مدونة أحمد هتلر

قالها شاخطاً فيا الأستاذ اللى باخد عنده درس
كان بيشرح جريمه الإغتصاب
وقال ان جريمه الإغتصاب في القانون المصري لا تقع إلا على أنثى
اي انه يجب أن يكون الفاعل رجل ويقع الفعل على أنثى !
قلتله يا أستاذ :
انت قلت إن الإغتصاب يقع على أنثى أفهم من كلامك إن لو حدث العكس وتم إكراه الرجل على ممارسه الفعل الجنسي من قبل أنثى ده ميكونش إغتصاب ؟
قالى لا ..
قلتله ازاي أعتقد إن الحالتين واحد ؟
قالى مفيش نص قانوني النص محدد الأنثى فقط كضحيه
لما تم تشريع القانون لم يتصور القانون قيام المرأه بالإغتصاب المعروف هو قيام الرجل بتلك الجريمه وليس المرأه .
يا أستاذنا
يعني الرجل لو تم إغتصابه من قبل أنثى متبقاش دي جريمه إغتصاب
قالى لا يابني إنت مبتفهمش
قلتله يعني احنا مفيش قانون يحمينا كرجاله ولا ايه ؟
قالى لا وهو انت تطول تغتصب
يانهاررر … إنت بتتكلم بجد يا أستاذ
ايوه ياحمد مفيش نص قانونـــــــــــــــي !!!

وقال ايه بيطالبوا بالمساواه
عليه العوض فى الرجاله ..

افتكرت المناقشه دي لما قريت نفس الموضوع
بس عن التحرش الجنسي مش الإغتصاب فى موقع عرشينيات
التعليق رقم 6
http://masr.20at.com/article.php?sid=1150
—————————–
كلية الحقوق – محاضرة القانون المصري

الدكتور : ويعاقب القانون المصري في جريمة التحرش الجنسي بأنثى.. بعقوبة الحبس والغرامة.. وفي حالات بعينها.. تصل العقوبة إلى الإعدام..

الطالب : بعد إذنك يا دكتور.. هي العقوبة بتطبق في حالة إن المتحرش به يكون أنثى.. يعني لو تم التحرش براجل.. بتكون إيه العقوبة..

(ضحك في القاعة.. ويقوم الدكتور بطرد الطالب صاحب السؤال ويقول في سره : أعوذ بالله.. أستغفر الله العظيم.. هو ممكن الفجور يوصل لكدة؟؟)..

صوت من خارج الكادر : ممكن يا دكتور!
——————————

ياترى انتوا فين يا رجاله مجلس الشعب من قصور القانون !
امال ازاى الراجل والست واحد قدام القانون .. ازاااااااااااااي ؟

قالوا عني باني لا ادخل مشروعاً فاشلاً ..
لكن من الذي يحكم على احد القرارات انه صحيح ام خاطيء غير النتائج ؟

قمت اليوم بإنشاء شبكة قانون جمهورية مصر العربيه
على نطاق http://www.egyptlaw.net
بالنسبه لى كمبرمج فالنطاق يعني لي الكثير وكونه ملكي انا من بين كل من يهتم بالقانون في مصر فهو يعتبر نجاح لي على صعيد الانترنت ..
اما بالنسبه لي كمواطن مصري ادرس القانون بكليه الحقوق .. فكان يجب ان اولى القانون اهتمامي قليلاً
الم يفكر أحد في فكره كالمحكمه الإلكترونيه ؟
الم تخطر ببال احدكم ان تتم المحاكمه من خلال موقع على الإنترنت
ربما تكون افكاري واقعاً بعد عشرات السنين فقط !!

تخطيطي للمشروع كبدايه ..
1- ان يكون مرجعاً الكترونياً شاملاً للقانون والدستور المصري .
2- أن يكون ملتقى لكل من يهتم بالقانون فى مصر .
3- ان يصبح احد اهم المواقع التى يلجأ اليها السائل عن الأحكام والإستشارات القانونيه .

شعار الموقع الذي قررت اختياره له من بين افكاري :
"إن من اساسيات المجتمع الناجح أن يعرف الحاكم والمحكوم حقوقهم وواجباتهم"

الشبكه هي أحد احلامي
لكن من يدري هل سياتي اليوم الذي يتحقق فيه حلمي
وتصبح كما خططت لها الآن ؟
أم قد تكون مجرد مشروع تجاري قد يفشل او ينجح …
هذا ما سنعرفه من خلال الأيام …

أحمد هتلر

ساعات بتيجي اوقات بيحس فيها الواحد انه فاهم كل حاجه

وانه عارف كل حاجه

وبيتكلم بقلب جامد وهو حاسس انه على حق

فى الزمان ده محدش عارف ايه الحقيقه

يمكن الكبار بس اللى عارفين الحقيقه فين

هما اللى ماسكين كل حاجه وفاهمين كل حاجه

اتمنى يكون ده الواقع

الكبار هما اللى يكونوا عارفين

تبقى مصيبه لا يبقى الكبار مش فاهمين

تعالوا نتكلم في السياسه شويه

اكيد سمعتم عن الشرق الاوسط الكبير والشرق الاوسط الجديد

وسمعتم ان امريكا عامله مخطط بسيط كده لدوله مصر

عايزين يقسموها 3 دول

سيناء للبدو

ومصر وجه بحري للمسلمين

ومصر وجه قبلي للمسيحين

حلو قوي لغايه كده

سمعت برضه ان المخطط ده من التمانينات

طيب

طبعاً الله اعلم ايه حقيقه الموضوع ده

يمكن الحاجه الوحيده اللى الواحد على يقين منها هيا ربنا

طيب ربنا قال ايه

قال ان فى مخطط من النيل للفرات

وبما انهم متبعين سياسه فرق تسد

يبقى فعلاً الشرق الاوسط الكبير ده حقيقه

ياريت يكون الكبار فاهمين كده ..

اللي غايظني بقى

هما ليه ساكتين

احنا ليه ساكتين

اكيد علشان مش فاهمين

حد فهم حاجه من الكلام اللى فوق

الكداب يقول اه

مش مهم تفهموا دلوقتي

هتفهموا بعدين

المهم انكم لازم تفهموا انكم عايشين فى عالم من المتناقضات

واحيانا بتبقوا موافقين على حاجه وتاني يوم ترفضوا نفس الحاجه اللى وافقتم عليها

ايام تلاقي اعضاء جماعه الاخوان واخدين راحتهم ويدخلوا مجلس الشعب

ويعملوا كل اللى نفسهم فيه

وايام تلاقيهم ملمومين كلهم ومرميين فى المعتقلات بحجه الانضمام لجماعه محظوره

ايه الهبل ده الواحد مش فاهم ..

الكبار بيفكروا ازاي ..

حد فاهم

اكيد فى حد فاهم

ياريت يا جماعه حد من اللى فاهمين يفهم اللى مش فاهمين زي حالاتي …

ميدو بيقولى انت مكتبتش موضوع يوم الجمعه ليه ؟

انا اليوم الممل فى الاسبوع عندي هو يوم الجمعه

مبيبقاش فيه احداث جديده ابداً

علشان كده متسالوش عن الجمعه تاني

…..

النهارده انا مش عارف اكتب عن ايه

عن اليوم المعتاد فى الجامعه ؟؟

يعني اهو الواحد غير بدل كوكا كولا كانز بقى بيشرب ماونتن ديو

تغيير بقى وتحطيم للروتين والنمطيه

ومفيش جديد

نفس الولاد ونفس البنات

نفس الوشوش ونفس الدكاتره

حتى ان الواحد بيحس ان نفس المحاضرات بتتشرح

تقولش الواد بيحضر محاضرات

اللى شد انتباهى اكتر انى لقيت الاخوان المسلمين حاطين

لافتات مكتوب عليها لا للطواريء

انا الصراحه فكرت انى اعمل زيهم واطبع 1000 لافته والزقهم فى الزقازيق

واقول نعم للطواريء

هو انا مش مواطن مصري ؟؟

هو انا مش ليا حريه التعبير والرأي ؟؟

ومادام فى ديمقراطيه يبقى لازم كل واحد يعبر عن رايه

هما شايفين انه لا للطواريء

انا شايف انه لازم قانون طواريء

انا كان عندي نص القانون على الجهاز بس مش عارف راح فين بس

هجيبهلكم قريب ..

يا جماعه انا شايف القانون لصالح المصريين بكل المقاييس

ماهو لو مفيش قانون طواريء هتبقى فوضى

مش عارف انا ايه الاخوان المسلمين دول

يا اخوان انتم منظمه فاشله سياسياً

ايوه فاشله سياسياً

لو اتشال قانون الطواري هتبقى مجازر وهنبقى جزائر تانيه ولا نسيتوا اللى

حصل في الجزائر ؟

عملتم ايه يتحسب لكم ؟؟

اى واحد فاكر ان الاخوان المسلمين بقوا تجمع او حزب او قوة فى البلد

يبقى غلطان

في فرق كبير بين انك تكون قوه بانجازاتك وانك تكون قوه بمزاج الحكومه

فى واحد امبارح جاى بيقول ان اسوأ عصر عدى على مصر هو عصر مبارك

الاخ شكله مكانش عايش ايام السادات

وما بيقراش تاريخ حتى 30 سنه ورا

خير الامور الوسط ..

فينك ياسادات

تيجي ترميهم كلهم فى المعتقلات علشان يعرفوا ان الله حق ..

—

بعيداً عن الصداع والدوشه

أنا شباب ولازم أعيش حياتى

مش لازم اتشدد والبس جلبيه لغايه تحت الركبه بـ 10 CM

ولا دقني تبقى 15CM علشان ابقى مسلم

وبرضه مش لازم ابقى منحرف قوي يعني

يعني خير الامور اوسطها

ليه الناس كلها تبقى ماشيه في طريق وانا امشي في طريق تانى

مع اقليه انا مش مقتنع بصحتها

والقانون مش مقتنع بيها

واغلب المجتمع رافضها ورافض مبادئها المتشدده ؟؟

انا عندي اساس .. اى شيء بني على اساس ديني فى مجتمع فيه

اختلاف ديانات لازم يبقى فاشل بكل المقاييس

انا عاوز انزل اتفسح واخرج .. عاوز اعيش فتره الشباب بحريه

مش عاوز قيود من اي شكل

لا من حكومه ولا من متطرفين

سيبونا نعيش في امان وريحونا

بلا سياسه بلا قرف بلا وجع دماغ

اتخانقوا بعيد عننا

متخلوناش ماشيين فى الشارع خايفين ان واحد يفجر نفسه فوسطينا

متخلوناش ماشيين بالليل نتمسك تحري (انا مستثنى من التحري قانوناً)

ارحمونا وخلونا نعيش كلنا على ارض مصر فى امان وسلام

خلونا نحب بعض .. ليه منبقاش الاخوان المصريين

بدل الاخوان المسلمين ؟؟

انا رايح انام لانى تعبت الصراحه

الناس دي مش هتسكت الا لما مصر تبقى كلها معتقلات

لما الامن المركزي يديهم كل واحد علقه محترمه

لما تتصادر ممتلكاتهم ولما يمنعوا من ممارسه اي نشاط سياسي

عايزين يشيلوا الطواريء علشان يعملوا اللى هما عايزينه براحتهم

خونه وعملاء .. ممولين من الخارج أكيد طبعاً

مهما كان شعارهم الواضح انهم منهجهم الاسلام

عموما ممكن اكون انا غلط

الله اعلم

بكره كله يبان ..

موقع حقوق الانسان فى مصر
موقع الاستهبال الشعبي والافتراء والمبالغه واللامنطقيه
http://www.eohr.org

المواقع دي متسابه ليه ومش محجوبه فى مصر

علشان مفيش ديمقراطيه صح

مانتم لو عايشين فى السعوديه كنت عرفتم ان الله حق ..

بس اللى عايش فنعمه مبيحسش بيها الا لما يتحرم منها ..