مدونة أحمد هتلر

كان راجع من شغله منهك تعبان
وفالطريق للبيت لقى جنازه كبيره ماشيه
وبطبيعته كراجل مصري قالك اما اشيل معاهم واخد ثواب
دخل وسط الزحام وشال مع الناس اللى ماشيه
وبعدين لما لقى الناس كتير قوي .. سال هوه مين الميت ؟؟
قالوله جمال عبد الناصر !
قالهم يالا يا ولاد الكلب يا مجانين
شايلين الكفن فاضي
هوه انا ناقصكوا

* حدث بالفعل ..

عربه كارو يجرها حمار وسيم
محمله بالاطباق البلاستيكيه الملونه
تقف فى شارعنا .. ينادي قائدها بعلو صوته الموسيقي سكسووونيا !
فى البدايه لم افهم .. ما علاقه سكسونيا بالاطباق الملونه ؟؟
هل هذه الاطباق المانيه الصنع مثلا ؟
نادت عليه احدى الجارات فأوقفته
واذا به تعطيه كيسان ممتلئان بالملابس القديمه
وتأخذ مقابلهما طبقان مختلفا الحجم واللون فى سعاده
لم اندهش عندما عرفت انه يقوم ببيع هذه الملابس فى سوق التلات المشهور بالزقازيق
ويعود ليقوم بعمليه المقايضه مع سكان المناطق الشعبيه كمنطقتنا ..
منادياً .. سكسوووونيا

لا ادرى ما حب المسلمين على مر الزمان فى تشبيه البشر بالحيوانات !
فى اكثر من واقعه مؤرخه تاريخيا وحتى فى صميم الدين
فالقرده والخنازير هي من الالفاظ المعتاده عند وصف اليهود مثلاً
ولا ادرى لم تتجاهل العقليه المسلمه ان اليهود او غيرهم هم بشر
متساوون معهم فى نفس الحقوق والواجبات
واذا كان من حق المسلم ان يصف اليهودي بالقرد فمن حق اليهودي ان يفعل المثل !
اذكر اثناء دراستي بالمملكه فى ماده التاريخ
تلك القصه المشهوره للاسيره التى صرخت بعلو صوتها وامعتصماه
فماذا كان رد المعتصم ؟
ارسل برساله لقيصر الروم قائلاً
"من المعتصم الى قيصر كلب الروم .. والله ان لم تأتوني بالمرأه المسلمه
لاتيكم بجيش اوله عندكم واخره عندي"
وطبعا كانوا يضربون لنا به المثل فى الشجاعه
وكان المفترض ان نستنتج نحن اننا ما احتقرنا بين الامم حتى اصبحنا فى
هذا الوضع المهين الا لبعدنا عن الاسلام ونظام الخلافه الاسلامي
لكن هم فى نفس الوقت قد زرعوا بداخلك ان وصف الاخر بالحيوان هو من اعمال البطوله الاسلاميه !
نفس اللفظ قد تكرر من هارون الرشيد
الذي كان قد اعتاد على اخذ الاتاوه الاسلاميه من الملكه ريني
فلما انقلب عليها نقفور واخذ الحكم وامتنع عن دفع الجزيه
وارسل برساله الى ابن الرشيد ورد بها
"أما بعد: فإن الملكة التي كانت قبلي كانت أقامتك مقام الرخ، وأقامت نفسها مقام البيذق، فحملت إليك من أموالها أحمالا، وذلك لضعف النساء وحمقهن، فإذا قرأت كتابي فاردد ما حصل قبلك من أموالها، وإلا فالسيف بيننا وبينك"
ومع ان نقفور لم يتجاوز حدود اللباقه بوصفه ابن الرشيد بطائر الرخ
لان ذلك كان من باب الاعتراض على تعظيم الملكه له لدرجه انها عاملته على انه طائر الرخ !
الا ان رد هارون الرشيد الذي انتابته نوبه غضب
عند مطالبته بارجاع الحق لاصحابه من الرؤيه المنطقيه
فنحن كمصريين اخذنا تعويضات مقابل استغلال اسرائيل لموارد سيناء طوال فتره احتلالها
الا ان الرؤيه الاسلاميه ترى ان سرقه الاخرين تحت اسم الجزيه هو حق مكتسب
بما انهم اصحاب الدين الصحيح والقوه العسكريه المفرطه باسم الدين
فما كان الرد الا
" من هارون امير المؤمنين الى نقفور كلب الروم ، قد قرأت كتابك يا ابن الكافرة، والجواب ما تراه لا ما تسمعه"
ودعنا هنا من ذكر ابن الرشيد لام نقفور ووصفها بالكافره
لانه بالرغم من انه كان اميرا الا انه كان لا يفقه شيئاً فى فنون الادب ولم يكترث بنظره الاخرين لشعب هو يمثله
فلم يكن بصعب على نقفور ان يرسل له برساله يسب بها امه وجدته الكافره من وجهه نظره ايضاً
هذه صور بسيطه من اسلوب تعامل المسلمين مع الاخر
واحترامهم له ..

اليوم التالت ده كان يوم لذيذ جدا
صحينا من النوم متأخر طلعنا على سان ستيفانو 
عالفود كورت علطول .. طلبت واحد برجر يار من مؤمن
وبصراحه ده خلاني اخد موقف نهائي من مؤمن وكل منتجاته
زيزينا فى الزقازيق بيعمل حته برجر مكس احسن منه ميه مره !
اختفت يانيا عشر دقايق ورجعت معاها ايس كريم
قعدنا نكلم ماتيا شويه كانت موجوده اون لاين
وبعد كده طلعنا على القلعه
الجو كان مشمس وفنفس الوقت في غيوم
وانا داخل من البوابه بتاعه الامن
الموظف كان بيكلمني انجليزي
لما شاف التذكره بتاعتي قالى انت مصري
قلتله اه .. قالى وسايبني اتكلم انجليزي ده كله !
قلتله وايه المشكله مانا فاهمك وخلاص عربي انجليزي مش مشكله يعني

 

واحد صاحبي فخور قوي انه هوه و ابوه وجده الباشا كانوا وفديين
واول ما قلتله ايه رايك فى الليبراليه وشرحتهاله عالسريع
لقيته بيقولى الكلام ده مينفعش فمصر .. ده كفر واحنا دوله مسلمه

عضو فى حزب وفخور بيه وميعرفش ان الحزب ليبرالي من 80 سنه!
عالم واخدينها وراثه

في فتره انقطاع كابلات الانترنت الاخيره
فكرت فاني انقل مواقعي جوه مصر
الفكره دي موجوده من زمان لكن مع الاسعار الخرافيه اللى كانت موجوده
من شركات زي لنك دوت نت وتي اي داتا كانت الفكره مرفوضه ..
لقيت بالصدفه بديل مصري
اسمه سيتى نت هوست CityNet Host
قلت ممتاز بعت ايميل استفسر عن شويه حاجات من الشركه
كان عاجبني فيهم ان عندهم دفع من خلال فودافون كاش
وطبعا بالاضافه لوجود ضمان اب تايم 99.9% للنتورك
وفنفس الوقت ضمان استرداد اموال قلت ممتاز كده مش هنخسر حاجه اما نجرب
حجزت سيرفر وحولت المبلغ على فودافون كاش
بعدها بـ 12 ساعه استلمت البيانات
اول مشكله كانت ان السيرفر 2 جيجا رام بدل 4 جيجا زي ما طلبت
ردوا عليا بان الرامات مش موجوده حاليا وكمان 3 ايام هتكون راكبه
الرامات ركبت بعد 5 ايام
قلت مش مشكله يا واد عديها
كمان كام يوم والموقع واقع بالكامل
والاي بي مبيردش
لا روت داخل ولا WHM
طيب ابعت ايميل .. ساعه ومفيش حد معبرني
قلت اما اتصل برقم الشركه 015354448
الخط مبيجمعش نهائي ..
واذ فجأه كده الموقع اشتغل بعدها بساعه تقريبا
تاني يوم نفس المشكله قلت اتصل تاني
برضه الخط مبيجمعش
استنيت لما الموقع اشتغل وبعدين اتصلت
مزيكا 15 دقيقه ومحدش بيرد
بعت ايميل الرد كان ان فى DDOS على السيرفر
ازاي هجوم والنتورك بتاعتكوا كلها كانت واقعه
ده حتى موقع الشركه مكانش شغال
احنا هنكدب كمان !
بعدها بكام يوم بعتولى رساله وقالولى السيرفر بيبعت سبام
بعتلهم قلتلهم المشكله اتحلت
بعدها بيوم لقيتهم قافلين السيرفر
اتصلت بالرقم رد عليا موظف ويبدوا انه مالوش علاقه بالموضوع
ومفيش اي حد فى الشركه فاهم اي حاجه عن السيرفرات غير محمد طلعت
محمد طلعت شغل السيرفر بعد ما رد على الايميل
طبعا انا معجبنيش الوضع بتاع الشركه
فطلبت اني اكنسل السيرفر واسترجع المبلغ اللى دفعته
كان رد بشمهندس محمد انه كنسل السيرفر وحول الطلب على الحسابات
الكلام ده كان يوم 7/2/2009
وانا صابر عليهم من يومها انهم يحولوا المبلغ مفيش
بعتلهم اكتر من رساله على كل ايميلات الشركه ومحدش رد عليا
انا بفكر جديا بتقديم شكوى فى جهاز حمايه المستهلك
بما انهم شركه رسميه زي ما بيقولوا وليها  مقر على ارض مصر .
اللى غاظني اكتر وقتها
ان شركه iweb الكنديه كانت عامله اوفر الخط الباندويث 50 ميجا انميتريد مع اي سيرفر بـ 50$ بس
طبعا انا حجزت سيرفر فى الاوفر وكان فى سيرفرين تانين حاجزهم وشغالين
فطلبت من المسئول عن الحساب بعد ما دفعت الفاتوره
انه يوقف تسليم السيرفر لغايه يوم 3 فى الشهر الجديد
بعد اسبوع ويومين من الحجز .. تاني يوم بفتح الايميل
لقيت رساله فيها بيانات السيرفر الجديد
فبعت للمسئول عن الاكونت قلتله ايه التهريج ده انا مش طلبت منك تاجله اسبوع ؟
بعت قالى احنا اسفين .. انا بلغتهم وهما قرروا انهم يدولك الاسبوع ده مجاناً
وده الفرق بين الشركات المحترمه وبين الشركات المصريه زي سيتي نت