاد العالم فى خطبته الشهيره فى مجلس الشعب المصري محدش كان عارف انه يقصد انه مستعد فعلاً يروح الكنيست … الا 3 اشخاص تقريباً حسب اقوال الدكتور بطرس غالي في مذكراته ..
بالاقي بعض الأشخاص المعارضه والرافضه لشخص الرئيس الراحل صدام حسين بتقول انه توصل للسلطه سرقه وخلسه .. يعني انه سرقها من اللى قبله عن طريق ثوره او اغتيال او او او ..
طيب دول ميعرفوش ان شارون وهو عمره 14 سنه كان عضو من فرق الهاجناه واللى كانت النواه الأولى لجيش الدفاع الإسرائيلي ؟؟
ومع ذلك بقى رئيس وزراء دوله اسرائيل !!
ملحوظه شارون درس القانون فى كليه حقوق جامعه تل ابيب 
..
ميعرفوش ان السادات شارك فى اغتيال أمين عثمان ؟؟
وميعرفوش ان بيجن كان له يد فى مذابح صبرا وشاتيلا ؟؟
ومع ذلك الاتنين خدوا جايزه نوبل للسلام مناصفه !!
عرفتوا يعني ايه سياسه ؟
عرفتوا انى لما اطلب اننا نحل مشكله المخدرات بالخمور اني كنت سياسي ؟؟
محدش منا يعرف ايه اللى بيحصل فى الاتفاقات والمعاهدات الدوليه ولا المقابلات والاجتماعات المغلقه … محدش منا يعرف امريكا بتخطط لايه بعد 5 سنين …
تفتكروا ان الإطاحه بحكم صدام هيا فكره بوش الإبن ؟؟
ولا سياسه موضوعه من ايام بوش الأب ؟
يعني في مخطط مرسوم .. رئيس الدوله الجديد بينفذ مخطط رئيس الدوله القديم ..
حد كان يفكر فى الموضوع ده ؟ يعني ممكن اللى بيعمله مبارك دلوقتي ده كان من افكار السادات .. وممكن كمان تكون معاهده السلام من افكار عبد الناصر … يالهوي .. ممكن !!
انا بس حبيت اوضح ان السياسه لا تستلزم عقليات مغلقه .. تحيط نفسها بأطار الدين والأخلاقيات .. وانه لا مجال لذوي الفضيله فى ملعب السياسه .. حتى وإن إدعوا ذلك ..
فلا سياسي لديه اخلاق سوى مصلحه وطنه واهداف عليا يسعى إليها مهما كان الثمن ..
وكلمه مهما كان الثمن معناها ان كل الطرق مباحه ومشروعه من اجل تحقيق الهدف ..
وبلادي بلادي بلادي
لكي حبي وفؤادي .. تررم تررم
أحدث التعليقات