مدونة أحمد هتلر

انقلاب مزاجي حاد

admin — Sun, 28 Feb 2010 04:51:02 +0000

مابين الرغبه والامل
ما بين الهدوء الفكري
تخرج العاصفه
يخرج التساؤل .. هل هذه هي الحقيقه
وان لم تكن .. فلماذا اؤمن بها ؟
وان كانت هي الحقيقه .. فهل اتركها قيد الاختبار والتجربه ..
ام اؤمن بها كما هي .. ويظل شكي ..
ايهما افضل .. هل مغامرتي باختبارها
ستعيدها حقيقه اقوى نهائيه
ام ستعيدها نزوه عابره ؟
اخاف حقا حد الرعب من تشوه اللوحه
ولكني لم اتعود ان اقف صامتا .. واؤمن بما لا اثق به ..
فلنر ما ستاتي لنا به الايام ..

تهييس مشتاق

admin — Fri, 05 Feb 2010 17:05:23 +0000

وتجيلي اوقات احس بيك حواليا ..
اشم ريحتك ..
انتشي ويتهز قلبي ..
ادور عليك ..
محتاجك اكتر ..
الاقي برود بعدك بيغطي المكان ..
اسرح وافتكرك .. حضنك .. شفايفك ..
وابص في المرايه ادور على لون عينك فعيني ..
وافتكرت اني .. غصب عني ..
نسيت اقولك لما سبتك .. بحبك ..
بحبك

ما بين السطور ..

admin — Sun, 24 Jan 2010 16:51:45 +0000

ما بين السطور بدأت قصه عنيفه
وبين السطور برضه كبرت القصه
وبين السطور .. وبين السطور
بقى في احاسيس وانتماء ومشاعر
لكن الكتاب كان كتاب حريه
بيرفض القيود والمرجعيه
طيب منين وليه وازاي
نسينا قاعدة اللا قواعد
وكان اول شروط ارتباطنا
نتخلى باتفاقنا عن الحريه
وليه دلوقت شفت القيود هدف مش وسيله ؟!
ليه تقبلنا الخوف وطعمه
وبدانا ننسى لا مبالاتنا
مع اننا عشقنا بعض فيها
ليه بنغير نفسنا .. وفاكرين اننا كده هنبقى لبعضنا ؟
هو احنا هنكره نفسنا .. علشان نحب بعضنا ؟!

عوكل حين قال ..

admin — Wed, 20 Jan 2010 10:30:34 +0000

الغول عضو مجلس الشعب معلقا على احداث نجع حمادي :
“انا بقالي اربعين سنه عضو مجلس شعب”
محمد سعد مقاطعاً :
“سيبونا ناخد فرصتنا بقــــــــــــــــــــــــــــــــى !!”

وحدوووووووووه

admin — Fri, 15 Jan 2010 01:01:16 +0000

فى صيف احدى السنوات
واحد من الموظفين جاتله مأموريه فى الاسكندريه
حط نفسه يوم الخميس فى القطر
وصل بالليل نام لغايه الجمعه الصبح
ظبط نفسه وخد المايوه وفط ونط فى البحر
وعلى الصلاه خد نفسه وطلع على جامع متوسط الحجم
واذا بميت يدخل الجامع محمولا على الاكتاف
الراجل قالك اهو نصلي عليه بالمره ونكسب الثواب
طلع شخص ما من قرايب الميت
وقال يا جماعه المرحوم مديون .. عليه 5 الاف جنيه
واحنا بنجمع دينه علشان نسده ..
وطلع الخطيب .. وخطب .. عن الميت وسداد دينه والاجر
وموقف الرسول وابو قتاده والقصه الشهيره ..
قوم ايه الراجل طلع من جيبه خمسين جنيه
واداها لقريب الميت .. زي ناس كتير فى الجامع
المهم الخطبه خلصت .. والصلاه خلصت ..
وجه وقت الصلاه عالميت .. فين اهله .. مفيش !!
بح فص ملح ودابوا !!
وهنا كانت الصدمه اللعينه ..
المرحوم مخدتين ..

اعراض جانبيه

admin — Sun, 10 Jan 2010 04:55:01 +0000

لما تلاقى انك بتحط معجون السنان
بدل معجون الحلاقه على دقنك ..
اعرف انك واقع فقصه حب سواد !!
ولو استمريت وحلقت بيه ..
فى الغالب القصه عنيفه قوي
او دي اعراض لمرض تاني بقى ..
شوفلك دكتور يابني هع

امتحان

admin — Fri, 08 Jan 2010 03:16:02 +0000

لاحظ انه يتحدث عن الجنس اكثر من المعتاد فى الفتره الأخيره
ولانه يكره ان تسيطر عليه فكره ما وتحتل تفكيره
قرر ان يجتاز امتحان وضع اسئلته بنفسه
الاهم هو هل سيستطيع حقاً مقاومه هذه الفكره ام لا
اتصل بصديقه له يعشق جسدها الخصب حتى الثماله
اخذها الى غرفة نومه
وطلب منها ان يقضيا الليله عاريين فى فراشه ..
وفعل !

اوباااا … بايدي الشمال

admin — Tue, 05 Jan 2010 19:07:00 +0000

اللعنه .. مكنتش اعرف اني هكتب اول تدوينه بايدي الشمال !!
العربيه مره واحده بطلت وانا ماشي ..
ركنت وفتحت الكبوت اشوف المشكله
الكلبس بتاع عصايه الكبوت اتكسر ..
ودخلت العصايه عالماتور وعملت قفله مع البطاريه ..
قوم ايه بقى .. انا بغبائي .. فتحت الكابوت وبشيلها ..
اوووف .. واحد صاحبنا اتلسع لسعه سواد !!
ملعون ابو العربيات الصيني كلها !!
مش عارفيين يغطوا الصابع بتاع البطاريه ولاد الـ … دول !!
كويس انها جت على قد كده والعربيه مولعتش .. هع

هابي نيو يييير يا رداااااله

admin — Thu, 31 Dec 2009 22:07:08 +0000

هتلور رجع يا رداااااااااااااااااله
نفتتح معكم للمره الثانيه المدونه العريقه .. بعد انقطاع دام عده شهور
لاسباب استبحساويه ما ..
الا انه وبعد ان اكتشفت قيمة هذه المدونه العظيمه
عدت لها بعد طول فراق ..
انتظروني .. هع

نهايه ..

admin — Sun, 12 Apr 2009 06:03:58 +0000

انا شفتك قبل كده
اكيد .. امتى .. مش فاكر ابداً
بس ازاي المره دي اثرتي فيا بالشكل ده ؟
لا .. المره اللى فاتت كنت خايف
منعت نفسي اني احس بيكي
المره دي انا واحد تاني
واحد مش خايف من حاجه
انا اتغيرت بجد
بقيت واثق فنفسي اكتر
بس ازاي ومع اني عارف انك مش ليا
فايدك دبله غيري
احسس المرادي قلبي بيكي ؟؟
ازاي انتي الوحيده اللى حركتيني بجد من جوايا
احساس بجد محستوش قبل كده
ومع ذلك .. حبيت اقولك ان الحب عندي مش ابدي
الحب حريه
مسمعتيش منير بيقول وده حب ايه ده اللى من غير اي حريه
ومسمعتيهوش وهوه بيقول ياللى انتي حبك حريه
معلش انا عندي هوس بمنير
شفتي فيلم صياد اليمام ؟؟
لازم تشوفيه .. انا حسيت اني بشوف نفسي فيه
انا اللى مش عايز اكون اغنى واحد فى القبر
وبرضه مش هرضى اكون متوسط فى الدنيا
انا عايز اوصل للمرحله اللى اكون فيها حر
حر فقراري .. حر فاختياري .. حر حتى فاني احب واكره
مش هتفهميني ..
عموما حبيت اقول اني عملت حاجات كتير
مش راضي عن نفسي اني عملتها
حاجات كتير همسحها من حياتي
وهبدأ بدايه جديده ..
واتمنى انه ميجيش اليوم اللى احتاج فيه ابدأ كمان بدايه
لان مش دايما هتكون الفرصه موجوده لده
وانا عارف ده
ده كمان اخر بوست فى مدونتي باسم احمد هتلر
بعد 3 سنين ويوم بالظبط من افتتاحها
3 سنين اتعلمت فيهم حاجات كتير
وبقيت فيهم انسان مختلف ومتميز
صحيح لسه محتاج تطوير لكن عارف هوه عايز ايه
وعنده خطه لسنين حياته هينفذها بكل اراده
ومتحمل لكل نتايجها
انا بعتذر لاي شخص ضريته ففتره كنت بستغل اي انسان غبي فيها استغلال سيء
كنت بستغل مبدأ ان القانون لا يحمي المغفلين وبدي نفسي الحق اني استغلهم لانهم مغفلين
انا مش زعلان بالعكس دي كانت ايام لذيذه حسيت فيها بذكائي وبقدراتي .. صحيح استغليتها بشكل سيء ..
بس انا كنت لسه ناقص الاهليه قانوناً ..
انا مش هعوض حد عن حاجه ولا بطلب من حد يسامحني .. اخبطوا دماغكوا فى الحيط
واي حد معجبوش حاجه من اللى كنت كتبتها برضه يخبط دماغه فى الحيط
المدونه دي هتفضل شغاله لغايه ما اقرر غير كده
مش هكتب هنا عنوان مدونتي الجديده
لكن هتوصلوله زي ما جيتوا هنا
متشكر لكل الناس اللى حبت اسلوبي فى الكتابه
متشكر لكل الناس اللى تابعتني على مدى 3 سنين
متشكر لكل رد مشجع وصلني .. لكل انسان ضحك على بوست كتبته
او رد رد محترم على بوست نقاش فكري
او عجبته صوره كنت صورتها عن بلدي اللى بحبها وبعشقها .. مصر
وكل بلوج وانتوا طيبين ..