مدونة أحمد هتلر

اليوم التالت ده كان يوم لذيذ جدا
صحينا من النوم متأخر طلعنا على سان ستيفانو 
عالفود كورت علطول .. طلبت واحد برجر يار من مؤمن
وبصراحه ده خلاني اخد موقف نهائي من مؤمن وكل منتجاته
زيزينا فى الزقازيق بيعمل حته برجر مكس احسن منه ميه مره !
اختفت يانيا عشر دقايق ورجعت معاها ايس كريم
قعدنا نكلم ماتيا شويه كانت موجوده اون لاين
وبعد كده طلعنا على القلعه
الجو كان مشمس وفنفس الوقت في غيوم
وانا داخل من البوابه بتاعه الامن
الموظف كان بيكلمني انجليزي
لما شاف التذكره بتاعتي قالى انت مصري
قلتله اه .. قالى وسايبني اتكلم انجليزي ده كله !
قلتله وايه المشكله مانا فاهمك وخلاص عربي انجليزي مش مشكله يعني

 

» أكمل القراءة

واحد صاحبي فخور قوي انه هوه و ابوه وجده الباشا كانوا وفديين
واول ما قلتله ايه رايك فى الليبراليه وشرحتهاله عالسريع
لقيته بيقولى الكلام ده مينفعش فمصر .. ده كفر واحنا دوله مسلمه

عضو فى حزب وفخور بيه وميعرفش ان الحزب ليبرالي من 80 سنه!
عالم واخدينها وراثه

تكمله لموضوع اسكندريه بنكهه جديده
انا قعدت فتره ادور على اسم للقصه قبل ما اكتبها
فكرت فاني اسميها "فتاه الغرفه المجاوره"
وبعدين استقريت على سبع ليال
قريت كمان كتيب قصص قصيره لاحسان عبد القدوس كان عوف ادهولي
علشان احاول افهم اي حاجه عن طريقه كتابه القصص القصيره
مقدرتش اوصل لهيكل معين اتبعه سوى اني بوصف الاول الشخصيه
وبعدين بكتب القصه .. مش عاجبني النظام ده
عاشت الفوضى .. انا هكتب اللى هيجي على دماغي حسب ما هفتكره وخلاص

ضهر تاني يوم الساعه 12 صحينا من النوم
يدوب جهزنا بسرعه ونزلنا
خدنا العربيه وطلعنا على سان ستيفانو
دخلنا سلينترو .. الوايرلس كان فيه مشكله
طلبت الكابتشينو بالفلافور المفضله ليا
ويانيا طلبت لاتيه مكياتو .. قعدنا نتكلم حوالى نص ساعه
بعد كده نزلنا خدنا العربيه من الباركنج
كنت مخطط اني هبدأ بمتحف المجوهرات الملكيه
لكن للاسف المتحف مقفول بيتعمل فيه ترميمات
ومتوقع افتتاحه كمان شهرين
نفس الكلام حصل مع المتحف اليوناني الروماني
وبصراحه مش عارف ازاي متحفين من الكام متحف المعدودين عالصوابع
الموجودين فى اسكندريه يكونوا مقفولين وبيتعملهم ترميمات فنفس الوقت !
فنفس المنطقه فى متحف الاسكندريه القومي

» أكمل القراءة

قصه المفروض كنت هكتبها من اكتر من شهر
زي ما وعدت بطلتها اللى مش هتقدر تقراها ..
القصه بدأت من يوم 29/12/2008 لغايه 5/1/2009
جزء كتير من القصه حولته من اليوميات اللى كنت بسجلها عاللابتوب طول الاسبوع
واعاده تنسيق القصه كان فى زيارتي الاخيره لاسكندريه مع عاصم
بدايه القصه مبدأتش من يوم 29 زي ما كتبت
بدايه القصه كانت قبل اليوم ده بـ 60 يوم بالظبط
كنت انا ومنسي وعوف فى الغردقه
تفاصيل تعارفي بيانيا كنت دونتها فى تدوينه صباح الخير سلوفينيا
يمكن مكتبتش فيها ان كان فى اعجاب متبادل بشكل ما
ده يمكن لاني ممتاز جدا فحكايه اخفاء المشاعر
او نقدر نقول اني مش خبير فى اظهار مشاعري ..
يانيا وبرغم انها مش من الشخصيات السهل التاثير عليها فكريا
وبرغم سنها الصغير 19 سنه يوم 28/12/2008
الا انها خدت قرار انها تيجي اسكندريه مخصوص
علشان تتاكد من مشاعرها .. منكرش اني عملت حاجات كتير
علشان انا كمان كنت عايزها تيجي تاني
حاجات معتقدش اني كان ممكن اعملها
زيارتي لسفاره سلوفينيا فى القاهره
الاقرار اللى بعته لوالدها والموثق من السفاره هنا
كل دي حاجات وقت ما عملتها مكنتش عارف انا بعملها ليه
انا هكتب كل حاجه زي ما حسيتها فوقتها
لان القصه دي كانت اول قصه توصلني لحدود عاطفيه
مكنتش متوقع اني هوصلها .. مكنتش متوقع انها هتكسر حاله الجمود
قصه الفرق بين اولها واخرها مش سبع ايام ..
سبع سموات .. بين قمه الحب وقمه الكره ..

انا دايما عندي احساس ان اسكندريه دي تميمه الحب بالنسبه ليا
اي بنت بيكون بيني وبينها علاقه .. لازم اعديها على اختبار اسكندريه
اسكندريه هيا اللى هتقولى اذا كانت العلاقه دي هتستمر ولا لا
من اول بنت خالص .. انا تقريبا سبتها علشان لما طلبت منها تيجي معايا اسكندريه
خافت ورفضت .. ودي كانت نهايه العلاقه ..
» أكمل القراءة

واحد صاحبنا نزل يدور على ديسكو يرقص شويه
لقى واحد وبعد ما دخل اكتشف انه كباريه وانه هيتفرج مش هيرقص !
قالك بما اني اتدبست فمينيمم تشارج 100 جنيه
انحرف مره من نفسي بقى !
طلب قزازه Red Wine بـ 150 جنيه لوحدها
وبعد ما فتحوا القزازه قالهم : هوه الكاس مفيهوش تلج ليه ؟
عمل زي الافلام ومسك الكاس
شم الاول .. وبعدين حاول يشوف فى ترسبات فى الكبايه معرفش من الضلمه
وداق اول شفطه .. كان هيرجع طبق البانيه المحروق اللى اضطر ياكله استخسار !
قعد يتابع الرقاصات وهما طالعين نازلين وكل ما تطلع واحده يقول هوه ده الشاسيه التمام
تطلع التانيه يقول هوه فيه ايه ؟؟ هما بيجيبوا الحاجات دي منين !!
وبعد ما رجعت ثقته فبنات مصر اللى كان فقدها بسبب الاشكال اللى بيشوفها فى الجامعه
دخل عليه المطرب وساله حضرتك منين
قاله من القاهره .. وبتعمل ايه فى اسكندريه ؟
قاله شغال هنا .. تحب تسمع حاجه ؟
اه .. زحمه يا دنيا زحمه لعدويه !
معرفش ايه اللى طلعها على دماغه
بس مات من الضحك لما لقاه بيقول
هنغني زحمه يا دنيا زحمه علشان رجال اعمال القاهره
وبص لواحد قصير كان قاعد فى الترابيزه اللى جنبه بسخريه
وقال فسره تلاقيك صياد سمك على فلوكه وهوه عمال يقولك يا قبطان طول الليل !

كلنا عارفين موقع ارشيف من فتره طويله
الموقع فكرته انه بيقوم بارشفه كل صفحات مواقع الانترنت
بدايه من سنه 1996 لغايه النهارده
وطبعاً ده معناه انهم محتاجين سيرفرات بمساحات تخزينيه ضخمه جداً
مهندسين الشركه عملوا اختراع محترم اسمه البيتا بوكس  PetaBox
كل ده لذيذ جداً
فى زيارتي الاخرانيه لمكتبه الاسكندريه مع يانيا
شفت بالصدفه داتا سنتر كده مستخبيه
مستغربتش غير لما شفت عليها شعار انترنت ارشيف !
ايه اللى جاب ارشيف مكتبه اسكندريه ؟؟!
لما سرشت عن الموضوع لقيت مكتبه الاسكندريه
فيها البيتا بوكس الاول الموجود بره سان فرانسيسكو فامريكا
والبيتا بوكس اللى موجود فى المكتبه عباره عن 20 راك سيرفرات
عندهم القدره انهم يخزنوا 2.2 بيتا بايت
البيتا بايت ده عباره عن مليون جيجا بايت
قدرت اجيب صوره اكتر نقاء من الصوره اللى خدتها انا ويانيا فى المكتبه

 

السيده سوزان مبارك فى 10 يناير 2007

 

لازم نقول برضه ان مكتبه الاسكندريه مربوطه بخط انترنت مستقل بسعه 155 ميجا بت فى الثانيه وبتحتوي على على 70 بليون صفحه انترنت مؤرشفه و 2000 ساعه مسجله للتليفزيون المصري والامريكي و الف فيلم ارشيفي و 25 الف كتاب الكتروني .
بصراحه حاجه مشرفه .. ونتمنى المزيد من التقدم ليكي يا مصر ..